Pinali a Njou‐Mboro‐Pinali 21 - Féké Testament 1947

¹ Da baï mi gui mahana ka on ko̱ name yèng kli, na kaou bateau da sé tane guè njaka koua Cos, da afal pélé mi taka na kan pou Rhodes, name do̱li an ndourou da sé guè pou Patara.

² Da ko̱ name jing bateau on ko̱ mi guè baï hèna mbi sé guè guèl Phénicie, name kaou bil bateau on da sé ka none mbi.

³ Da ko̱ name ko̱ koua Chypre, name yèng nè bi mboro waïn ndo̱ko̱ na, ka ta ama sé guè guèl Syrie, da name tèn kala an pou Tyr, baï ko̱ bateau ma o guèl on baï fana holali tèn kala an ndourou.

⁴ Da ko̱ name jing njou‐séna bongli tou, name kaou ndourou ma name difala‐séré. Da njou‐séna bongli on mi sa hi Paul ka mbora Esprit, dadaon an kème tane sé guè pou Jérusalem ya.

⁵ Da ko̱ name na mi o̱tou, name ourou ka sé ama, da kli bon jing waïnli tèn goundi mi gui jing na, ka ba na bi domboro bo̱l tèn kala an bèl pou, da name houkou an njaka nguéng ka hiou Ouone, da na name hana.

⁶ Da name kaou ama bateau, da klime féré akli sé guè voul klili.

⁷ Da ko̱ name ta none‐mbi pou Tyr tou, name kan pou Ptolemaïs, da na name yindi an ndourou, da kaou jing kli ma name mbéo.

⁸ Da ko̱ pélé mi taka tou, name do̱li ka gui pou Césarée, name guè bil voula Philippe ko̱ ba njou‐sana bèlabaï, kè on ko̱ ba mbéo an wora njoukouli on difala‐séré, da name kaou jing nè.

⁹ Da njoukou aïn makaou jing goune waïn tikilali nèng, ko̱ mi to̱ko̱ bong njaka Ouone.

¹⁰ Da ko̱ name kaou ndourou ma name hanali prophète hana mbéo ko̱ ling‐è ba Agabus, kème ourou ka guèl Judée da diri gui.

¹¹ Da kème gui mona, da bi ga gnana Paul, da gna bo̱kè jing ndo̱kè rou fènè, ka sa: Saint‐Esprit mi sa on: Mahana ka on, yé Juifli an pou Jérusalem ma gna njoukou ko̱ ba nanjou a ga aïn mahana ka on, da kli ma hi nè bi ndo̱ka gentili.

¹² Da ko̱ name la baï aïnli tou na jing njoukouli ko̱ mi kaou guél on, mi sa jo̱jo̱ nè, baï an kème tane hé sé guè pou Jérusalem ya.

¹³ Mono Paul mi féré sa: Baïfèn da ouime nding fèn lénaléou da ho̱ko̱ laou ni on lé? Baï ko̱ mème tane hèdi ba baï gnana mi ka ho̱kè ya, da ba baï ndé houl kéng an pou Jérusalem baï toul ling a Nanjou Jésus.

¹⁴ Da ko̱ name panran nè pélé, name yèng ka sa: An fèn kaouna mara fal toula Ouone mi nding!

¹⁵ Da afal ko̱ name o̱kèo̱li mi o̱tou, name rame hola nali, ka hé sé guè pou Jérusalem.

¹⁶ Da njou‐séna bong hanali an pou Césarée mi ndé sé jing na kéng, klime ya na guè mona Mnason an koua Chypre, chido njou‐séna bong, an name so̱ro̱ jing nè.

¹⁷ Da ko̱ name kan pou Jérusalem tou, yindi mi pame na ka wala.

¹⁸ Ko̱ guèlapélé mi taka tou, na jing Paul mi sé guè voula Jacques, da tangchidoli bon mi ndoï an ndourou.

¹⁹ Da ko̱ kème name kli bon tou, kè to̱ko̱ bong fènli mane mbéo mbéo bon ko̱ Ouone mi nding an wora mèran gentili ka mboro ndingna bakara nè.

²⁰ Da ko̱ klime la baï aïn kli jone Ouone, da kli sa hi nè: Yine, mo ko̱ njoukouli ro̱ko̱ maïya an wora Juifli ko̱ mi la bilaou tou, da none kli bon mi sènta baï a guingna.

²¹ Da klime lala an falo̱, ko̱ mome to̱ko̱ fèn hi Juifli on bon ko̱ mi kaou wora mèran gentili baï pongna Moïse, da mome sa hi kli baï ina gassa hi goune klili ya, ka tane boufal dofènli ya.

