Hébreuli 11 - Féké Testament 1947

¹ Da tounassaon ba none fènli on ko̱ name bi hang na rou ka oli, da baï touna ka go̱ro̱ ka babaï fènli on ko̱ name tane ga ko̱ ya.

² Da ka mboro on kè sa bèla bongbaï a tangchidoli jinguèl.

³ Ka mboro tounassaon na toutou ko̱ kè mosso koukoula bon tou ka baïnjaka Ouone, mono on, fènli on ko̱ njoukou mi ko̱ tane ga nding ya, ka fènli on ko̱ nona njoukouli mi ko̱.

⁴ Ka mboro tounassaon mi ko̱ Abel hi sacrifice hi Ouone ko̱ bèl honta a Caïn; ka mboro on mi sa bongbaï nè ko̱ kè ba guédék. Ouone sa bongbaï toul toul ndo̱ko̱ a Abel, da ka mboro on kè pane sanakè tongna ko̱ kè hou tou.

⁵ Ka mboro tounassaon mi ko̱ Ouone komo Enoch, mono on an kème ko̱ houl ya, da njoukouna tane ga jing nè ya, baï ko̱ Ouone mi komo nè, baï ko̱ ka titilikè ko̱ Ouone mi komo nè, bongbaï nè ba ko̱ Ouone mi ko̱ nè bèl monè ta.

⁶ Baï ko̱ tane tounassaon, njoukou tane ma ya, an Ouone mi ko̱ nè bèl monè ta; baï ko̱ kè on ko̱ mi guè mona Ouone, ba baï nè an kème la nè bi laou‐è ko̱ kè makaou, da ko̱ kè ba njou‐hina toul ndo̱ko̱ hi kli on ko̱ nza nè.

⁷ Ka mboro tounassaon mi ko̱ Noé, ko̱ Ouone wara nè toul fènli ko̱ kè pane ga ko̱ ya, kè ngou waou nona Ouone, da kè mosso kombone baï kouna njou‐voulèli; da ka mboro on kè sa baï kon toula njou‐koukoulali, da tèn njou‐yana pélé a guédék on ko̱ mi na ka mboro tounassaon.

⁸ Ka mboro tounassaon mi ko̱ Abraham, ko̱ Ouone di nè, mi la baï nè, da ourou ka sé guèl on ko̱ kè ma ya pélé ka séssé hana, da kè ourou da tou guèl on ko̱ kème guè séna ndourou ya.

⁹ Ka mboro tounassaon kè bi an goni koukoula a bina gonjaka, mahana ka dodok pou nè ya, da kè bi bil tente jing Isaac da Jacob, kè jing njou‐yana péléli ka mbé bina gonjaka on.

¹⁰ Baï ko̱ kème oli loukou pou on ko̱ bètèkèli mi na pouta, ko̱ Ouone mi ba njou‐mossonakè da njou‐ndingnakè.

¹¹ Ka mboro tounassaon mi ko̱ Sara fènè, mi jing njèran baï mbanabil, ka mboung goune, tongna ko̱ saka nè mi ta nyèta, baï ko̱ kè la bilaou a kè on ko̱ bi gonjaka hi nè ba lodok.

¹² Mono on kéng, ka mèran njoukou mbéo on ko̱ monè po̱ko̱ro̱ tou ma houl, kè mboung mèrènkè ko̱ nyèta mahana ka mèssè an nonkala, da sarika an bèl nguèng loukou mbi tome on ko̱ njoukou mi mabong kènakè ya.

¹³ Kli on bon hou ka mboro tounassaon, da tane ga ya fèn bina gonjakakè ya; da kli ko̱ on tou da name fèn on ko̱ mi pane dita, da kli sa bi kala ko̱ klime ba goni njoukouli da njou‐sèra manguèl an koukoula aïn.

¹⁴ Mono kli on ko̱ sa baï on kli to̱ko̱ ko̱ kli nza koukoula baï akli fèn kli.

¹⁵ Ka babaï tokoré klime bi hang kli toul koukoula on ko̱ kli yèng jinguèl, kli jing mboro baï féra.

¹⁶ Da kassénaï on kli ji guèl ko̱ bèl honta ko̱ mi sa an nonkala, baï on chonron tane sé Ouone baï kli ya, ko̱ klime di nè ba Ouone akli, baï kè mosso loukou pou a kli tou.

¹⁷ Ka mboro tounassaon mi ko̱ Ouone lé Abraham, da kè hi Isaac, mahana ka sacrifice, ii, kè on ko̱ jing bina gonjaka ka jangnandaï hi pomboï goune nè mahana ka sacrifice.

¹⁸ Ba kè on ko̱ Ouone mi sa baï nè jinguèl: Yé mè di mèrèn no ka ba mbora Isaac.

