Apocalypse 14 - Féké Testament 1947

¹ Da mè ko̱, da mono Goune badoua ko̱ mi o toul souraguèl Sion, da njoukouli ténakè‐ténakè‐bo‐bo̱ko̱kè‐ténakè‐bo‐bongkè‐nèng‐faltoulkè‐ténakè‐bongkè‐nèng jing nè, kli on ko̱ mi dé ling‐é da ling a Baba nè bi njaka moung akli.

² Da mè la bo̱ko̱ baï on, ko̱ gui ka nonkala, mahana ka tiri mbi nyèta, da mahana ka bo̱ko̱ ndouna mbame ko̱ mi pome njèrèn ta da bo̱ko̱ baï on ko̱ mème la mi na mahana ka bo̱ka njou‐hangna kouléli ko̱ mi hang koulé aklili.

³ Da kli di sing mahana ka féké sing an bèl kangala njaka bara, da bèl nona fènli on nèng ko̱ yan, da tangchidoli. Da njoukou mbéo mi tane ma baï lana saon sing on ya, wara kli ténakè‐ténakè‐bo‐bo̱ko̱kè ténakè‐bo‐bongkè‐nèng‐faltoulkè‐ténakè‐bongkè‐nèng, kli on ko̱ mi zé kli an toul koukoula.

⁴ Njoukouli on ba kli on ko̱ tane ga nding mone kli ba fèn dakame jing waïnli ya, baï ko̱ kli ba tikilali. Njoukouli on ba kli on ko̱ sé fala Goune badoua an guèl bon ko̱ kème sé. Mi zé kli an wora njoukouli, baï ko̱ klime gui titili lénakè baï a Ouone, da baï a Goune badoua on.

⁵ Da mi tane ga jing wo̱ko̱ mbéo an njaka kli ya, baï ko̱ kli kaou ka rongo.

⁶ Da mè ko̱ ange aféké ko̱ mi jo̱ an hanguèl nonkala, ko̱ jing bèlabaï kaouna kambèlè baï sana mboura hi kli on ko̱ bi pou an toula koukoula, da pime pouli toutoul bon, da mèrèn kadouk bon, da njaka baïli toutoul bon, da njoukouli toutoul bon.

⁷ Da kè sa ka bounaka béta guè siya: Oui waou Ouone, da hi jonafèn hi nè, baï ko̱ l’heure walabaï nè mi gui tou; da houkou ka hiou kè on ko̱ mosso nonkala da koukoula da loukou mbi tome, da toutoung mbi.

⁸ Da ange mbéo, ange a sérékè tong nè, ka sa: Loukou pou Babylone on mi lé tou, mi lé tou, kè on ko̱ nding pime pouli toutoul bon mi njo vin hèrè a ndingna rome.

⁹ Da ange aféké, a saïkè mi tong bong kli, ka sa jing bounaka béta guè siya: Tokoré njoukouna mbéo mi houkou an mbèla naïn on ka hiou nè da tétéme nè, da kème ya déna a njaka moung‐è maléba toul ndo̱kè,

¹⁰ yé kè njo vin hèrè a Ouone kéng, ko̱ mi si tane joukoura bil kopo hèrè amè, da yé kè ma to̱ko̱ssé an hèlè, da soufre, an nona tangna fofoto angeli, da an nona Goune badoua on.

¹¹ Da soussoukou a to̱ko̱nassé akli tèn kambèlè go̱ kambèlè; da kli tane ma baï yana tana kli ka séssé maléba ka hangnachoung ya, kli on ko̱ houkou an mbèla naïn on ka hiou nè da tétéme nè, da kli on ko̱ ya déna a ling‐è.

¹² Da guèl on ko̱ mi ba laïnabi a njou‐lana‐bilaouli kli on ko̱ pèng bong bina baïnjaka guingna Ouone, da tounassaon a Jésus.

¹³ Da mè la bo̱ko̱ baï on ko̱ mi gui ka nonkala, ka sa: Mo dé bi takarata: Jangnandaï mi ba baï akli on ko̱ hou ka bila Nanjou, afal on! Ii, Esprit fènè mi sa an klime yan tana kli jing pina akli, baï ko̱ pina akli mi tong kli.

¹⁴ Da mè ko̱, da mono on pouki yiri mbame, da njoukou mahana ka goune a njoukou mi kaou toul yiri mbame on, ko̱ jing mbélé couronne l’or ko̱ na toulè, da gondong bakane ko̱ mi outa mana ndo̱kè.

¹⁵ Da ange aféké tèn kala an bil temple, ka bouka ka bo̱ko̱ baï béta guè siya hi kè on ko̱ kaou toul yiri mbame on: Mo pi gondong bakane no ka wé; baï ko̱ l’heure wénakè tèn tou, baï ko̱ laka a koukoula mi chang tou.

¹⁶ Da kè on ko̱ kaou toul yiri mbame on wou gondong bakane nè gui toula koukoula, da mi wé laka a koukoula tou.

¹⁷ Da ange aféké mi tèn kala an bil temple, on ko̱ mi na an nonkala, kè mana jing gondong bakane, on kéng, ko̱ outa.

¹⁸ Da ange aféké tèn kala an bil autel, kè on ko̱ mana jing njèran baï sana bi njaka a hèlè, da kè sa ka bounaka béta guè siya, hi kè on ko̱ mana jing gondong bakane on ko̱ outa, ka sa: Mo wé gondong bakane no ko̱ outa, da koung toul lénadi an koukoula; baï ko̱ raïsinli an koukoula sèn tou.

¹⁹ Da ange on ko̱ mi wé gondong bakane nè an koukoula. Da kè wé toul lénadi an koukoula, da wou toul lénadikè on an bil loukou fèn ikina lénadi hèrè a Ouone.

²⁰ Da kli nda fèn ikina lénadi on an njaka galang pou on; da séme mi tèn kala an fèn ikina lénadi on, ka tèn bo̱l tèn réme gnana njaka yangali, an mi ma kilomètre ténakè‐séré‐faltoulkè‐bongkè‐difala‐nèng‐faltoulkè‐nèng.