Galateli 4 - Féké Testament 1947

¹ Da mème sa on ko̱ njou‐yana pélé mi pane ba goune, kè mabahana ka koï tongna ko̱ kè ba nanjou fènli bon;

² da kème kaou bo̱ko̱ ndo̱ka njou‐pèngna nèli da njou‐onatoulèli, bo̱l tèn ko̱ name on ko̱ baba nè kèn hi nè mi mabongkè tou.

³ Mono on, na kéng, ko̱ name pane ba goundi, na tèn koï an bo̱ko̱ titili fènli an koukoula aïn.

⁴ Da ko̱ namkè mi mabongkè tou, Ouone mi pi Goune nè gui koukoula ko̱ waïn mi mboung nè, da kème tèn an bo̱ko̱ guingna.

⁵ Mono on, baï an kème cho kli on ko̱ mi kaou an bo̱ko̱ guingna, an name ya guèl tèna dodok goundi.

⁶ Da baï ko̱ oui ba goundi, Ouone mi pi Esprit a Goune nè kon bil go̱ro̱ na bon tou, on ko̱ mi hidifèn guè siya: Abba! Baba!

⁷ Mono baï on, mo tane ti ba koï ba aféké ya, da ba goune; da tokoré mo ba goune, mo ba goune yanafèn pélé kéng mbo̱l Ouone.

⁸ Da ka tang ambèl ko̱ oui mi tane ga tou Ouone ya, oui ba koï a ouondi on ko̱ mi tane ti ba ouondi ka bo̱ko̱di klili ya;

⁹ da kassénaï ko̱ oui mi toutou Ouone, maléba on mi bèlta guèbambèl ko̱ Ouone mi toutou oui, baïfèn da oui mi ji féra fal, baï séna fal titili fènli on ko̱ tane ti njèrèn ya, ko̱ ba foïna fènli, da oui ji baï kaouna koï a kli ba aféké lé?

¹⁰ Oui bou fal namli, da féouli, da zali, da kaïli, tèn sakali!

¹¹ Waou mi i mi baï toul baï, ko̱ touya pina on ko̱ mème nding jing oui mi na bo̱on.

¹² Mè sa jo̱jo̱ baï, yindi, oui gui mahana ka mè, baï ko̱ mème ndé mahana ka oui kéng.

¹³ Oui tane ga nding fèn bèlya jinguèl jing mi ya. Da oui toutou ko̱ mème sa mboura bèlabaï hi oui ka titilikè jing hèfèrè naïn‐mone.

¹⁴ Da fèn on an naïn‐moni ko̱ ba fèn yaknafèn jing oui, oui jèk ka pong mi ya; da oui pame mi mahana ka ange a Ouone da mahana ka Christ‐Jésus.

¹⁵ Jangnandaï abaï on ko̱ oui mi jang an hane kassénaï lé? Baï ko̱ mème sa bongbaï toul baï, ko̱ tokoré oui mi mabongkè, yé oui ti téne tènrèn none baïli ka hi mi tou.

¹⁶ Da mono on kassénaï mème tèn ba bakèo̱ jing oui baï ko̱ mème sa babaï hi oui tou lé?

¹⁷ Sèna none akli on ko̱ mi nza oui tane ba mboro bèlta ya, da klime ji baï dèna mboro hi oui baï guina moni, baï an oui mi nza kli.

¹⁸ On bèlta baï an none baï mi sènta guèbassoko toul fènli on ko̱ bèlta, da tane ti ba baï ko̱ mème kaou jing oui ka ho̱kè ya.

¹⁹ Lélé goune nili, mè jing to̱ko̱nassé ba aféké mahana ka an toul saou bo̱l tèn ko̱ Christ mi gui bèlta an bil baï da,

²⁰ da mème ji kaouna jing oui kassénaï, ka komo njaka ni, baï ko̱ go̱ro̱ ni mi dou maïya baï toul baï.

²¹ Oui sa hi mi, oui ko̱ ji baï kaouna bo̱ko̱ guingna, oui lala bongbaï guingna ya lé?

²² Baï ko̱ mi dé, ko̱ Abraham mi mboung goune wonronli séré, aïn mbéo jing waïn koï, da kènkè jing waïn gangna.

²³ Da goune on ko̱ ba waïn koï mi mboung nè, kème mboung nè ka njèran naïn‐mone, da goune on ko̱ waïn gangna mi mboung nè, kème mboung nè ka mboro bina gonjaka.

²⁴ Fèn aïnli ba goulébaï; baï ko̱ waïn aïnli séré ba baï bina gonjaka an none hana séré. Aïn mbéo ba an souraguèl Sinaï ko̱ mi mboung goune koïli, ling a waïn on ba Agar,

²⁵ baï ko̱ Agar ba souraguèl Sinaï an guèl Arabie, da on mi mahana ka Jérusalem kassénaï, baï ko̱ kè jing goune nèli mi tèn koï.

²⁶ Da Jérusalem an siya ba pou gangna, kè on ko̱ ba ma na,

²⁷ baï ko̱ mi dé: Jangndaï mo on ko̱ ba waïn tou ka mboung ya! Mo wan njaka guè siya ka jangndaï, mo ko̱ mi tane séta an toul saou ya! Baï ko̱ goundi a waïn on ko̱ wa nè mi ni nè tou, mi ro̱ko̱ maïya, Ta toul a waïn on ko̱ mi kaou jing wonron.

²⁸ Da yindi, oui ba goundi a bina gonjaka mahana ka Isaac.

²⁹ Da mahana on jinguèl, goune on ko̱ mi tèn ka mboro naïn‐mone mi to̱ko̱ssé hi goune on ko̱ mi tèn ka mbora Esprit, mi ndé mahana on kassénaï kéng.

³⁰ Da Takarata a Ouone mi sa ba bèn lé? Oui ni waïn koï jing goune nè, baï ko̱ yé goune a waïn koï ma ya fèn pélé jing goune a waïn gangna ya.

³¹ Mono on yindi na tane ti ba goundi a waïn koï ya, da ba a waïn gangna on.