Hébreuli 13 - Féké Testament 1947

¹ Oui laïbi jing sénahang hana yindi.

² Oui yangnaran baï to̱ko̱na sénahang hi go̱ro̱li ya, baï ka mboro on njou‐hanali nding ko̱ko̱ jing angeli da tane ga tou ya.

³ Oui bi laou baï toula njou‐jo̱bo̱li mahana ka oui ko̱ ba njou‐jo̱bo̱li jing kli kéng, da oui bi laou baï toula kli on ko̱ njoukouli mi to̱ko̱ssé hi kli, mahana ka oui fèn baï oui mi kaou jing kli‐mone kéng.

⁴ Dadaon an njoukouli mi ji ba bina waïn voulou an woro baï bon, da to̱ko̱ name bina waïn voulou mi na ba dakame ya, baï ko̱ Ouone ma wal baï hi njoukouli on ko̱ nding fèn dakame da njou‐maïnli.

⁵ Oui bi hang baï toul sénahang mbo̱ri ya; go̱ro̱ baï mi vo jing fènli on ko̱ na ndo̱ko̱ baï; baï Ouone fènè mi sa: Yé mè ma nak mo gounfènakè ya, maléba mè ma yèng mo name mbéo ya.

⁶ Da mono on, ko̱ name ma baï sana baï ka waou ya: Nanjou ba njou‐léna mbèli, yé mè ba ngouna waou tane tiya. Yé njoukou ma nding ba fèn hi mi lé?

⁷ Oui bi hang baï toula kli on ko̱ to̱ko̱ mboro hi oui, njoukouli on ko̱ sa baïnjaka Ouone hi oui jinguèl; oui ènrèn bèlta ka mboro séna akli, da oui nding mahana ka kli ka mboro tounassaon akli.

⁸ Jésus‐Christ mahana ka léou, da kassénaï da guèbassoko.

⁹ Oui yèng goni baï toutoul da goni to̱ko̱nafèn mi miri oui guèfal ya; baï on bèlta ko̱ go̱ro̱ baï mi pou bi ka mboro ndingna mbo̱l, tane ti ka mboro laka ya, on ko̱ tane hi fèn ya, hi kli on ko̱ sé ka mboro aïn.

¹⁰ Na makaou jing autel ko̱ kli on ko̱ nding bakara bil tabernacle ma son laka an ndourou ya.

¹¹ Baï ko̱ kli‐mone a naïnli on ko̱ zaworo sacrificateur mi gui jing séme akli baï békéfèn ka bil guèl tangna fofoto ka soung kli an kala an guèl ndoïna.

¹² Mono baï on, Jésus kéng, an kè mi wal njoukouli bi baï nè fènè ka mboro dodok séme nè fènè, kè to̱ko̱ssé an kala an njaka ngalang.

¹³ Baï on dadaon an name tèn kala baï séna monè an kala an guèl ndoïna an name bou toula chonron on ko̱ mi gui toulè.

¹⁴ Baï ko̱ an guèl aïn loukou pou na kambèlè ti ya, da na mi nza pou on ko̱ ma gui o̱.

¹⁵ Mono on, dadaon an name hi sacrifice jona Ouone guèbassoko mbo̱l kè, ko̱ mi sa ba léna a ga haou baï, ko̱ mi to̱ko̱ ling‐è bi kala.

¹⁶ Oui yangnaran ndingna bèlafèn da ko̱ko̱ ya, baï sacrificeli mahana on bi wélé toula Ouone ta.

¹⁷ Oui la baï akli on ko̱ to̱ko̱ mboro hi oui da kaou bo̱ko̱ hola kli, baï ko̱ kli zéng baï toul laou baï mahana ka njoukouli on ko̱ ma foul fal baï on; an kli mi nding on ka jangnandaï, da ti ka go̱ro̱ séta ya, baï on tane ga hi oui bèlta bo̱ko̱ mbéo ya.

¹⁸ Oui hiou Ouone kon toula, baï na toutou ko̱ laou‐tounafèn na na bèlta ka ji séna ka mboro on mane jing fènli bon.

¹⁹ Da mè wara oui nyèta an oui mi nding mahana ka on, na mè mi féré guè mone baï koukoulion.

²⁰ Da Ouone a go̱ro̱ iki, kè on ko̱ tome loukou njou‐ko̱ra badouali, ko̱ ba Nanjou na Jésus, an wora houli ka mboro séme a bina gonjaka an none hana kambèlè,

²¹ kè mosso oui guédék ka bèla pina bon baï kaouna mara fal toulè ko̱ nding pina an bil baï, fèn ko̱ bi wélé toulè ta, mbo̱l Jésus‐Christ. Hi jonafèn kambèlè go kambèlè hi nè! Amen!

²² Mè wara oui yindi, oui laïbi jing mi ka la baïnjaka warafèn; baï ko̱ mème dé takarata hi oui gounfènakè ka baïnjaka nyèta ya.

²³ Oui toutou ko̱ kli yèng yine na Timothée tou; tokoré kè mi gui koukoulion, yé mè da kè ma guè baï ko̱na oui.

²⁴ Oui name kli on bon ko̱ to̱ko̱ mboro hi oui, mahana jing njou‐lana‐bilaouli bon. Njoukouli an guèl Italie, klime name oui.

²⁵ An ndingna mbo̱l mi kaou jing oui bon! Amen!