²² Mono on, yé na nding ba fèn lé? Baï ko̱ kli ma lala bon ko̱ mo gui tou, da ro̱kè njoukouli ma ndoï.

²³ Mono on, mo nding mahana ko̱ name sa hi mo. Njoukolui nèng makaou an woro na ko̱ mi bi gonjaka kli.

²⁴ Mo ya kli guè ka ndé nding dofèn toura mono jing kli, ka hi fèn hi kli baï an klime po toul kli, da njoukouli bon ma toutou baï on ko̱ klime lala an falo̱ ba wo̱ko̱, da mo fèno mi ndé sé guédék kéng ka bou fal guingna.

²⁵ Da baï a Gentili on ko̱ mi la bilaou tou, name dé takarata jinguèl hi kli, ka wal baï ba dadaon klime chang fèn on ko̱ klime pou ngala rou hi ndamli, da séme, da naïn on ko̱ hou bouroume, da ndingna rome.

²⁶ Da on ko̱ pélé mi taka tou, Paul mi ya njoukouli on, da afal ko̱ kème ndé nding dofèn toura monè jing kli tou, kème ri guè bil temple baï to̱ko̱na bongkè ka wéré nonkè kong ba ma name ro̱ko̱ ane da ma o̱, da hi toul ndo̱ko̱ mane mbéo mbéo bon.

²⁷ Da ko̱ name an difala‐sérékè mi nding baï o̱na, Juifli an guèl Asie, ko̱ klime ko̱ Paul an bil temple, klime rabo̱ke jing ro̱kè njoukouli on bon da klime ba nè.

²⁸ Kli wan njaka guè siya: Njoïli an pou Israël, oui gui lé mbèla, kè ba njoukou on mini ko̱ mi to̱ko̱ fèn hi njoukouli manguèl bon baï pongna njoukouli, da baï pongna guingna, da tangna fofoto guèl aïn, da ko̱ kème yé tana an fal aïn kème ndé ya Grecli gui bil temple aïn kéng, baï poukouna tangna fofoto guèl aïn.

²⁹ Baï ko̱ klime ko̱ Trophime njou pou Éphèse jing nè an bil pou aïn dambèl, da klime kèrè ba Paul mi ya nè jing nè guè bil temple.

³⁰ Njoukouli an bil pou bon mi nding zaou, da kli bon mi ngou jing hana ka ba Paul da bourou nè tèn kala an bil temple, da klime tou njakè bi rou koukoulion.

³¹ Da ko̱ klime nza mborokè baï ina nè, tilikè mi ti kan mona loukou kabita an sarang a tourougouli, ba pou Jérusalem bon mi nding zaou.

³² Da koukoulion, kème ya tourougouli da kabitali, ka ngou gui mone kli, da ko̱ klime ko̱ loukou kabita jing tourougouli on, klime yèng wana Paul.

³³ Da on loukou kabita mi guè monè ka ba nè, da sa bi njaka kli baï gnana nè jing sal réme séré, da kème oui kli kong kè ba guè, maléba fèn mi ko̱ kè nding lé?

³⁴ Danjoukou hanali mi wan pomna toul baï mbéo, da njoukou afékéli mi wan pomna toul baï aféké ka toul an wora ro̱kè njoukouli on. Da ko̱ kème tane ga ma baï lana baï toul zaou on tang ya, kème sa bi njaka kli baï yana Paul sé guè laou gangnaguèl bina béré.

³⁵ Da ko̱ klime guè héna bong pangna, dadaon tourougouli mi bi nè da, baï ko̱ ro̱kè njoukouli mi nding fèn njèrèn ta;

³⁶ da ro̱kè njoukouli on mi tong falè, ka wan njaka guè siya: Mo i nè da!

³⁷ Da ko̱ klime nding baï yana Paul sé guè laou gangnaguèl bina béré on, kème oui loukou kabita on: Mo jiji an mème sa goune baï hana hi mo lé? Da kabita mi oui nè: Mo toutou njaka grec lé?

³⁸ Mo ba njou pou Égypte on mini ya lé? Ko̱ ambèl name aïnli mi ti nding zaou ka lang njoukouli ténakè‐bongkè‐nèng an woropa, da klime tèn ba njou‐ina njoukouli mini ya lé?

³⁹ Da Paul mi sa: Mè ba Juif, an pou Tarse, an guèl Cilicie, mè tane ti ba njoukou an bil lélé pou ya. Mè sa jo̱jo̱ no an mome yèng mi an mème sa baï hi njoukouli.

⁴⁰ Da ko̱ kème ji bo̱ko̱kè tou, Paul mi o an toul pangna, ka to̱ko̱ ndo̱kè hi njoukouli on, da ko̱ klime kaou yime, kè sa baï hi kli ka njaka Hébreu, ka sa: