Éphésienli 6 - Féké Testament 1947

¹ Oui goundi, oui la baï a baba baïli ka bila Nanjou baï ko̱ on mi na guédék.

² Mo dik baba no da ma no, on ba titili bina baïnjaka guingna a bina gonjaka.

³ Mono on mo ma kaou bèlta, da mo ma kaou bongkè dita an koukoula.

⁴ Da oui babali, oui tane zara goune baïli jing béké baïli an hèrè mi tane ba kli ya; da mbé kli ka wara kli ka to̱ko̱ mboro hi kli ka mbora Nanjou.

⁵ Oui njou‐bakarali, oui la baï akli on ko̱ ba nanjou baïli ka mboro naïn‐mone jing ngouna waou tèn to̱na mone, da oui nding jing laou baï ka babaï, mahana ka baï toula Christ,

⁶ oui nding ti ka ba baï none kli ya, baï bina wélé toula njoukouli, da oui nding mahana ka njou‐bakarali a Christ ko̱ mi kaou mara fal toula Ouone ka laou kli fèn kli.

⁷ Oui nding bakara hi kli baï ko̱ mi na hang baï bèlta mahana ka baï toula Nanjou, da tane ti ba baï toula njoukouli ya,

⁸ baï ko̱ ouime toutou fèn on ko̱ bèlta ko̱ njoukouli mane mbéo mbéo bon mi nding, yé kè ma kaïn féré jing fèn on ko̱ na ndo̱ka Nanjou, tongna kè ba koï maléba goune gangna.

⁹ Da oui nanjouli, oui nding mabahana hi kli, da oui yèng njaka wonron baï ko̱ oui toutou kè on ko̱ ba Nanjou akli tèn abaï kéng, makaou an nonkala, da kème tane dik njoukouli ta hana ya.

¹⁰ Da mono, gara baï on ko̱ pane, mone baï mi pou oui ka bila Nanjou, jing mboro bassana njèran nè.

¹¹ Oui bou fèn béré a Ouone bon, baï an ouime o pouta baï pongna cho̱kna bounabong a zabolo.

¹² Baï ko̱ name tane rou béré jing séme tèn naïn‐mone ya, da jing ba gangna pouli da jing njèranli, da jing zaworoli ko̱ mi na gangna an yilime on an koukoula aïn, tèn jing esprit wilkè a békéfèn an guèl an siya.

¹³ Mono baï on, oui fan fèn béré bon a Ouone baï an ouime o siya pou wang ka béké namli, ka o pou wang afal ko̱ ouime ta toulkè.

¹⁴ Mono on, oui o pouta; oui gna babaï ki kèrè baï, ka bou yé goudi a guédék.

¹⁵ Oui bou sabo̱ko̱ jing sèna none to̱ko̱na bèlabaï a go̱ro̱ iki.

¹⁶ Da ta toul fènli on bon, oui ya yé tounassaon, da jing fèn on yé oui ma baï ina ndo̱ra ko̱do̱ro̱ hèlè bon a béké bakèo̱.

¹⁷ Oui ya mbélé a yana‐baï‐toul da gamba a Esprit fènè ko̱ ba baïnjaka Ouone.

¹⁸ Jing hiouna Ouone ka sana jo̱jo̱ nè oui hiou nè ka bila Esprit guèbassoko. Mono on, oui zèng mboro jing laïnabi ka sa jo̱jo̱ Ouone nyèta baï toula njou‐lana‐bilaouli bon.

¹⁹ Da oui ndé hiou Ouone kon touli kéng, baï an mème sa baï ka mboro mboura njaka ni, baï to̱ko̱na didissi fèn a bèlabaï ndo̱t tane waou.

²⁰ Baï on mi ko̱ mè ba njou‐mboro‐pina an bil sal rémli. Mono on, mè ma baï sana baï ndo̱t tane waou ko̱ mi ma an mème sa.

²¹ Da baï an ouime ndé tou baï nili kéng, tèn fèn on bon ko̱ mème nding Tychique yine on ko̱ mème sé hang‐è ta, da ko̱ ba lodok njou‐bakara ka bila Nanjou, yé kè ma to̱ko̱ bong fènli bon hi oui.

²² Kè on ko̱ mème pi nè guè mone baï, baï toul baï on, mono on an ouime tou bong baï na, da baï an kème wara oui an go̱ro̱ baï mi vo.

²³ An Ouone Baba da Nanjou Jésus‐Christ mi hi go̱ro̱ iki da sénahang jing tounassaon hi yindi!

²⁴ An ndingna mbo̱l mi na jing kli bon ko̱ mi sé hang a Nanjou na Jésus‐Christ, jing sénahang on ko̱ mi ba poumna tane tiya!