Apocalypse 18 - Féké Testament 1947

¹ Afal fèn aïnli mè ko̱ ange aféké mi tèn kala an nonkala ka diri gui tiya, kè jing njèran njaka; da jonafèn nè taka an koukoula.

² Da kè bouka béta guè siya, ka sa: Pou Babylone loukoukè mi lé tou, ka lé tou! Kè tèn guèl bina pou a zabololi, da voul jo̱bo̱ a dakame espritli bon, da voul jo̱bo̱ a dakame ndo̱ïli ko̱ njoukou ji kli ya.

³ Baï ko̱ pime pouli bon njo vin a hèrè ndingna rome nè, da nanjoukaouli a koukoula nding rome jing nè, da njou‐jo̱lacho̱ko̱li jing nguèra ka mboro njèran jingna fèn nè.

⁴ Da mè la bounaka aféké gui ka nonkala, ka sa: Oui tèn kala an bil pou on, njoukou nili, an ouime ndoï jing békéfèn nèli ya, da on an ouime jing fèn békékè nèli ya.

⁵ Baï ko̱ békéfèn nèli hé bo̱l tèn nonkala, da Ouone tane ga yangnaran ndingna maï maï nèli ya.

⁶ Oui féré nding jing nè mabahana ko̱ kè nding, da hi nè bo̱ko̱ séré an mi ma ka mboro pina nèli. An bil kopo on ko̱ kème si fèn an bilkè oui si fèn hi nè bo̱ko̱ séré.

⁷ Mahana ko̱ kème jone monè fènè, da kè kaou jing fèn nguèra nè nyèta, mono on oui hi to̱ko̱nassé hi nè da go̱ro̱ séta mahana ka on, baï ko̱ kè kèrè ka laou‐è fènè. Mo ba waïn nanjoukaou, mè tane ti ba waïn choré ya, da mè ma ko̱ go̱ro̱ séta gounfènakè ya!

⁸ Mono on, ka name mbéo yé fèn békékè nèli ma tèn nè, houl da go̱ro̱ séta da bana, da ko̱ ma soung nè bon jing hèlè. Baï Nanjou Ouone ko̱ wal baï hi nè ba njèran.

⁹ Da nanjoukaouli an koukoula ko̱ nding rome jing nè jinguèl, kli jing fèn nyèta mahana ka kè, kli ma lé léou da wan njaka baï houlé, ko̱ kli ko̱ soussoukou soungna nè.

¹⁰ Kli o dita baï waou to̱ko̱nassé nè, kli sa: Go̱ro̱ séta, go̱ro̱ séta loukou pou on Babylone, ko̱ ba njèran pou! Baï l’heure mbéo walabaï no tèn mo tou!

¹¹ Da njou‐zénacho̱ko̱li an koukoula lé léou da wan njaka houlè, baï ko̱ njoukou mbéo ma zé fèn cho̱ko̱ akli ba aféké ya.

¹² Fèn cho̱ko̱ l’or da l’argent, da kakaïya kone, da kone perle, da bèla la lin, da bitibiti la da la soie, sèngnè la, da di yombo bon, da fènli toutoul bon ko̱ kli mosso ka séla mbalé da fènli bon ko̱ kli mosso jing kakaïya di, da mbo̱sso̱, da réme, da marbre,

¹³ cinnamome, dongui épice da yombo, da nome yombo, encens, da vin, da nome, da bèla hourou, da mèrèn mapa, da ndaïyali, da badouali, da yangali, da pousse a yangali, da naïn mone da laou a njoukouli.

¹⁴ Da lénadi on ko̱ laou o̱ ji nyèta jinguèl mi ta dita jing mo tou; da fènli bon ko̱ bèlta ko̱ jing mbo̱ri nyèta bo̱l jing mo tou, da yé njoukouli ma ko̱ kli gounfènakè ba aféké ya.

¹⁵ Da njou‐zénacho̱ko̱li ko̱ jo̱l fèn aïnli, da nguèra ka mboro nè, yé kli o dita baï waou to̱ko̱nassé nè, ka lé léou da an wan njaka houlè,

¹⁶ ka sa: Go̱ro̱ séta, go̱ro̱ séta, loukou pou on, kè on ko̱ bou bèla la lin, da bitibiti la da sèngnè la, da gaïn bèla fèn nè jing l’or, da kakaïya kone, da kone perle!

¹⁷ Baï lo̱ l’heure mbéo nguèra nyèta on mi bo tou. Da njou‐kina bateauli bon tèn njoukouli bon ko̱ sé jing bateau, da njou‐ndingna pinali an bateau, da kli bon on ko̱ nding pina akli an none loukou mbi tome, kli o dita,

¹⁸ da ko̱ kli ko̱ soussoukou hèlè ko̱ mi soung nè, kli wan njaka guè siya: Pou hani ko̱ mahana ka loukou pou on lé?

¹⁹ Da kli bon kon sassal kon toul kli, da wan njaka, da lé léou da wan njaka houlè, ka sa: Go̱ro̱ séta, go̱ro̱ séta, loukou pou on, kè on ko̱ njoukouli bon ko̱ bateau kli mana an loukou‐mbi‐tome, kli jing nguèra an bil pou on, baï fèn zénacho̱ko̱ nè nyèta; baï ka l’heure mbéo bo̱l kè bo tou.

²⁰ Oui jangndaï baï toulè, mo nonkala, da oui njou‐lana‐bilaouli, da oui njou‐mboro‐pinali, da oui prophèteli. Baï ko̱ Ouone mi wal baï walabaï, no, kon toulè.

²¹ Da ange mbéo ko̱ njèrèn ta bi loukou kone nène, da wou nè bou bil loukou‐mbi‐tome, ka sa: Mono on, Babylone loukou pou on ma lé mingta bou koukoula, da ba jingnakè ba aféké tane tiya.

²² Da kli ba lana njaka a njou‐hangna kouléli da njou‐dina singli, da njou‐oula koulatanli, da njou‐oula gaga mbo̱sso̱li an mono ba aféké tane tiya, da kli ba jingna njou‐touna pinali toutoul bèlta an mono ba aféké tane tiya, da yé kli ba lana bo̱ko̱ nène an mono ba aféké tane tiya.

²³ Da chana lampe ba takana an bilo̱ ba aféké tane tiya, da kli ba lana bo̱ko̱ a njou‐yana waïn da waïn yana wonron an bilo̱ ba aféké tane tiya, baï ko̱ njou‐zénacho̱ko̱ noli ba zaworoli an koukoula jinguèl, baï ko̱ hala ngala amo mong pime pouli bon.

²⁴ Da an bilkè kli jing séme a prophèteli da njou‐lana‐bilaouli da kli bon on ko̱ mi i kli an koukoula.