Apocalypse 7 - Féké Testament 1947

¹ Da afal on mè ko̱ angeli nèng o guèl kouroukè nèng an koukoula; kli ba koukouna nèng an koukoula, mono on koukouna mbéo mi ma baï kouna an koukoula, malèba toul none loukou mbi tome, maléba toul di mbéo ya.

² Da mè ko̱ ange aféké ko̱ hé ka mboro ténassé, kè mana jing fèn mbo̱la a Ouone ko̱ yan; da kè bouka béta guè siya hi angeli nèng on, ko̱ mi hi kli baï ndingna njèran jing koukoula da loukou mbi tome,

³ ka sa: Oui nding njèran jing koukoula maléba loukou mbi tome, maléba di ya, bo̱l tèn name dé koïli a Ouone na jing fèn mbo̱la bi njaka moung akli.

⁴ Da mè la ro̱ko̱na akli on ko̱ mi dé ka fèn mbo̱la ba ténakè‐ténakè‐té‐bo̱ko̱‐ténakè‐bongkè‐nèng‐faltoulkè‐nèng on ko̱ mi dé fèn mbo̱la an woro mèrèn kadouk bon a goundi a Israël:

⁵ an woro mèrèn kadouk Juda mi dé ka fèn mbo̱la ténakè‐té‐bo̱ko̱‐ténakè‐bongkè‐séré; an woro mèrèn kadouk Ruben, ténakè‐té‐bo̱ko̱‐ténakè‐bongkè‐séré; an woro mèrèn kadouk Gad, ténakè‐té‐bo̱ko̱‐ténakè‐bongkè‐séré;

⁶ an woro mèrèn kadouk Aser, ténakè‐té‐bo̱ko̱‐ténakè‐bongkè‐séré; an woro mèrèn kadouk Nephthali, ténakè‐té‐bo̱ko̱‐ténakè‐bongkè‐séré; an woro mèrèn kadouk Manassé, ténakè‐té‐bo̱ko̱‐ténakè‐bongkè‐séré;

⁷ an woro mèrèn kadouk Siméon, ténakè‐té‐bo̱ko̱‐ténakè‐bongkè‐séré; an woro mèrèn kadouk Lévi, ténakè‐té‐bo̱ko̱‐ténakè‐bongkè‐séré; an woro mèrèn kadouk Issacar, ténakè‐té‐bo̱ko̱‐ténakè‐bongkè‐séré;

⁸ an woro mèrèn kadouk Zabulon, ténakè‐té‐bo̱ko̱‐ténakè‐bongkè‐séré; an woro mèrèn kadouk Joseph, ténakè‐té‐bo̱ko̱‐ténakè‐bongkè‐séré; an woro mèrèn kadouk Benjamin, mi dé jing fèn mbo̱la, ténakè‐té‐bo̱ko̱‐ténakè‐bongkè‐séré.

⁹ Da afal fèn aïnli, mè ko̱ da mono, njoukouli ro̱ko̱ta ko̱ njoukou mbéo tane ma baï kèna kli ya, kli gui ka pime pouli, njoukouli bon, kadouk bon, da mèran njoukouli toutoul bon, da ka njakabaïli bon. Kli o bèl kangala njaka bara da mona Goune badoua, kli bou pouki la da kli ba di ndèng‐è an ndo̱ko̱ kli.

¹⁰ Da kli bouka béta guè siya, ka sa: Yana‐baï‐toul a Ouone na ko̱ mi kaou toul kangala njaka bara on, da a Goune badoua.

¹¹ Da angeli bon o gui ki kangala njaka bara on, da gui ki tangchidoli, da fènli nèng on ko̱ yan; da kli té none kli bèl kangala njaka bara, da hiou ba Ouone,

¹² ka sa: Amen! Mi hi samnafèn da jonafèn da chokna, da kaouna koukoula hi Ouone, da dikna, da njèran, da name gangna hi Ouone na, kambèlè go̱ kambèlè! Amen.

¹³ Da mbéo an zéng an tangchidoli mi féré sa hi mi, ka sa: Kli on ko̱ bou pouki la, kli ba guèli lé? Da kli gui ka hane dé?

¹⁴ Da mè sa hi nè: Nanjou ni, mo toutou. Da kè sa hi mi: Njoukouli on ba kli ko̱ tèn kala ka bil loukou to̱ko̱nassé on; da kli tourou la akli tou, da kli nding a la akli mi poukou ka séme a Goune badoua.

¹⁵ Mono on, kli makaou bèl kangala njaka bara a Ouone, da nding bakara hi nè bil temple nè, ka séssé da ka hangnachoung bon. Da kè on ko̱ kaou toul kangala njaka bara on ma yaïli tente nè kon toul kli.

¹⁶ Yé nzala ba ina kli ba aféké tane tiya, da po̱ko̱ mbi ba ina kli ba aféké tane tiya, da séssé maléba hèlè aféké mi ma baï jangna toul kli ya.

¹⁷ Baï ko̱ yé Goune a Ouone on ko̱ makaou bèl kangala njaka bara on ba njou‐kora akli, da ma ko̱ro̱ kli, da miri kli an mboro toutoung mbili ko̱ ya, da Ouone ma taka mbi léou bon an nona kli guèfal.