Apocalypse 19 - Féké Testament 1947

¹ Afal fèn aïnli mè la fèn mahana ka loukou bo̱ko̱ baï a njoukouli ro̱ko̱ta an nonkala, ka sa: Alléluia! Yana‐baï‐toul, da jonafèn, da njèran ba a Ouone na,

² baï ko̱ walabaï nè ba babaï da guédék, baï ko̱ kè wal baï kon toula loukou waïn rome on ko̱ bo koukoula jinguèl jing ndingna rome amè, da kè féré gnana séme a koï nèli, ka oui ka ndo̱kè.

³ Da kli sa an bo̱ko̱ sérékè: Alléluia! Da soussoukou hèlè nè hé kambèlè go̱ kambèlè.

⁴ Da tangchidoli bongkè‐séré‐faltoulkè‐nèng, da fènli nèng on ko̱ yan, kli lé bou koukoula da houkou an mbèla Ouone ka hiou nè on ko̱ kaou kangala njaka bara on, ka sa: Amen! Alléluia!

⁵ Da mbo̱ko̱ tèn kala an kangala njaka bara on, ka sa: Oui jone Ouone na, oui ko̱ï nèli bon, oui ko̱ ngou waou nonè, lélé njoukouli tèn loukou njoukouli!

⁶ Da mè la bo̱ko̱ baï a njoukouli ro̱ko̱ta mahana ka tiri wouna mbi nyèta, da mahana kandouna, a ndouna mbame, ka sa: Alléluia! Baï ko̱ Nanjou Ouone na, Njèrèn‐honta‐bon ri guèl name gangna nè.

⁷ Yèng an name jangndaï da kaou ka sakanafèn nyèta, an name hi jonafèn hi nè; baï ko̱ name bina waïn voulou a Goune badoua tèn tou, da waïn nè mosso monè tou.

⁸ Da kè hi nè baï bouna la lin ko̱ o̱ ta da tang ta, baï ko̱ la lin ba pina guédék a njou‐lana‐bilaouli.

⁹ Da kè sa hi mi: Mo dé bi takarata: Jangnandaï mi ba baï akli on, ko̱ mi di kli baï sona loukou laka bina waïn voulou a Goune badoua! Da kè sa hi mi: Fèn aïnli ba gba baïnjaka a Ouone.

¹⁰ Da mè lé bou koukoula bèl bo̱kè baï hiouna nè. Da kè sa hi mi: Mo yèng ka nding on ya! Mè ba njou‐ndo̱ko̱ba bakara jing mo, da jing yine noli, ko̱ pèng sana bongbaï a Jèsus. Mo hiou ba Ouone. — Baï ko̱ sana bongbaï a Jésus mi ba esprit a to̱ko̱na bong njaka Ouone.

¹¹ Da mè ko̱ nonkala mi bourou, da mono pouki yanga, da ling a kè on ko̱ kaou toulè ba Lodok da Babaï, da kè wal baï da rou béré guédék.

¹² Da nonè na mahana ka léme sél hèlè; da mbélé diadèmeli nyèta mana toulè; da yé kè jing ling on ko̱ mi dé, ko̱ njoukou mbéo ma tou ya, wara kè fènè ya.

¹³ Da kè bou la on ko̱ mi vaïn jing séme an toulè, da ling‐è mi ba Baïnjaka a Ouone.

¹⁴ Da wila tourougouli on an nonkala mi tong nè an toul pouki yangali, kli bou la lin ko̱ bèl maïya, da poukou ta da tang ta.

¹⁵ Da gamba on ko̱ ou maïya tèn kala njakè, da jing nè, kè ma té pime pouli bon; da kè ma na gangna toul kli jing bobono réme; da kè nda fèn ikina vin loukou njèran hèrè a Ouone, Njèran‐honta‐bon.

¹⁶ Da kè jing ling on ko̱ kème dé bi la nè da ho̱lè: Nanjoukaou a nanjoukaouli da Nanjou a nanjouli.

¹⁷ Da mè ko̱ ange mbéo ko̱ o bil séssé. Da kè bouka béta guè siya, ka sa hi ndo̱ïli bon ko̱ jo̱ an hanguèl nonkala. Oui gui ka ndoï jing hana baï loukou laka a Ouone.

¹⁸ Mono on an oui ma baï sona naïn‐mona nanjoukaouli, da naïn‐mona njou‐onatoul béréli, da naïn‐mona njèran njoukouli, da naïn‐mona yangali, da akli on ko̱ kaou toul kli, da naïn‐mona njoukouli bon, goune gangnali da koïli, lélé njoukouli tèn loukou njoukouli.

¹⁹ Da mè ko̱ naïn on, da nanjoukaouli an koukoula, da wila tourougou aklili, kli ndoï baï rouna béré jing kè on ko̱ kaou toul yanga on jing tourougou nèli.

²⁰ Da kli ba naïn on, da wo̱ko̱ prophète on jing nè, ko̱ nding fèn to̱ko̱nakèli an nonè, jing fèn sakame on ko̱ kè mong njoukouli on ko̱ ya déna a naïn on jinguèl, da kli on ko̱ houkou an mbèla tétéme nè ka hiou nè, mi wou kli séré bon bou bil étang hèlè, ko̱ jang ta jing soufre, ko̱ kli pane yana.

²¹ Da kè i garakèli ka gamba on ko̱ tèn kala an njaka kè on ko̱ kaou toul yanga; da an bila ndo̱ïli bon mba jing naïn‐mone kli.