Éphésienli 5 - Féké Testament 1947

¹ Mono on, oui nding mahana ko̱ Ouone mi nding, mahana ka goundi on ko̱ kème sé hang baï ta;

² da oui sé jing sénahang, mahana ko̱ Christ mi ndé sé hang, da kème hi monè fènè baï toula, mahana ka offrance da sacrifice hi Ouone, ko̱ baïnkè mi fon bèlta.

³ Da oui tane nding rome tèn ladidifèn hana ya, maléba fanahang ya, da oui lang ling a fèn on guè woro baï ya, mahana ka on ko̱ mi mabong a njou‐lana‐bilaouli,

⁴ da oui tane la fona baï ya, maléba lana baï ngawa ya, maléba lana baï sakana hana ya, fènli on ko̱ tane mabongkè; da dadaon oui la ba kaouna koukoula hi Ouone.

⁵ Baï on oui toutou tane so ya, njou‐ndingna maïn, maléba njou‐dakame, maléba njou‐fana hang, kè on ko̱ ba njou‐téna ndamli, njoukouli on ba yana pélé bilkaou a Christ tèn a Ouone tane tiya.

⁶ Oui yèng an njoukouna mbéo mi tane mong oui jing baïnjaka bo̱on ya; baï ko̱ toul fèn aïnli hèrè a Ouone mi lé toula goundi on ko̱ mi fa baï.

⁷ Mono on, oui tane gui ba ndo̱ko̱ba jing kli ka fèn on ya.

⁸ Baï ko̱ jinguèl oui ba yilime, da kassénaï oui ba takanafèn ka bila Nanjou. Oui sé mahana ka goundi a takanafèn!

⁹ Baï ko̱ léna a takanafèn ba bila bèlafèn bon, da guédék tèn babaï bon,

¹⁰ ko̱ foul fal fèn bon ko̱ mi mapélékè an nona Nanjou;

¹¹ da oui tane vo ka go̱ro̱ mbéo jing pina a yilime, ko̱ mi tane lé lénakè ya, da ta on oui sa kon toul kli.

¹² Baï ko̱ fèn on ko̱ klime nding ka foli an bo̱ko̱ yilime ba fèn chonron baï sanakè;

¹³ da sana kon toul fèn bon mi wéré nonkè bi kala jing takanafèn, baï ko̱ fèn on ko̱ mi bi saonkè kala ba takanafèn.

¹⁴ Baï toul baï on kème sa: Mo tome, mo on ko̱ na name, Mo tome an wora houli, Da yé Christ ma taka guèl an toulo̱.

¹⁵ Mono on, oui ènrèn mone baï fèn baï bèlta ka mboro séna abaï, ka tane sé mahana ka njou‐ngawali ya, da mahana ka ba njou‐cho̱knali.

¹⁶ Oui pame name abaï, baï ko̱ namli on ba békékè.

¹⁷ Mono baï toul baï on, oui tane kaou mahana ka èna ya; da oui tou fèn on nguite ko̱ mi na mara fal toula Nanjou.

¹⁸ Oui tane hou houl vin ya, baï ko̱ békéfèn mana jing rou. Da oui mba ka Esprit.

¹⁹ Oui sa jing hana ka psaumli da di sing a Ouone tèn sing a Esprit, ka di sing long ka laou baï hi Nanjou.

²⁰ Oui kaou koukoula baï toul fènli bon guèbassoko hi Ouone Baba, ka bil ling a Nanjou na Jésus‐Christ.

²¹ Oui kaou bo̱ko̱ ndo̱ko̱ hana jing ngouna waou nona Christ.

²² Oui waïnli, oui kaou bo̱ko̱ ndo̱ka dodok wa baïli mahana ka ba Nanjou;

²³ baï ko̱ wa ba toula waïn, mahana ko̱ Christ ba ndé toula église kéng. Mono on ko̱ kè fènè ba njou‐yana‐baï‐toul a kli‐mone on.

²⁴ Da mahana ko̱ église mi kaou bo̱ko̱ ndo̱ka Christ, mono on an waïnli mi kaou bo̱ko̱ ndo̱ka wa klili jing fènli bon.

²⁵ Oui wa waïnli, oui sé hang toula waïn abaïli, mahana ko̱ Christ mi sé hang toula église ka hi monè fènè baï nè,

²⁶ baï an kème wal église bi baï a Ouone baï ko̱ kème tourou nè ka mbi ka mboro baïnjaka fènè tou.

²⁷ Mono on, kè ma ya église guè monè fènè jing jonafèn, tane bila, da tane rèna mone, tèn gara fènli on tane ti jing rou ya, da ba église ko̱ mi tang fofoto da ka rongo.

²⁸ Mono on, dadaon an wa waïnli mi sé hang dodok waïn kli mahana ka dodok kli‐mone kli fèn kli. Njoukou on ko̱ mi sé hang dodok waïn nè, kème ndé sé hang monè fènè kéng.

²⁹ Baï ko̱ njoukouna mbéo mi tane ga jèk dodok naïn‐monè fènè ya; da kème mbé nè ka pèng nè, mahana ko̱ Jésus mi ndé nding baï toula église kéng,

³⁰ baï ko̱ na ba fèn mondi a kli‐monè.

³¹ Mono on yé njoukou ma yèng baba nè tèn ma nè da ba mbo̱lo̱ jing waïn nè, da kli séré bon ma tèn ba naïn‐mone mbéo bo̱l.

³² Didissi baï on ba loukoukè; da mème sa baï on toula Christ kira église.

³³ Da oui mane mbéo mbéo bon oui sé hang dodok waïn baïli, mahana ka mone baï fèn baï, da dadaon an waïn mi dik wa nè.