Galateli 5 - Féké Testament 1947

¹ Christ mi sél sal guèfal a sola tou, baï séna ka laou na. Mono on oui kaou bouta jing séna ka laou on, oui yèng an hola mi ki wili oui ba aféké mahana ka koï ya.

² Mono, mè Paul mè sa hi oui, tokoré ouime i gassa oui tane ma baï yana fèna gounfènakè an ndo̱ka Christ ya.

³ Ka babaï mè sa ba aféké toula njoukouli on bon ko̱ mi i gassa, dadaon baï kli baï bouna fal guingna bon.

⁴ Oui wal jing Christ tou, oui bon on ko̱ mi nza baï guina guédék ka mboro guingna; oui yèng mboro ndingna mbo̱l tou.

⁵ Baï ko̱ ka mbora Esprit fènè mbo̱l tounassaon, name voro oliya a guédék.

⁶ Baï ko̱ ka bila Christ‐Jésus ina gassa maléba ina gassa ya, mi na bo̱on, da tounassaon on ko̱ mi nding an bila ka mboro sénahang ba gba fèn ka babaï.

⁷ Jinguèl oui ngou bèlta, da guème ko̱ dèn mboro hi oui baï an ouime la babaï ya lé?

⁸ Mongnafèn on mi tane ga gui ka nona kè on ko̱ mi di oui ya.

⁹ Fèn vouna mapa gounfènakè on da vou mapa bon.

¹⁰ Mè bi hang ni toul baï ka bila Nanjou, ko̱ yé oui ma kèra aféké katoul tiya. Da kè on ko̱ mi mong oui, yé kè ma jing barabaï on bi toulè, tongna kong kè ba guè.

¹¹ Da mè yindi tokoré mème pane sana mboura ina gassa, baïfèn da to̱ko̱nassé mi pane guina moni kassénaï lé? Mono on di‐croix on tane ti ba fèn bèna ba aféké ya.

¹² Mè ji an kli on ko̱ mong oui mi i mone kli fèn kli.

¹³ Yindi, Ouone mi di oui baï séna ka laou tou, da oui nding séna ka laou abaï ka ba mboro baï yana ka naïn‐mone ya, da ka mboro sénahang oui nding bakara jing hana.

¹⁴ Baï ko̱ bong guingna bon mi wéré nonkè bi kala jing baïnjaka mbéo mini: Dadaon, mo sé hang a ba no mahana ka mono fèno.

¹⁵ Da tokoré ouime noung hana da son hana, oui pèng mone baï bèlta baï an oui mi bèngnèrèn hana fèn baï kon ya.

¹⁶ Da mè sa mono: Oui sé ka mbora Esprit, da yé oui tane ma baï bouna fal nzala naïn‐mone ya.

¹⁷ Baï ko̱ nzala mi i naïn‐mone baï pongna Esprit, da nzala mi i Esprit baï pongna naïn‐mone. Baï ko̱ kli séré bon mi pong hana; mono fèn on ko̱ oui mi ji baï ndingnakè, oui tane ma baï ndingnakè ya.

¹⁸ Da tokoré Esprit mi miri oui, oui tane ti an bo̱ko̱ guingna ya.

¹⁹ Da pina a naïn‐mone mi wéré bi kala tou, ko̱ ba ndingna rome, ladidifèn, nzala naïn‐mone,

²⁰ pou?-?nagala, halagala, jèknafèn, wanahana, fanahang, hèrè, njakana walahana, lana tang baïli,

²¹ sènafèn, ina njoukou, houl houl vone, guèl gara, tèn gara fènli ko̱ mahana ka on. Toul fènli on bon ko̱ mème wara oui kassénaï ka kome mahana ko̱ mème ti wara oui ka tang ambèl, njoukouli on ko̱ mi nding fèn aïnli, yé kli ba yana pélé bilkaou a Ouone tane tiya.

²² Da léna a Esprit ba, sénahang, jangnandaï, go̱ro̱ iki, kaouna vomboï, pan bil, bèla go̱ro̱, laïnabi,

²³ bouna mone koukoula, tèn njèran baï pongna nzala naïn‐mone; guingna tane ga pong fèn aïnli ya.

²⁴ Da kli on ko̱ ba a Christ‐Jésus mi bara naïn‐mone kli bi di‐croix tou, jing nzala naïn‐mone akli tèn jinafèn aklili.

²⁵ Tokoré name yan ka mboro Esprit, dadaon name ndé sé ka mboro Esprit kéng.

²⁶ An name nza baï joungna mona ya, ka mong hana, da fa hang kon toul hana ya.