Apocalypse 10 - Féké Testament 1947

¹ Da mè ko̱ ange aféké njèrèn ta mi diri gui ka nonkala, da kè bou yiri mbame mahana ka la; da bo̱do̱wo̱ro̱ mi na laou toulè, da nonè mi na mahana ka séssé, da bo̱ko̱ mi na mahana ka dibi hèlè.

² Da lélé takarata on ko̱ mi bourou tou mana an ndo̱kè, da kè ndara bo̱kè an mboro wonron ndo̱kè an none loukou‐mbi‐tome, da bo̱kè an mboro waïn ndo̱kè toul koukoula.

³ Da kè bouka ti guè siya mahana ka mamou ko̱ mi vou; da ko̱ kème vou douna mbamli difala‐séré mi sa baï akli.

⁴ Da ko̱ ndouna mbamli difala‐séré mi sa baï akli o̱ tou, mè nding baï déna baï on an takarata; da mè la bo̱ko̱ on ko̱ mi gui ka nonkala, ka sa: Mo mbo̱lo̱ fènli on ko̱ ndouna mbamli difala‐séré sa, da dé on bi takarata ya.

⁵ Da ange on ko̱ mè ko̱ mi o an none loukou‐mbi‐tome da toul koukoula da ndara wonron ndo̱kè guè siya sé nonkala.

⁶ Kè lou fèn ka ling a kè on ko̱ yan kambèlè go̱ kambèlè, kè on ko̱ mosso nonkala da fènli on ko̱ mi na an bilkè, da koukoula da fènli bon ko̱ mi na an bilkè, da loukou mbi tome da fènli bon ko̱ mi na an bilkè; ko̱ name mi yé ba aféké ya.

⁷ Da ka name bo̱ko̱ a ange difala‐sérékè ko̱ kème hèdi baï oulakè, mono, didissi baï a Ouone mabongkè tou ka mboro bèlabaï, ko̱ kè to̱ko̱ hi koï nèli, propèteli jinguèl tou.

⁸ Da bo̱ko̱ on ko̱ mè la ko̱ gui ka nonkala, mè la nè ba aféké ko̱ sa hi mi, ka sa: Mo sé, mo bi takarata on ko̱ bourou tou an ndo̱ko̱ ange on ko̱ mi o an none loukou‐mbi‐tome da toula koukoula.

⁹ Da mè guè mona ange on, ka sa hi nè, an kème hi lélé takarata on hi mi. Da kè sa hi mi: Mo ya nè, da son nè bon; da yé kè ma joung an bilo̱, da an bil haou‐o̱ mi rita mahana ka nome jourou.

¹⁰ Da mè ya lélé takarata on an ndo̱ko̱ ange da mè son nè tou, da mi rita mahana ka nome jourou an bil haou ni, da ko̱ mème son tou bili mi tissaon baï joungna.

¹¹ Da kli sa hi mi: On ba baï no, an mo féré to̱ko̱ bong njaka Ouone ba aféké toul mèran njoukouli toutoul nyèta da pime pouli da njaka baïli toutoul nyèta, da nanjoukaouli.