Apocalypse 6 - Féké Testament 1947

¹ Da mè ko̱, ko̱ goune badoua on sél fèn mbo̱la mbéo an zéng an difala‐séré on, da mè la fèn mbéo an woro fènli on nèng ko̱ yan sa baï mahana ka bo̱ko̱ ndouna‐mbame: Mo gui.

² Mè ko̱ da mono on, pouki yanga tèn da kè on ko̱ kaou toulè mi yé jing ngaou; da kli hi mbélé couronne hi nè, da kè gui gnèran fèn, da baï gnèran fèn.

³ Da ko̱ kè sél fèn mbo̱la sérékè, mè la fèn on a sérékè ko̱ mi yan mi sa: Mo gui.

⁴ Da yanga aféké tèn kala, yanga ba sènakè. Kè on ko̱ kaou toulè kli hi njèran hi nè baï yana longna pou an koukoula guèfal, an klime i hana, da kli hi loukou gamba hi nè.

⁵ Da ko̱ kè sél fèn mbo̱la an saïkè, mè la fèn on a saïkè ko̱ mi yan sa: Mo gui. Da mè ko̱ da mono on, yanga an yirikè tèn. Da kè ko̱ kaou toulè mi yé jing kilo an ndo̱kè.

⁶ Da mè la bo̱ko̱ baï a woro fènli nèng on ko̱ mi yan mi sa: Yong mbéo a mèrèn mapa baï a denier mbéo, da yong saï a jo baï a denier mbéo; da mo nding njèrèn jing nome da vin ya.

⁷ Da ko̱ kè sél fèn mbo̱la an nèngkè, mè la bo̱ko̱ baï a fèn on nèngkè ko̱ mi yan mi sa: Mo gui.

⁸ Da mè ko̱ da mono on, yanga tèn on ko̱ poukou gounfènakè païn. Kè on ko̱ kaou toulè ling‐è ba Houl, da Guèl a houli tong nè. Da kli hi njèran hi nè baï name gangna toula guèl mbéo an zéng nèngkè an koukoula, baï ina njoukouli ka gamba da bana, da ka houl, da ka naïn woropali an koukoula.

⁹ Da ko̱ kè sél fèn mbo̱la an diouikè, mè ko̱ an bo̱ko̱ autel on laou a kli on ko̱ mi i kli, baï toul baïnjaka a Ouone, da baï toul bongbaï on ko̱ klime pèng.

¹⁰ Da kli bouka béta guè siya, ka sa: Name ro̱ko̱ ane dé, O Njou‐to̱ko̱nafèn ko̱ ba tangna fofoto da babaï, mo ma kaou zada baï wala baï da féra gnana baï séme ama hi kli on ko̱ mi kaou an koukoula lé?

¹¹ Da kè hi pouki la hi kli mbéo mbéo bon, da mi sa hi kli, an klime kaou ba aféké gounfènakè, bo̱l tèn name a njou‐ndo̱ko̱ba bakara akli kéng da yine klili mi ma falkè, an njoukouli mi i kli mahana ko̱ mi i kli fèn kli jinguèl.

¹² Da mè ko̱, ko̱ kè sél fèn mbo̱la a difala‐mbéokè; koukoula to̱ nyèta, séssé tèn ba yirikè mahana ka saki on ko̱ njoukou mosso jing pouran, da féou bon tèn mahana ka séme,

¹³ da mèssèli an nonkala lé gui koukoula mahana ka di njouï wou léna nè biloïkè ko̱ koukouna bine‐té lang nè.

¹⁴ Da mi bènguèrèn nonkala jing guèlè mahana ka takarata on ko̱ ka da tou; da mi bènguèrèn souraguèl tèn kouali bon an guèl akli.

¹⁵ Da nanjoukaouli an koukoula da zaworoli, da zaworo rouna béréli, da nguèra njoukouli, da njèran njoukouli, da koïli bon da njou‐gangnali bon, kli mou mone kli bil kouli da an woro loukou kondi an souraguèli.

¹⁶ Da kli sa hi souraguèli da loukou kondi on: Oui ki lé gui toula, ka mou na an nona kè on ko̱ kaou toul kangala njaka bara on, da an hèrè a Goune badoua on;

¹⁷ baï ko̱ loukou name hèrè amè mi gui tou, da guème ma baï kaouna lé?