¹⁹ Kè kèrè ka laou‐è Ouone ma baï tomna nè, tongna an wora houli; da an guèl on kè féré jing Isaac kéng, mahana ka njoukou on ko̱ mi tome an wora houli.

²⁰ Ka mbora tounassaon mi Isaac same Jacob da Ésaü, baï toul fèn on ko̱ nding baï guina.

²¹ Ka mboro tounassaon mi ko̱ Jacob ko̱ kè hèdi houl, same goundi a Joseph mbéo mbéo, da hiouna Ouone, kè ékéré monè toul ndoundou nè.

²² Ka mboro tounassaon mi ko̱ Joseph ko̱ kè hèdi houl, kè sa toul séna a goundi a Israël, da kè sa bi njaka kli toul hourou monè.

²³ Ka mboro tounassaon mi ko̱ Moïse, ko̱ kè tèn, ma nè da baba nè mi mou nè féou saï, baï ko̱ kli ko̱ nè ba bèla goune, da kli tane ga ngou waou njaka nanjoukaou ya.

²⁴ Ka mboro tounassaon mi ko̱ Moïse, ko̱ kè hon tou, kè ji an klime di ling‐è ba goune a goune waïn a Pharaon ya.

²⁵ Kè ji gongna to̱ko̱nassé nyèta jing njoukouli a Ouone ta yana jangnandaï a békéfèn ka name païn,

²⁶ an nonè kè ko̱ poukouna on ko̱ klime poukou Christ ba loukou nguèra ta nguèra a Égypte, baï kè voro toul ndo̱ko̱li on ko̱ kè ma jing.

²⁷ Ka mboro tounassaon mi ko̱ kè yèng pou Égypte, kè tane ngou waou hèrè a nanjoukaou ya; baï ko̱ kème ba pouta, ka ko̱ kè on ko̱ njoukou mi ko̱ ya.

²⁸ Ka mboro tounassaon Moïse mi mosso Pâque da wèn séme, mono on ko̱ ange a houl mi gui baï ina boutaïn goundi a Israël, tane ma baï dana kli ya.

²⁹ Ka mboro tounassaon mi ko̱ kli ta loukou mbi Rouge, mahana ka ho̱ko̱na guèl, fèn on ko̱ njou‐pou Égypteli mi lé baï ndingnakè mi ko̱ kli hou an bilkè.

³⁰ Ka mboro tounassaon mi ko̱ hila a Jéricho lé koukoula, da afal ko̱ njoukouli sé gui ki rou name difala‐séré.

³¹ Ka mboro tounassaon mi ko̱ Rahab waïn‐maïn tane ga hou jing njoukouli ko̱ nding ka ndouri ya, baï ko̱ kè ya njou‐ndélali ka go̱ro̱ iki.

³² Da mè sa ba fèn ba aféké lé? Baï l’heure tiya baï ni baï sana toula Gédéon, da Barak, da Samson, da Jephthé, da David, da Samuel, da prophèteli.

³³ Ko̱ ka mboro tounassaon mi ko̱ kli gnèrèn bilkaouli nyèta jing njèran, kli nding fèn guédék, kli jing bina gonjaka, kli tou njaka a mamouli.

³⁴ Kli i njèran a hèlè, kli pènrèn sél gamba, kli pou guèl on ko̱ kli tane njèrèn ya, kli njèrèn jing rouna béré, kli ni tourougouli a goni njoukouli.

³⁵ Waïnli jing houl aklili ka mboro tomnahoulkèli; da kli wan afékéli jing to̱ko̱nassé baï ko̱ kli tane ko̱ lénabèl mapélékè ya, mono on, an klime ma baï jingna tomnahoulkèli ko̱ bèl honta.

³⁶ Da mi nza afékéli ka mboro gaïna kli, ka jo̱ kli jing baraza, ii, on ko̱ mi ta ka yèng kli an bil sal réme da jo̱bo̱ kéng.

³⁷ Kli wou kli ka kone, ka koung mone kli jing raka soudou, soudou, ka mong kli, ka i kli jing gamba, kli sé guèl hanali ka bou ga a badouali, da ga a halali, ka kaou bo̱on da mi ko̱ nding fèn sènafèn jing kli, ka nding bèlya jing kli.

³⁸ Kli on ko̱ njou‐koukoulali tane mapélékè jing kli ya, kli sèrè maï maï sé woropa da loukou souraguèli, da kli ri bil kouli da lo̱ko̱ koukoula.

³⁹ Da kli on bon ko̱ mi sa bèla bongbaï akli baï tounassaon akli, yé kli jing fèn bina gonjakakè ya.

⁴⁰ Baï ko̱ Ouone mi mosso fèn aféké bèl honta baï na, mono on, tokoré name tiya kli ma gui guédék bon ya.