Apocalypse 11 - Féké Testament 1947

¹ Da mi hi pakala hi mi, mahana ka bobono di, ka sa: Mo ourou siya da lé temple a Ouone, da autel, da kli on ko̱ hiou Ouone an bilkè.

² Da njaka sél ko̱ na kala an njaka temple, mo yèng nè kala da lé nè ya; baï ko̱ mi hi on hi mèran gentili, da kli ma nda ka bo̱ko̱ kli tangna fofoto pou on féou bongkè‐nèng‐faltoulkè‐séré.

³ Da yé mè ma hi njèran hi njou‐sana bongbaï nili séré, da kli ma to̱ko̱ bong njaka Ouone, mane name ténakè‐bo‐faltoulkè‐ténakè‐séré‐falbo̱ko̱kè‐bongkè‐difala‐mbéo, la bouna mone kli ba saki.

⁴ Kli on ba di olivierli séré, da gangnaguèl lampeli séré ko̱ mi o bèl mona Nanjou an koukoula.

⁵ Da tokoré njoukouna mi ji ndingna wonron jing kli, hèlè mi tèn kala an njaka kli da laka bakèlion jing kli bon, da tokoré njoukouna mi ji ndingna wonron jing kli on ba baï kli baï ina nè mahana ka on.

⁶ Njoukouli on jing njèran baï touna nonkala bi rou, an mbame mi to̱ ya, ka name on ko̱ kli pane to̱ko̱na bong njaka Ouone bi kala; da njèran kli mana baï name gangna toula mbi baï komona mbi tèn séme, da wana koukoula jing fèn békékèli bon bo̱ko̱ nyèta mahana ko̱ laou kli ji.

⁷ Da afal ko̱ kli sa bongbaï akli o̱ tou, koukoulion naïn on ko̱ mi tèn kala an bil loukou lo̱ko̱ ko̱ sèkèrèkè mi tiya a yilime ma rou béré jing kli, ka gnèrèn kli, da i kli.

⁸ Da houl akli na bou domboro bil loukou pou on ko̱ bi lingkè ba Sodome da Êgypte, ka mboro esprit, an guèl on ko̱ kli ndé bara Nanjou akli an di croix kéng.

⁹ Da an wora mèran njoukouli toutoul da kadouk toutoul, da njaka baïli toutoul, da pime pouli toutoul, kli ma ko̱ houl akli bo̱l tèn name saï ka hanguèlkè; da kli yèng an njoukouna mi goro houl akli an pal ya.

¹⁰ Da kli on ko̱ bi pou an koukoula, kli kaou ka jangnandaï baï toula kli séré on da kli wal ta, da kli ma pi toul ndo̱ko̱li hi hana, baï ko̱ prophèteli séré on to̱ko̱ssé hi njoukouli on ko̱ bi pou an koukoula.

¹¹ Da afal name saï ka hanguèlkè tou, esprit yana ko̱ gui ka Ouone mba bil kli, da kli ourou siya ka bo̱ko̱ kli, da loukou waou i kli on ko̱ ko̱ kli.

¹² Da kli la bo̱ko̱ loukou baï on ko̱ gui ka nonkala, ka sa hi kli: Oui hé gui guèl aïn. Da kli hé sé nonkala an bil yiri mbame, da bakèlion jing kli ko̱ kli.

¹³ Ka l’heure o̱kèo̱ koukoula to̱ nyèta, da mbéo a woro an zéng a bo a pou on mi lé; da koukoula on ko̱ to̱ i njoukouli mane ténakè‐bongkè‐difala‐séré, da waou i gara njoukouli, da kli hi jonafèn hi Ouone an nonkala.

¹⁴ Go̱ro̱ séta a sérékè mi ta tou. Mono on, go̱ro̱ séta a saïkè ma gui koukoulion.

¹⁵ Da ange a difala‐sérékè mi oul. Da bo̱ko̱ baïli béta nyèta mi ti gui ka nonkala, ka sa: Bilkaou a koukoula gui ba bilkaou a Nanjou na tou, da a Christ nè; da kè ma na gangna kambèlè go̱ kambèlè.

¹⁶ Da tangchidoli bongkè‐séré‐faltoulkè‐nèng on ko̱ o bèl mona Ouone an toul kangala njaka bara akli, kli lé bou da té none kli guè koukoula, da houkou ka hiou Ouone,

¹⁷ ka sa: Na kaou koukoula hi mo, o Nanjou Ouone, Njèran‐honta‐bon, mo on ko̱ mi yé, da mo on ko̱ mi yé jinguèl, baï ko̱ mo ya loukou njèran no tou, da mo na gangna.

¹⁸ Da pime pouli mi kaou jing hèrè; da hèrè no tèn, ka name walabai hi houli mi gui, da name hina toul ndo̱ko̱ hi koï noli prophèteli, da njou‐lana‐bilaouli, da kli on ko̱ ngou waou ling‐o̱, lélé njoukouli tèn loukou njoukouli, da baï ina kli on ko̱ bo koukoula.

¹⁹ Da temple a Ouone ko̱ na a nonkala bourou tou, da kli ko̱ l’arche a bina gonjaka an none hana amè ko̱ na an bil temple nè. Da afal on fana none mbamli mi fan, da njaka baïli toutoul sa baï, da ndouna?-?mbamli mi ndou, da koukoula mi to̱ da sanri mi lé mingta.