Colossienli 1 - Féké Testament 1947

¹ Paul, njou‐mboro‐pina Christ‐Jésus ka mboro kaouna mara fal toula Ouone, da yine na Timothée,

² name pi takarata aïn hi njou‐lana‐bilaouli, da yindi lodok ka bila Christ ko̱ mi bi pou Colosses, Ouone Baba na mi hi ndingna mbo̱l da go̱ro̱ iki hi oui!

³ Name kaou koukoula hi Ouone, Baba a Nanjou na Jésus‐Christ, da name laïbi hiouna Ouone kon toul baï bon,

⁴ baï ko̱ name lala tiri tounassaon abaï ka bila Christ‐Jésus, da sénahang abaï jing njou‐lana‐bilaouli bon.

⁵ Baï oliya on ko̱ mi pèng an nonkalali baï toul baï, ko̱ oui mi lala baïkè jinguèl ka titili baïnjaka babaï a bèlabaï.

⁶ On ko̱ mi gui mone baï mahana ko̱ mi ndé kan mane koukoula bon kéng, da mi lé lénakè ka taïnkon mahana ko̱ mi ndé nding an bil baï kéng, ka titili name on ko̱ oui mi la jinguèl, da tou ndingna mbo̱l a Ouone nguite ka babaï.

⁷ Mahana ko̱ Épaphras mi to̱ko̱ bongkè hi oui, ko̱ ba njou‐ndo̱ko̱ba pina na, ko̱ name sé hang‐è ta, da ko̱ ba njou‐bakara lodok a Christ baï toula.

⁸ Kème ko̱ to̱ko̱ bongkè hi na kéng, sénahang abaï ka bila Esprit.

⁹ Baï on na kéng, ka titili name on ko̱ name la baï on, na laïbi hiouna Ouone ka sa jo̱jo̱ nè baï toul baï, baï an ouime gui mba ka touna nguite, baï kaouna mara fal toulè jing cho̱kna bon tèn tounafèn bon a Esprit,

¹⁰ baï séna ka mboro on ko̱ ma an nona Nanjou, ko̱ mi bi wélé toulè jing fènli bon, da oui lé lénakè jing bèla pina bon, da taïnkon ka mboro touna Ouone.

¹¹ Da oui bon mi pou bi ka njèran bon, ka mboro njèran a jonafèn nè, baï ko̱ oui mi laïbi jing vonamboï ka jangnandaï.

¹² Oui kaou koukoula hi Baba fènè, ko̱ mi mosso na ma baï yana fèn pélé, mahana ka njou‐lana‐bilaouli an bil takanafèn;

¹³ kè on ko̱ mi séla guèfal an bo̱ko̱ njèran yilime tou, da kème mbèkè na bi an bil bilkaou a Goune an sénahang‐è,

¹⁴ an bilè name jing mboro chona na, da yèngna bi mboro békéfèn na.

¹⁵ Kè on ko̱ ba tétéme a Ouone on ko̱ nona njoukou mi ma baï ko̱nakè ya, da ba boutaïnkè a fèn mossona bon.

¹⁶ Baï ka bilè ko̱ mi mosso fènli bon tou, an nonkalali tèn an koukoula, fènli on ko̱ none mi ko̱, da fènli on ko̱ none mi tane ga ma baï ko̱nakè ya, tongna kangala njaka barali, maléba nanjoukaouli, maléba gangna pouli, maléba njèranli. Mi mosso fènli bon ka mboro nè, da fènli bon ba amè.

¹⁷ Kè ba titili fènli bon da fènli bon mi na an guèlkè ka bilè.

¹⁸ Da kè ba toul a kli‐mone a église fènè; kè fènè ba titilikè da boutaïn tomna an wora houli, mono on an kème o toul fènli bon.

¹⁹ Baï on ko̱ bi wélé toula Baba an mbana fènli bon mi bi an bilè.

²⁰ Da mbo̱l kè, kème ji an fènli bon mi kon ndo̱ko̱ fal hana jing nè, baï ko̱ kème hi go̱ro̱ iki tou, ka mboro séme an toul di‐croix nè, da ka mboro amè, tongna fènli an koukoula maléba fènli an nonkalali.

²¹ Da oui ba goni njoukouli da ba bakèlio̱ ka kèrafèn abaïli, an bil béké pina abaïli jing nè ka tang ambèl,

²² da kassénaï Christ mi nding da oui mi kon ndo̱ko̱ fal hana jing nè, ka kli‐mone a naïn‐monè ka mboro houl, baï an kème ya oui guè monè tang fofoto, tane bila da ka rongo.

²³ Tokoré oui mi laïbi pou da kaou wang jing tounassaon, da oui mi tane ga yèng oliya bèlabaï ya, ko̱ oui mi la jinguèl, ko̱ mi sa mbourakè hi njoukouli bon an bo̱ko̱ nonkala baï on, mi ko̱ Ouone hi mi, mè Paul ba njou‐bakara a Ouone.

²⁴ Da kassénaï mè jangndaï an bil to̱ko̱nassé baï toul baï; baï gara fèn on ko̱ mi pènrèn jing to̱ko̱nassé a Christ, mè ya bi naïn‐moni baï toul kli‐monè, on ko̱ ba église fènè.

²⁵ Baï on ko̱ mi nding mi ba njou‐bakara bongbaï, ka mboro onatoul pina a Ouone, ko̱ kème hi mi baï toul baï, an mème sa mboura baïnjaka a Ouone yaïli manguèl bon.

²⁶ Mono didissi baï on ko̱ mi mou ka tang ambèl ka titili sakali bon jing mèran njoukouli, da kassénaï nonkè mi wéré bi kala hi njou‐lana‐bilaou nèli tou,

²⁷ kli on ko̱ Ouone mi ji baï to̱ko̱na nguèra jonafèn a didissi baï on hi kli an woro mèran gentili, mini ko̱ ba Christ an bil baï, oliya jonafèn.

²⁸ Kè mono ko̱ name sa mboura toulè, ka wara njoukouli bon, da to̱ko̱ saon baï hi njoukouli bon ka cho̱kna bon. Mono on, an name hi njoukouli bon guédék hi Ouone ka bila Christ.

²⁹ Mono baï on, mi ko̱ mème ndé nding pina on kéng, da mème rou mbo̱l njèran nè ko̱ mi njéta an bili.