Apocalypse 9 - Féké Testament 1947

¹ Da ange a diouikè oul, da mè ko̱ mèssè mbéo ko̱ ourou an nonkala ka lé gui koukoula, da mi hi clélé on a lo̱ko̱ a loukou lo̱ko̱ ko̱ sèkèrèkè mi tiya a yilime hi nè.

² Da kè bourou lo̱ko̱ a loukou lo̱ko̱ ko̱ sèkèrèkè mi tiya a yilime, da soussoukou tèn kala mahana ka loukou soussoukou hèlè, an lo̱ko̱ on; da séssé da hanguèl fo̱ko̱ro̱ jing soussoukou lo̱ko̱ on.

³ Da an bil soussoukou hèlè on guilali tèn kala ko̱ yaïli mane toula koukoula bon, da mi hi njèran hi kli mahana ka ndaïli an koukoula ko̱ jing njèran.

⁴ Da mi sa hi kli an klime nding wonron jing pa an koukoula maléba dorome fèn maléba di ya, da jing ba njoukouli on ko̱ fèn mbo̱la a Ouone tane ti njaka moung kli ya.

⁵ Da mi hi kli an klime i njoukouli ya, da ba to̱ko̱nassé hi kli mane féou dioui; da to̱ko̱nassé ko̱ mi nding kli mahana ka to̱ko̱nassé a ndaï horo ko̱ kème ndon njoukou.

⁶ Da ka name o̱kèlio̱ yé njoukouli ma nza houl, da kli ba jingnakè tane tiya; da yé kli ji baï houl, da houl ma ngou dita jing kli.

⁷ Da mona guilali on mi mahana ka yangali ko̱ mi mosso mone kli baï rouna béré; da fèn mahana ka mbélé couronneli l’or mi goukou toul kli, da none kli mi na mahana yé ba nona njoukouli.

⁸ Da pouran toul kli mana mahana ka pouran toula waïnli, da sél kli mana mahana ka séla mamouli.

⁹ Da yé kli mana mahana ka yé a hang a réme, da tiri bassane kli mi ti mahana ka pousse‐pousse da ka tiri bo̱ko̱ yangali nyèta ko̱ ngou baï séna rouna béré.

¹⁰ Da kli yé jing saouto̱ko̱ mahana ka saouto̱ko̱ ndaï horoli, da fèn ndona, da njèran kli mana an saouto̱ko̱ kli baï ndingna wonron jing njoukouli mane féou dioui.

¹¹ Da ange a loukou lo̱ko̱ ko̱ sèkèrèkè mi tiya a yilime na gangna toul kli mahana ka nanjoukaou ling‐è ka njaka hébreu ba Abaddon, da ka njaka grec ling‐è ba Apollyon.

¹² Titili go̱ro̱ séta on mi ta tou. Da mono go̱ro̱ séta séré ma gui afal on.

¹³ Da ange a difala‐mbéokè mi oul, da mè la bo̱ko̱ on ko̱ mi gui ka tèonli nèng an autel l’or ko̱ mi na bèl mona Ouone.

¹⁴ Njaka on mi sa hi ange a difala‐mbéokè, ko̱ mi yé ka gaga mbo̱sso̱: Sél angeli nèng ko̱ mi gna kli an loukou mbi Euphrate.

¹⁵ Da mi sél angeli nèng on, ko̱ mi mosso mone kli baï l’heure mbéo, da name mbéo, da féou mbéo, da saka mbéo baï a kli mi i a mbéo a woro an zéng a saïkè a njoukouli.

¹⁶ Da ro̱ko̱na tourougouli a njou‐kaouna toul yangali ba ténakè‐té‐bo̱ko̱‐ténakè‐té‐bo̱ko̱‐séré, mè la ro̱ko̱na akli.

¹⁷ Da mono on, mè ko̱ yangali on mahana ka lola, da kli on ko̱ kaou toul kli jing yé a hang kli mahana ka hèlè a hyacinthe da soufre. Da toula yangali on mi na yé ba toula mamouli; da hèlè da soussoukou da soufre tèn kala an njaka kli.

¹⁸ Da béké fènli on saï mi i mbéo a woro zéng a saïkè a njoukouli, ka hèlè on jing soussoukou da soufre, ko̱ tèn kala an njaka kli.

¹⁹ Baï njèran a yangali ba njaka kli, da saouto̱ko̱ kli; baï ko̱ saouto̱ko̱ kli mi na mahana ka choïli da kli kaou jing toul kli, da kli nding wonron jing rou.

²⁰ Da gara njoukouli ko̱ fèn békékèli on tane ga i kli ya, kli tane ga hèkè pina ko̱ kli nding ka ndo̱ko̱ kli ya, an klime yèng hiouna zabololi ya, maléba ndame l’or da l’argent, da mbo̱sso̱, da kone, da di, ko̱ ma baï ko̱na guèl ya, da lana baïli ya, da séna ya;

²¹ da kli tane ga hèkè baï ina njoukou klili ya, kli tane ga hèkè baï pouna ngala akli ya, kli tane ga hèkè ndingna rome akli ya, kli tane ga hèkè mboro riya akli ya.