Apocalypse 12 - Féké Testament 1947

¹ Da kli ko̱ loukou fèn to̱ko̱nakè an nonkala; waïn mbéo on ko̱ mi bou séssé mahana ka la, da féou mi na an bo̱ko̱ bo̱kè, da mbélé couronne jing mèssèli botoulè‐séré mi na an toulè.

² Kè mbabil, da kè wan njaka baï ko̱ bonran on mi sé nè ta, da séta on mi mba njakè baï mboungna.

³ Da kli ko̱ fèn to̱ko̱nakè aféké a nonkala; da mono on, loukou sèngnè choï ko̱ mi yé jing toulèli difala‐séré da tèwè mi mane bo, da mbélé diadèmeli difala‐séré mi na toulèli mane bon.

⁴ Da saouto̱kè mi ko̱ko̱ mbéo a woro zéng a saï a mèssèli a nonkala, da wou kli gui koukoula. Da loukou choï mi o bèl mona waïn on ko̱ mi yé mboungna goune, baï ko̱, ko̱ waïn on mi mboung tou, kè ma baï sona goune nè.

⁵ Da kè mboung ba goune wonron on ko̱ yé kè ma na gangna toula pime pouli bon jing bobono réme. Da Ouone ya goune nè hé sé monè guè kangala njaka bara nè.

⁶ Da waïn on ngou sé woropa a guèl on ko̱ Ouone mi mosso baï nè, mono on ko̱ mi ma baï pèngna nè, ma name ténakè‐bo‐faltoulkè‐ténakè‐séré‐falbo̱ko̱kè‐bongkè‐difala‐mbéo.

⁷ Da rounabéré mana a nonkala. Michel da ange nèli mi rou béré jing loukou choï on. Da loukou choï jing ange nèli mi rou béré.

⁸ Da njèran akli tane ga ma ya, da mi jing guèl akli a nonkala ba aféké ya.

⁹ Da kli wou loukou choï on diri guè tiya, tang choï on jinguèl, kè on ko̱ kli bi ling‐è ba Zabolo da Satan, njou‐mongna njoukouli bon a koukoula, kli wou nè diri gui koukoula, da kli wou ange nèli diri gui koukoula jing nè kéng.

¹⁰ Da mè la loukou bounaka béta mi ti guè siya ko̱ gui ka nonkala, ka sa: Kassénaï yana‐baï‐toul mi gui tou, da njèran, da bilkaou a Ouone na, da sana binjaka a Christ nè; baï ko̱ mi wou diri guè tiya njou‐sana kita toula yine nali, kè on ko̱ sa kita toul kli an nona Ouone, ka séssé da ka hangnachoung bon.

¹¹ Da kli gnèrèn nè baï njéna ka ba séme a Goune badoua on, da ka mboro baïnjaka a sana bongbaï akli, da kli tane ga sé hang yana akli ya, tongna bo̱l tèn houl.

¹² Mono on oui jangndaï, o nonkalali, da oui on ko̱ kaou an bilkèli. Bélya guè mona koukoula da loukou‐mbi‐tome! baï ko̱ zabolo guè mone baï jing loukou hèrè baï ko̱ kème toutou ba name nè mi pane gounfènakè on.

¹³ Da ko̱ loukou choï on mi ko̱ kli wou nè guè koukoula tou, kè to̱ko̱ssé hi waïn on ko̱ mboung goune wonron on.

¹⁴ Da mi hi bassana loukou diki séré hi waïn on baï an kème jo̱ guèl woropa an guèlè, guèl on ko̱ pèng nè name da namli, da hanguèl name, mono on, an kème ngou an nona choï on.

¹⁵ Da choïkè mi san same njakè, mahana ka mbina loumi bong a waïn on, baï kè ji an mbina loumi mi fan waïn on ka ta jing nè.

¹⁶ Da koukoula lé mbèla waïn on, da koukoula bourou njakè da ang mbina loumi ko̱ loukou choï on mi san same ko̱ gui kala ka njakè.

¹⁷ Da hèrè mi mba loukou choï on baï toula waïn aïn, da kè sé baï rouna béré jing gara njoukou nèli, kli on ko̱ pèng bong bina baï njaka guingna a Ouone, da pèng bongbaï a Jésus,

¹⁸ Da mè o an toul sarika an none loukou mbi tome.