Apocalypse 4 - Féké Testament 1947

¹ Afal fèn aïnli, mè ko̱ da mono, njaka mboro bourou an nonkala. Titili mbo̱ko̱ ko̱ mè la, bo̱ko̱ baï mahana ka gaga mbo̱sso̱ ko̱ sa baï hi mi, ka sa: Mo hé gui guèl aïn, da yé mè ma to̱ko̱ fènli hi mo ko̱ ma baï guina afal da.

² Koukoulion mè kaou an bila Esprit. Da mono, kangala njaka bara mana an nonkala, da njoukouna makaou toul kangala njaka bara on.

³ Da kè on ko̱ kaou, njoukou ko̱ nè mahana ka kone jaspe da sardoine, da bo̱do̱wo̱ro̱ gna gui ki kangala njaka bara on, nonkè na mahana ka émeraude.

⁴ Da bèl kangala njaka bara on ka mbora lèkè bon kangala njaka barali bongkè‐séré‐faltoulkè‐nèng mana. Da mè ko̱ tangchidoli bongkè‐séré‐faltoulè‐nèng makaou toul kangala njaka barali on, da kli bou pouki la, da mbélé couronneli l’or goukou toul kli.

⁵ Da fana‐none‐mbame, da bo̱ko̱ baï da ndouna‐mbame tèn kala an bil kangala njaka bara on. Da lampeli difala‐séré a hèlè mi cha an bèl kangala njaka bara on, on ko̱ ba Espritli a Ouone difala‐séré.

⁶ An bèl kangala njaka bara aïn loukou mbi verre mahana ka jokanya cristal mana. An woro kangala njaka bara aïn, da gui ki nè bon, fènli nèng ko̱ yan mana, kli mba jing none kli ambèl kli da kaïn kli.

⁷ Titili fèn on ko̱ yan na mahana ka mamou, fèn on ko̱ yan a sérékè na mahana ka goune ndaïya, fèn on ko̱ yan a saïkè nonè na mahana ka nona njoukou, fèn on ko̱ yan a nèngkè na mahana ka diki ko̱ jo̱.

⁸ Da fèn on nèng ko̱ yan, kli mbéo mbéo bon mana jing bassane kli difala‐mbéo, da kli mba jing none kli mane gui ki mone kli bon, da bil kli; da kli tane ga yan tana kli ya, baï sana baï ka séssé da ka hangnachoung: Tangna fofoto, tangna fofoto, tangna fofoto ba Nanjou Ouone, Njéran‐honta‐bon, kè on ko̱ mi yé jinguèl, kè on ko̱ mi yé kassénaï, da kè on ko̱ ma gui o!

⁹ Da ko̱ fènli on ko̱ yan ma hi jonafèn da dikna, da kaouna koukoula hi kè on ko̱ kaou toul kangala njaka bara, kè on ko̱ yan kambèlè go̱ kambèlè,

¹⁰ koukoulion tangchidoli bongkè‐séré‐faltoulè‐nèng mi lé bou koukoula an mbèla kè on ko̱ kaou toul kangala njaka bara, da hiou kè on ko̱ yan kambèlè go̱ kambèlè, da kli wou mbélé couronne aklili bou bèl kangala njaka bara, ka sa:

¹¹ Mo mabongkè Nanjou ama da Ouone ama, baï jingna jonafèn on, da dikna on da njèran on; baï ko̱ mo mosso fènli bon jinguèl tou, da baï ko̱ mome ji mi yé kli mana, da mi mosso tou.