Pinali a Njou‐Mboro‐Pinali 22 - Féké Testament 1947

¹ Yindi, tèn babali, oui la bong njaka ni kassénaï, an mème to̱ko̱ fal njaka ni da!

² Da ko̱ klime la ko̱ kème sa baï hi kli ka njaka Hébreu, klime kaou yime, da kè sa:

³ Mè ba Juif, ko̱ mi tèn an pou Tarse, an guèl Cilicie. Mè hon an bil pou aïn, an bo̱ko̱ ndo̱ka Gamaliel, kème ko̱ to̱ko̱ mboro guingna a tangko nali tang guédék hi mi, da noni mi sènta toul baï a Ouone, mahana ka oui bon kassénaï.

⁴ Da mème ndé sène Mboro aïn kéng bo̱l tèn houl, mè gna njoukouli tèn waïnli, ka bou kli voul‐jo̱bo̱.

⁵ Da zaworo sacrificateur tèn sarang a tangchidoli bon, mi ndé sa bong baï ni kéng. Mème ya takarata an ndo̱ko̱ kli baï séna guè mona yindi, baï séna guè pou Damas baï yana kli bon on ko̱ mème jing kli an ndourou, da gna kli gui pou Jèrusalem baï to̱ko̱nassé hi kli.

⁶ Da baï mi gui mahana ka on ko̱ mème pane guina domboro, ka hèdi bèl pou Damas, ko̱ séssé mi o laou toul, koukoulion loukou takanafèn mi taka gui ka nonkala ka cha gui ki mi.

⁷ Da mème lé bou koukoula ka la mbo̱ko̱ on ko̱ mi sa hi mi: Saul, Saul, baïfèn da mome sène mi lé?

⁸ Da mème féré sa: Mo ba guè lé, Nanjou? Da kème sa hi mi: Mè ba Jésus an pou Nazareth, ko̱ mome sène mi.

⁹ Da njoukouli on ko̱ mi sé jing mi, klime ko̱ko̱ takanafèn on ka babaï, da klime tane ga la mbo̱ko̱ baï a kè on ko̱ mi sa baï jing, mi ya.

¹⁰ Da mème sa: Yé mè ma nding ba fèn lé, Nanjou? Da Nanjou mi sa hi mi: Mo ourou siya ka sé guè pou Damas, da yé njoukouna an ndourou ma to̱ko̱ fènli on bon hi mo, ko̱ mi di mo an mome nding.

¹¹ Da ko̱ mème tane ga ko̱ guèl ya baï jonafèn a takanafèn on, kli on ko̱ mi sé jing mi mi ko̱ko̱ ndo̱ko̱ ni da mè gui pou Damas.

¹² Da njoukouna ko̱ ling‐è ba Ananias, njoukou on ko̱ mi pèng bong njaka Ouone ka mboro guingna, da Juifli bon on ko̱ bi an ndourou mi sa bongbaï toulè bèlta.

¹³ Kème gui ka o bèl moni, da sa hi mi: Yine ni Saul, mo ko̱ guèl. Da ka mbé l’heure o̱keo̱ mi mè ko̱ nè.

¹⁴ Da kème sa: Ouone a tangko nali mi wal mo bi baï kaouna mara fal toulè, da baï ko̱na Njou‐guédék, da la baï on ko̱ tèn ka njakè.

¹⁵ Baï ko̱ yé mo ma tèn ba njou‐sana bongbaï nè hi njoukouli bon toul fènli bon on ko̱ mome ko̱ da la tou.

¹⁶ Da kassénaï baïfèn da mome kaou zada lé? Mo ourou siya, ka ya baptême, da tourou békéfèn noli guèfal ka mboro dina ling a Nanjou.

¹⁷ Da baï mi gui mahana ka on ko̱ mème féré guè pou Jérusalem, da mè kaou baï hiouna Ouone an bil temple, mè ko̱ fèn mahana ka lo̱la,

¹⁸ da mème ko̱ Nanjou ko̱ mi sa hi mi: Mo ourou siya gada, ka tèn kala koukoulion ka ourou an pou Jérusalem, baï kli ba jinabo̱ko̱ bongbaï no on ko̱ mome to̱ko̱ ka ling ni tane tiya.

¹⁹ Da mème sa Nanjou, kli fèn kli mi toutou ko̱ mème bou kli on ko̱ mi la bilaou‐o̱ bil voul‐jo̱bo̱, da mème jo̱ kli mane synagogueli bon,

²⁰ da ko̱ klime yé ko̱na séme a Étienne pa njou‐sana bongbaï no, mème ndé kaou bèlkè, da ji bo̱ko̱kè kéng, da pèng la akli on ko̱ mi i nè.

²¹ Da kè sa hi kli: Mo sé, baï ko̱ mè ma pi mo dita sé guè mona pime pouli.

²² Da klime la bo̱l tèn baïnjaka aïn, ka wan njaka guè siya; ka sa: Mo sèkèrè njoukou mahana ka aïn an toula koukoula: Baï ko̱ mi tane mapélékè an kéme yan ya.

²³ Da klime wan njaka guè siya, ka vourou la klili, da wou kon chome sissili guè siya.

²⁴ Loukou kabita mi sa bi njaka kli baï yana nè sé guè laou gangnaguèl bina‐béré, ka foul saon baï nè, da jo̱ nè ka baraza, an kème toutou kong ba baïfèn da klime wan njaka on kon toulè.

²⁵ Da ko̱ klime gna nè jing ga tou, Paul mi sa hi kabita on ko̱ mi o bèl monè: Ka mboro guingna ma an mome jo̱ njoukou ka baraza, kè on ko̱ ba Romain, ko̱ mi tane ga wal baï kon toulè ya lé?

²⁶ Da ko̱ kabita on mi la baï aïn kème guè mona loukou kabita, ka sa hi nè, ka sa: Mo ji ndingna ba fèn kassénaï lé? Baï ko̱ njoukou aïn ba Romain.

²⁷ Da loukou kabita mi guè, ka sa hi Paul: Mo sa hi mi, mo ba Romain lé? Da kème sa: Ii.

²⁸ Da loukou kabita on mi féré sa: Mè hi mbori maïya baï tèna ba dodok njou‐goto pou Romain. Da Paul mi sa: Ami, mè ba njou‐Romain ka gadi goune ni soko.

²⁹ Da on kli on ko̱ mi foul fal baï nè yèng nè ka ourou koukoulion. Da waou mi ndé i loukou kabita on kéng, ko̱ kème toutou ko̱ Paul ba Romain, da baï ko̱ kème gna nè tou.

³⁰ Da ko̱ guèl mi taka tou, kè ji tounakè tang kong ba baïfen da Juifli mi sa kita kon toulè lé, kème sèlè, da sa bi njaka loukou sacrificateurli tèn njou‐walabaïli bon baï ndoïna; da kème ya Paul diri gui tiya, da ba nè bi hanguèl kli.