Éphésienli 4 - Féké Testament 1947

¹ Mono on, mè ko̱ ba njou‐jo̱bo̱ ka bila Nanjou, mè sa jo̱jo̱ baï nyèta an bong séna abaï mapélékè baïnjaka on ko̱ kème di oui jing rou,

² jing go̱ro̱ kaouna lome da bouna mone baï guè koukoula, tèn vonamboï, oui pan mone baï jing hana ka mboro sénahang,

³ oui nza mborokè baï kaouna jing go̱ro̱ mbéo a Esprit jing sal go̱ro̱ iki on ko̱ mi gna oui jing hana.

⁴ Kli‐mone ba mbéo bo̱l, da Esprit mbéo bo̱l, mahana ko̱ mi ndé di oui jing oliya mbéo kéng ka baïnjaka on ko̱ kème di oui.

⁵ Nanjou ba mbéo bo̱l, tounassaon ba mbéo bo̱l, baptême ba mbéo bo̱l,

⁶ da Ouone mbéo bo̱l, kè ba Baba a fènli bon, kè on ko̱ mi o toul fènli bon, da an woro fènli bon, tèn an bil fènli bon.

⁷ Da mi hi ndingna mbo̱l mane mbéo mbéo bon hi na ko̱ mi mabongkè jing léna toul ndo̱ko̱ a Christ.

⁸ Baï toul baï on, kème sa: Ko̱ kème guè séna nonkala, kè ya fèn njèran a jo̱bo̱, ka sé jing rou mahana ka koï, Da kème hi toul ndo̱ko̱li hi njoukouli.

⁹ Da, baï on: Ko̱ kème hé sé guè siya, baï aïn mi sa ba fèn lé? Baï on mi sa kème ndé diri sé guè tiya an bo̱ko̱ koukoula ambèl kéng ya lé?

¹⁰ Kè on ko̱ mi diri, ba kè on ko̱ mi ndé sé guè siya ta toul nonkalali bon, baï an kème mba fènli bon.

¹¹ Da kème hi hanali ba njou‐mboro‐pinali, da hanali ba prophèteli, da hanali ba njou‐sana bèlabaïli, da hanali ba pasteurli tèn njou‐to̱ko̱nafènli,

¹² baï mossona njou‐lana‐bilaouli guédék, baï ndingna bakara to̱ko̱na fènli da baï pouna kli‐mona Christ,

¹³ bo̱l tèn ko̱ na bon mi kan ndo̱ko̱ba tounassaon mbéo bo̱l, da tounafèn a Goune a Ouone bo̱l tèn ko̱ name tèn ba pongna njoukouli mabong fèn léna hona Christ jing mbanafèn nè.

¹⁴ Mono on, an name tane kaou mahana ka goundi ba aféké ya, ko̱ koukouna to̱ko̱na fènli toutoul toutoul bon mi lang na kan kini kan soko, ka fan na mahana ka fèn on ko̱ na none mbi ka mboro cho̱kna bounabong mongnafèn a njoukouli, ko̱ mi mong fèn ka mboro wo̱ko̱li.

¹⁵ Da baï ko̱ name sa ka babaï jing sénahang, na ma hon jing fènli bon ka bila kè on ko̱ ba onatoul ko̱ ba Christ.

¹⁶ Ko̱ mi hi kli‐mone bon baï dossina bi hana ka mborokè, da mara pou bi mana da baï jingna njèran ka mboro hourou mone mana mbéo mbéo bon, mabong pina a fèn mondi mbéo mbéo bon, baï an kli‐mone mi hon ka pou bi fènè jing sénahang.

¹⁷ Mono fèn on ko̱ mème sa, da mème sa bongbaï ka bila Nanjou an ouime tane sé mahana ka gentili ba aféké ya, ko̱ klime sé jing béké kèrafèn bo̱on an laou kli.

¹⁸ Yilime mi fo̱ko̱ro̱ cho̱kna kli, da klime wal mone kli jing yana a Ouone, baï ko̱ laou kli mi tane tou fèn ya, da go̱ro̱ kli mi na wang,

¹⁹ baï ko̱ chonron mi tane ga sé kli ba aféké ya, klime hi mone kli bi ndingna nzala naïn‐mone, da baï ndingna ladidifènli bon, baï ko̱ fanahang fèn mi i kli.

²⁰ Da on jinguèl, oui tane ga tou Christ mahana ka on ya.

²¹ Da tokoré ouime la nè ka babaï tou, da kème to̱ko̱ hi oui tou, mabahana ko̱ babaï mi na ka bila Jésus,

²² oui njomo tang bong séna abaï, tang njoukou on ko̱ mi bo jing nzala mongnafèn,

²³ da oui féré ka tèn fékékè ka bil a esprit laou‐tounafèn abaï,

²⁴ da oui bou féké njoukou, kè on ko̱ mi mosso mahana ka Ouone fènè jing ndingna guédék, jing tangna go̱ro̱ fofoto a babaï.

²⁵ Mono baï on, oui yèng bana wo̱ko̱, da oui mbéo mbéo bon mi sa baï ka babaï jing ba ba nè, baï ko̱ na mbéo mbéo bon ba fèn mondi jing hana.

²⁶ Ko̱ hèrè mi mba oui, oui tane nding békéfèn ya, oui yèng an séssé mi tane ri kon toul hèrè an bil go̱ro̱ baï ya,

²⁷ da an ouime yèng njaka mboro hi zabolo ya.

²⁸ Njoukou on ko̱ mi ri fèn dadaon an kème tane ri fèn ba aféké ya, da dadaon kème nding bèla pina jing ndo̱kè. Mono on, an kème jing fènli bi ndo̱kè baï hina njoukou on ko̱ fèn mi nak nè.

²⁹ Oui yèng an fona baïli mi tane tèn kala an njaka baï ya, da oui sa ba bèla baïli ko̱ ma baï pouna mona njoukou on ko̱ fèn mi nak nè da an ouime hi ndingna mbo̱l hi kli on ko̱ mi la baï on.

³⁰ Oui tane ho̱ko̱ laou a Saint‐Esprit a Ouone ya, da ko̱ ka bila kè on ko̱ mi baka oui bi jing fèn mbo̱la bo̱l tèn name chonakè.

³¹ Da oui yèng bina gnana bo̱ko̱ bil baï da joungna hèrè, hèrè, da fanabaï, da poukounafèn tèn mèrèn Sènafènli bon mi ourou guèfal an woro baï.

³² Oui kaou pan bil jing hana ka bèla go̱ro̱, ka yèng bi mboro békéfèn jing hana, mahana ko̱ Ouone mi ndé yèng bi mboro békéfèn baï kéng ka bila Christ.