Apocalypse 16 - Féké Testament 1947

¹ Da mè la bounaka béta guè siya ko̱ kala an bil temple, ka sa hi angeli difala‐séré on: Oui sé ka si dina tassi difala‐séré on a hèrè a Ouone kon toul koukoula.

² Da titili ange sé da si dina tassi nè kon toul koukoula. Da béké nongno ko̱ séta mi gui mona njoukouli on ko̱ ba déna a naïn on, da kli on ko̱ houkou an mbèla tétéme nè, ka hiou nè.

³ Da a sérékè si dina tassi nè kon bil loukou mbi tome. Da on mi tèn séme mahana ka séme a houl; da laou bon ko̱ yan hou, tongna fènli on ko̱ na bil loukou mbi‐tome.

⁴ Da a saïkè si dina tassi nè kon bil loukou mbili da toutoung mbili da on mi féré tèn séme.

⁵ Da mè la ange a mbi sa: Mo ba guédék mo ko̱ mi yé, da ko̱ mi yé jinguèl; mo mbéo bo̱l ba tangna fofoto, baï ko̱ mo wal baï mahana ka on,

⁶ baï ko̱ kli si séme a njou‐lana‐bilaouli da prophételi jinguèl, da mo hi séme hi kli baï njonakè; baï kli mabongkè.

⁷ Da mè la autel mi sa: Babaï, o Nanjou Ouone, Njèran‐honta‐bon, walabaï no ba babaï da guédék.

⁸ Da a nèngkè mi si dina tassi nè kon toul séssé da mi hi njèran hi séssé baï réngna njoukouli ka hèlè.

⁹ Da jangma hèlè rèng njoukouli, da kli poukou ling a Ouone on ko̱ jing njèran baï sana binjaka fèn békékèli on, da kli tane ga hèkè ya, baï hina jonafèn hi nè.

¹⁰ Da a diouikè si dina tassi nè kon toul kangala njaka bara naïn on. Da bilkaou nè mi yiri ta; da kli son léme sél kli baï to̱ko̱nassé on,

¹¹ da kli poukou Ouone a nonkala baï mone kli ko̱ mi séta da baï nongno kli, da kli tane ga hèkè pina akli ya.

¹² Da a difala‐mbéokè si dina tassi nè kon toul loukou mbi ko̱ lingkè ba Euphrates. Da mbi on ho̱ko̱ tou, mono on, an mboro on bourou tou baï a nanjoukaouli on ko̱ gui ka mboro ténassé.

¹³ Da mè ko̱ dakame espritli saï, mahana ka maguéngli ko̱ tèn kala an njaka loukou choï, da an njaka naïn on, da an njaka woko prophète on.

¹⁴ Baï ko̱ kli ba espritli a zabololi ko̱ nding fèn to̱ko̱nakèli kli sé mona nanjoukaouli an koukoula bon, baï ndoïna kli baï rouna béré ka loukou name a Ouone Njèran‐honta‐bon.

¹⁵ Oui ko̱, mè gui mahana ka njou‐riya. Jangnandaï mi ba baï a kè on ko̱ zéng, da pèng la amè, baï an kème sé bolok bo̱on ya, da an klime ko̱ chonron nè ya.

¹⁶ Da kli ndoï kli guèl on ko̱ kli bi lingkè ka njaka hébreu Harmaguédon.

¹⁷ Da a difala‐sérékè si dina tassi nè kon hanguèl nonkala. Da bounaka mi béta guè siya tèn kala an bil temple an kangala njaka bara, ka sa: Mi o̱ tou.

¹⁸ Da fana none mbame mi fan, da njaka baïli sa baï, da ndouna mbame mi ndou, da koukoula mi to̱ nyèta, on ko̱ tane ga nding ka titili mossona njoukouli an koukoula, koukoula mi to̱ mahana ka on jinguèl ya, baï ko̱ on njèrèn nyèta.

¹⁹ Da loukou pou on mi wal bilkè saï, da loukou pouli a gentili lé, da Ouone tane ga yangnaran an nonè ya, Babylone ko̱ ba loukoukè baï hina kopo a vin a loukou hèrè nè.

²⁰ Da kouali bon mi ngou tou, da kli tane ga jing loukou souraguèli ya.

²¹ Da loukou sanri a kilo nè mbéo ma talent mbéo mi tèn gui ka nonkala ka lé toula njoukouli, da njoukouli poukou Ouone baï fèn békékè a sanri on, baï ko̱ fèn békékè on mi nyè maïya.