Apocalypse 13 - Féké Testament 1947

¹ Da mè ko̱ naïn tèn kala an bil loukou‐mbi‐tome on, ko mi yé jing tèwèli bo da toulèli difala‐séré, da mbélé diadèmeli bo na toul tèwèli, da ling poukounafènli toutoul na toul toulèli.

² Naïn on ko̱ mè ko̱, kè mabahana ka wonron; da bo̱kè na mahana ka naïn ours da njakè na mahana ka njaka mamou, da loukou choï on hi njèran nè hi nè, da kangala njaka bara nè, da sa bi njakè njèrèn ta.

³ Da mè ko̱ toulè a mbéokè mahana ko̱ mi wan nè ka ma baï houl; da nongno houl mi njé tou. Da njou‐koukoulali bon laou kli mi sé siya a bong a naïn on.

⁴ Da kli houkou an mbèla loukou choï ka hiou?-?nè, baï ko̱ kè hi njèran nè hi naïn on; da kli houkou an mbèla naïn on ka hiou nè, ka sa: Guème ko̱ mahana ka naïn on lé, da guème ma baï rouna béré jing nè lé?

⁵ Da mi hi njaka hi nè, on ko̱ sa loukou baï poukounafèn; da mi hi njèran hi nè baï ndingna pina nè mane féou bongkè‐nèng‐faltoulkè‐séré.

⁶ Da kè bourou njakè baï poukounafèn guè mona Ouone, baï poukouna ling‐è, da tabernacle nè, da kli on ko̱ kaou an nonkala.

⁷ Da mi hi nè baï rouna béré jing njou‐lana‐bilaouli, da baï gnèran kli baï njéna. Da mi hi njèran hi nè toula mèrèn kadoukli bon da njoukouli toutoul bon da njaka baïli da pime pouli bon.

⁸ Da kli bon on ko̱ bi akli toul koukoula ma houkou an mbèlè ka hiou nè, kli mbéo mbéo bon on jinguèl ka titili mossona koukoula ko̱ ling kli tane ga dé an bil takarata yana a Goune badoua ya, kè on ko̱ kli i nè.

⁹ Tokoré njoukouna mi yé jing soukè ko̱ mi outa, dadaon, an kème la.

¹⁰ Tokoré njoukouna mi miri njoukou ka koï, kè fènè ma sé ka mboro koï; tokoré njoukouna mi i njoukou ka gamba, dadaon, an kème hou ka gamba. An guèl on ko̱ mi ba laïnabi jing tounassaon a njou‐lana‐bilaouli.

¹¹ Da mè ko̱ naïn aféké ko̱ tèn kala an bil koukoula, da kè mi yé jing tèwèli séré mahana ka goune badoua, da kè sa baï mahana ka loukou choï.

¹² Da kè nding jing njèran bon a titili naïn on an nonè. Da kè nding an koukoula da kli on ko̱ bi akli on an toul koukoula baï houkouna an mbèla titili naïn on ka hiou nè, kè on ko̱ nongno houl amè mi njé tou.

¹³ Da kè nding loukou fèn to̱ko̱nakèli tongna on, mono on, kè nding bo̱l tèn an hèlè mi tèn kala an nonkala, da diri guè tiya an nona njoukouli.

¹⁴ Da kè mong kli on ko̱ bi pou kli an toula koukoula baï fèn to̱ko̱nakèli on ko̱ mi hi njèran hi nè baï ndingnakè an nona naïn on, ka sa hi kli on ko̱ bi pou an toul koukoula, an klime mosso tétéme a naïn on ko̱ mi yé jing nongno gamba da pane yana.

¹⁵ Da mi hi njèran hi nè baï hina yana hi nè, tongna tétéme a naïn on, mono on, an tétéme a naïn on mi ma baï sana baï, da mi nding kli bon on ko̱ houkou an mbèla tétéme a naïn on ka hiou nè ya, mi i kli.

¹⁶ Da kè nding njoukouli bon, lélé njoukouli, da loukou njoukouli, nguèra njoukouli, da foïna njoukouli, goune gangnali da koïli, mono on ko̱ mi hi kli baï déna an mboro wonron ndo̱ko̱ kli maléba an njaka moung kli,

¹⁷ da mono on, njoukou mbéo ma baï jola fèn maléba zéna fèn ya, bo̱l ba kli on ko̱ mi dé on, tongna déna a ling a naïn on maléba kènafèn a ling a naïn on.

¹⁸ Da an guèl on chokna mana. Kè ko̱ mi yé jing chokna yèng an kème kèn kènafèn an naïn on, baï ko̱ kè ba kènafèn a njoukou, da kènafèn nè ba ténakè‐difala‐mbéo‐faltoulkè‐bongkè‐difala‐mbéo‐falbo̱ko̱kè‐difala‐mbéo.