Galateli 3 - Féké Testament 1947

¹ O njou‐Galateli ko̱ nding fèn ngawa! Guème ko̱ mong oui afal on ko̱ houl a Jésus‐Christ an di‐croix mi tèn none baï tou lé?

² Mè ji an ouime sa bongkè ka njaka baï toul fèn aïn mbéo bo̱l hi mi: Oui ya Esprit ka mboro ndingna pina a guingna jinguèl, maléba ka ba mboro lana sana mboura tounassaon lé?

³ Oui ba ngawa mahana ka on lé? Ko̱ oui mi tissaon ka mbora Esprit jinguèl, da kassénaï oui gui guédék ka mboro naïn‐mone baï lé?

⁴ Da oui mi to̱ko̱ssé nyèta baï toul fènli on bo̱on lé? Tokoré fèn on mi na bo̱on ka babaï.

⁵ Mono on kè on ko̱ mi hi Esprit hi oui tou, da kème nding njèran fènli nyèta an woro baï kème nding on ka mboro ndingna pina guingna, maléba ka ba mboro lana sana mboura tounassaon lé?

⁶ Mono, mahana ko̱ Abraham mi la Ouone bi laou‐è, da Ouone mi kèn tounassaon amè kon toulè mahana ka guédék.

⁷ Mono, oui toutou njoukouli on ko̱ mi kan tounassaon ba goundi a Abraham ka babaï.

⁸ Da baï ko̱ Takarata a Ouone mi toutou ka tang ambèl, ko̱ Ouone mi ji ndingna mèran gentili gui guédék ka mboro tounassaon, mono on, mi ti sa mboura bèlabaï hi Abraham ka tang ambèl, ka sa: Ka mboro no yé mè ma same mèrèn pime pouli bon!

⁹ Da mono on samnafèn ma gui mona njoukouli on ko̱ mi kan tounassaon mahana ka Abraham, kè on ko̱ ba lo̱do̱k.

¹⁰ Baï njoukouli on bon ko̱ mi kaou bo̱ko̱ pina a guingna mi kaou bo̱ko̱ poukounafèn, baï ko̱, mi dé: Poukounafèn mana toula njoukouli on bon ko̱ mi pènrèn fèn mbéo baï ndingnakè ko̱ mi dé an bil takarata guingna.

¹¹ Da name toutou ko̱ njoukouna mbéo mi tane ga gui guédék an nona Ouone ka ba mboro guingna ya ba babaï, baï ko̱ mi dé: Yé njou‐guédék ma yan mbo̱l tounassaon.

¹² Da guingna tane ti ba a tounassaon ya, da mi sa njoukouna ko̱ mi nding fèn aïnli bon, yé kè ma yan mbo̱l ndingnakè.

¹³ Christ mi cho na an bo̱ko̱ poukounafèn an guingna tou, ko̱ kè fènè mi tèn ba fèn poukouna baï toula, baï ko̱ mi dé: Poukounafèn mana an toula njoukouli on bon ko̱ mi haka an toul di.

¹⁴ Mono on, an samnafèn a Abraham mi gui toula mèran gentili ka bila Christ‐Jésus, an name jing bina go̱njaka a Esprit fènè ka mboro tounassaon.

¹⁵ Yindi, mè sa ka mbora njoukouli, da tokoré baï bina gonjaka an none hana a njoukouli mana, da klime ji bo̱ko̱kè jing hana ka babaï, njoukouna ba sélakè kon tane tiya, maléba kèna aféké kon toulkè tiya.

¹⁶ Da Ouone mi bi gonjakè hi Abraham tèn mèrèn nè. Kè tane ga sa on ya: Jing mèrènkèli, mahana ko̱ kème sa hi afékéli nyèta, da kème sa hi ba mèrèn mbéo bo̱l ko̱ ba Christ.

¹⁷ Da mème sa fèn aïn: Bina gonjaka an none hana on, ko̱ Ouone mi pou bi hi njoukouli ka tang ambèl tou, an mi tane na bo̱on ka mboro guingna ya, on ko̱ mi gui afal ma saka ténakè‐nèng‐faltoulkè‐bongkè‐saï, da mono on an guingna mi tane ma baï tana toul bina gonjaka ya.

¹⁸ Baï tokoré yanafèn pélé on mi gui ka mboro guingna, on mi tane ti ba bina gonjaka ba aféké ya, da Ouone mi hi Abraham ka ba mboro bina gonjaka.

¹⁹ Da mono on guingna ba fèn lé? Ouone mi hi on kon toulkè baï toul séla guingna békéfèn bo̱l tèn ko̱ mèrènkè mi gui, kè on ko̱ Ouone mi bi gonjaka hi nè tou, da mi koung guingna ka mbora angeli an ndo̱ka njou‐vonabaï.

²⁰ Da njou‐vonabaï mi tane ti ba njou‐vonabaï a njoukou mbéo ya, da Ouone ba mbéo.

²¹ Mono on guingna mi pong bina gonjaka a Ouone dé? Tane ti on ya. Da tokoré Ouone mi koung guingna on ko̱ ma baï hina yana, mono on, ka babaï njoukouli ti gui guédék jinguèl ka mboro guingna tou.

²² Da Takarata a Ouone mi gna fènli bon bi bo̱ko̱ békéfèn tou. Mono on, kli on ko̱ mi tou saon ma baï jingna bina gonjaka on ko̱ mi gui ka mboro tounassaon ka bila Jésus‐Christ.

²³ Da ambèl ko̱ tounassaon mi gui, name kaou jo̱bo̱ an bo̱ko̱ guingna, ko̱ mi gna na baï vora tounassaon on ko̱ ma wéra nonkè bi kala afal da.

²⁴ Mono baï on guingna ba njou‐pèngna a goundi, baï mira na baï kana mona Christ, an name gui guédék ka mboro tounassaon.

²⁵ Da kassénaï ko̱ tounassaon mi gui tou, na tane ga kaou bo̱ko̱ ndo̱ka njou‐pèngnakè ba aféké ya.

²⁶ Baï ko̱ oui bon ba goundi a Ouone ka mboro tounassaon ka bila Christ‐Jésus.

²⁷ Baï ko̱ oui bon ko̱ mi ya baptême ka bila Christ, oui bou Christ tou.

²⁸ Da ka bilè, Juif maléba Grec tane tiya, koï maléba goune gangna tane tiya, wonron njoukou maléba waïn tane tiya, baï ko̱ oui bon ba njoukou mbéo bo̱l ka bila Christ‐Jésus.

²⁹ Da tokoré oui ba a Christ, mono on oui ba mèran Abraham, da njou‐yana péléli ka mboro bina gonjaka.