Hébreuli 12 - Féké Testament 1947

¹ Mono on, baï na kéng, ko̱ name ko̱ loukou yiri mbame a njou‐sana bongbaï nali gui ki na mahana on an name yèng holali bon bi, da békéfèn ko̱ gna na gata, an name laïbi fanabala ngouna on ko̱ bourou hi na.

² Da nona mi ènrèn gui ba mona Jésus ko̱ ba zaworo a tounassaon na da njou‐ndingnakè guédék, kè on ko̱ to̱ko̱ssé an di‐croix ka jèk chonron baï ba jangnandaï on ko̱ mi yèng bi baï nè, da kème kaou tou ka mboro wonron ndo̱ko̱ kangala njaka bara a Ouone.

³ Baï on, oui bi laou baï toula kè on ko̱ bou toulè bil fanabaï a njou‐békéfènli an bèl monè, mahana on an njèran abaï mi tane o̱ ya, da laou baï mi tane loï ya.

⁴ Oui tane ga pong pouta bo̱l tèn séme ya, ka mboro tora jing békéfèn.

⁵ Da oui yangnaran warafèn on ko̱ mi sa ba oui mahana ka goundi. Goune, ni mo pong wana a Nanjou ya; Da laou‐o̱ mi loï ya ko̱ kème ba baï hi mo;

⁶ Baï njoukou on ko̱ Nanjou mi sé hang‐è ta kè wan nè, Da kè jo̱ goune nèli bon ko̱ kème ya.

⁷ Tokoré oui mi bou toul baï rou jing wana on. Ouone nding jing oui mahana ka goundi, baï goune hani ko̱ baba nè mi tane ga wan nè ya lé?

⁸ Da tokoré mi pènrèn baï wana oui ko̱ kli bon jing akli an ndourou, mono on oui ba goune banali, oui tane ti ba dodok goundi ya.

⁹ Da mi ta on, na kira babali jing naïn‐mone baï wana na jinguèl da na dik kli, dadaon an name kaou bo̱ko̱ hola Baba a esprit nali guèbambèl ya, ko̱ name kaou jing yana lé?

¹⁰ Baï ko̱ babali wan na ka name hanali, mahana ko̱ klime ko̱ bèl mone kli; da Ouone mi wan na baï ndingna bèlafèn jing na ko̱ name ma baï jingna tangna go̱ro̱ fofoto nè.

¹¹ Kassénaï, mi ko̱ wana on bon tane ga hi jangnandaï ya, da on ba fèn baï hina go̱ro̱ séta; da afal da wana on mi lé lénakè mbarou jing go̱ro̱ iki a guédék, baï a kli on ko̱ ba pou ka mborokè.

¹² Baï on, oui ndara ndo̱ko̱ baï ko̱ tan ta, Da oui pong jing njaka toukou baï ko̱ mi njèrèn ya,

¹³ Da oui mosso domboro tane ta baï a bo̱ko̱ baï, mono on bo̱ko̱ on ko̱ mi komoron mi dé domboro kli ya, da monè haï bèlta;

¹⁴ Oui nza mboro baï kaouna ka go̱ro̱ iki jing njoukouli bon, da oui kaou jing tangna go̱ro̱ fofoto, baï a njoukou on ko̱ mi tane ti jing rou ya, tane ma baï ko̱na Nanjou ya.

¹⁵ Oui pèng‐bèlta an njoukouna mi pènrèn ndingna mbo̱l a Ouone ya, baï saon a joungna go̱ro̱ mi ourou ka gui nza oui ya, da njoukouli nyèta gui dakame ka mboro aïn,

¹⁶ baï ko̱ njou‐maïn hana maléba njou‐poukouna Ouone mi tiya, mahana ka Ésaü, on mi ko̱ jo̱l fèn yanapélé nè baï laka mbéo bo̱l.

¹⁷ Baï ko̱ ouime toutou tongna ko̱ kème ji yana samnafèn on afal da, baba nè mi dèn baï hina nè, baï ko̱ kè tane jing mborokè baï komona laou‐kèras?-?fèn nè ya, tongna ko̱ kè sa jo̱jo̱ nè ka mbi léou.

¹⁸ Baï oui ga gui bèl souraguèl ya, on ko̱ njoukouli ma nda, on ko̱ hèlè rèng da guèl on ko̱ yirikè da yilime, da koukouna bine‐té nyèta.

¹⁹ Da mbéna gaga mbo̱sso̱ da bounaka baïnjaka, kli on ko̱ mi la bo̱ko̱ baï on da kli sa jo̱jo̱ a Ouone nyèta an kème sa baï hi kli ba aféké ya,

²⁰ baï ko̱ kli tane ma baï bouna toul kli baï on ya, ko̱ Ouone mi na gangna: Tokoré naïn hana mbéo mi nda souraguèl on, kli ma baï wouna nè ka kone.

²¹ Da fèn ko̱ klime ko̱ ba fèn waou nyèta, mahana ko̱ Moïse mi sa: Waou mi i mi nyèta da moni bon mi to̱ mi!

²² Da oui gui diya jing souraguèl a Sion, da loukou pou a Ouone ko̱ yan, Jérusalem a nonkala da oui gui diya jing angeli ko̱ mi ro̱ko̱ta maïya on, ko̱ njoukouna mi ma baï kènakè ya,

²³ kli on ko̱ ndoï bon jing hana da église a boutaïnkè ko̱ ling kli dé bi takarata an nonkala, da Ouone ba Njou‐walabaï a kli bon, da espritli a njou‐guédékli ko̱ mi ma guédék.

²⁴ Da Jésus on ko̱ ba njou‐vonabaï a féké bina gonjaka an none hana, da wèna séme on ko̱ sa baï bèlta mi ta a Abel.

²⁵ Oui pèng mone baï bèlta an ouime pong kè on ya, ko̱ mi sa baï. Baï tokoré kli on ma baï ngouna ya, ko̱ kli pong kè on ko̱ wara kli an koukoula, na ma baï ngouna kè on ko̱ na pong nè ko̱ wara na an nonkala mahana ka fèn lé?

²⁶ Ké on ko̱ njakè mi lang koukoula jinguèl, da kassénaï kè bi gonjakè tou ka sa: Yé mè nding ba aféké bo̱ko̱ mbéo, ko̱ ba koukoula mi to̱ ka ho̱kè ya, da ba nonkala kéng.

²⁷ Da baïnjaka on: Ba aféké bo̱ko̱ mbéo mi sa, yé mè bèngnèrèn fèn aïnli ko̱ to̱ mahana ka fèn aïnli ko̱ kè nding, mono on, fèn on ko̱ ga to̱ ya ma na pouta.

²⁸ Baï on ko̱ na jing bilkaou on ko̱ mi ma baï to̱na ya, dadaon an name kaou koukoula hi Ouone ka mboro aïn ko̱ name mapékékè baï ndingna bakara aïn ko̱ mi bi wélé an nona Ouone, ka mboro dikna nè da ngouna waou nonè,

²⁹ baï ko̱ Ouone na kéng mi ba hèlè ko̱ mi rèng fènli bon.