Pinali a Njou‐Mboro‐Pinali 17 - Féké Testament 1947

¹ Da Paul kira Silas mi ta ka guèl Amphipolis da Apollonie da sé kan pou Thessalonique, an guèl on synagogue a Juifli mana ndourou.

² Da Paul mi sé jing kli guè bil synagogue on mahana ka dofèn ndingna nè, da ka name sabbat saï kème wara kli jing baï an bil Takarata a Ouone,

³ ka wéré nonkè bi kala ka sa saonkè ko̱ on ba babaï ko̱ dadaon Christ mi to̱ko̱ssé da tome an wora houli. Da ba Jésus on mono ko̱ mème sa mboura hi oui, da kè fènè mi sa kè ba Christ.

⁴ Da njoukou hanali mi ji bo̱ko̱kè, ka ndoï jing Paul da Silas, tèn ro̱kè Grecli on ko̱ mi waou nona Ouone jing ho̱ko̱na waïnli nyèta.

⁵ Da Juifli, baï ko̱ klime fan hang, klime ya béké njoukouli an wora njou‐pouli guè jing kli, da ndoï njoukouli nyèta, da rabo̱kè nyèta an pou on, kli nding zaou guè voula Jason, ka nza mborokè baï yana Paul kira Silas guè mona njoukouli.

⁶ Da ko̱ klime nza kli pélé, kli bourou Jason jing yine nè hanali guè mona zaworo pouli, ka wan njaka guè siya: Njoukou aïnli ko̱ mi joukourou njou‐koukoulali mi ndé kan guèl aïn kéng,

⁷ da Jason mi ya kli guè bil voulè, kli on bon ko̱ mi nding fèn baï pongna guingna a César, ka sa nanjoukaou aféké makaou ko̱ ba Jésus.

⁸ Da ko̱ ro̱kè njoukouli da zaworo pouli mi la baï on mone kli mi hou mbi.

⁹ Da ko̱ klime bi njaka kli hi Jason da njoukou afékéli bon, kli yèng kli sé.

¹⁰ Da koukoulion, yindi mi pi Paul kira Silas ka hangnachoung sé guè pou Bérée. Da ko̱ klime kan soko tou, kli ri sé gué bil synagogue a Juifli.

¹¹ Da Juifli on ko̱ kaou ndourou mi bèl maïya ta toula Juifli on ko̱ kaou pou Thessalonique; baï ko̱ klime ya baïnjaka gata an bil go̱ro̱ kli, da foul fal Takarata a Ouone name bon baï touna kong ba fèn aïnli ba babaï lé.

¹² Mono on hanali nyèta mi la bilaou, tèn ho̱ko̱na waïn Grecli kéng, jing wonron njoukouli nyèta.

¹³ Da ko̱ Juifli an pou Thessalonique mi la ba Paul mi ndé sa mboura baïnjaka Ouone an pou Bérée kéng, klime sé tèn ndourou kéng da joukourou go̱ra ro̱ké njoukouli on, da mone kli mi hou mbi.

¹⁴ Da on yindi mi pi Paul koukoulion sé bo̱l tèn guè bèl loukou mbi tome, da Silas kira Timothée mi pane akli an ndourou.

¹⁵ Da kli on ko̱ mi ba Paul sé baï to̱ko̱na mboro hi né, klime ndé sé jing nè bo̱l tèn pou Athènes. Da ko̱ Paul mi sa bi njaka kli baï sana hi Silas kira Timothée an klime gui monè gada, klime féré fal.

¹⁶ Da ko̱ Paul mi pane vora kli an pou Athènes, an bilè go̱ra esprit nè mi sé nè ta, ko̱ kème ko̱ pou on mi mba jing fèn ndamli.

¹⁷ Mono, kème wara Juifli an bil synagogue, da njoukouli on ko̱ pèng bong njaka Ouone, tèn njoukouli on ko̱ kème jing kli name bon an guèl zénacho̱ko̱.

¹⁸ Da chokna njoukouli a épicurien, da stoicienli mi gui baï sana baï jing nè. Da njoukou hanali mi sa: Njou‐wènwèk baï aïn mi ji sana ba fèn lé? Da njou‐afékéli mi sa: Kè ba njoukou on ko̱ mi to̱ko̱ baï a goni ouondi, baï ko̱ kème sa mboura toula Jésus da toula tomnahoulkèli.

¹⁹ Da klime ya nè gui guèl Aréopage, ka sa: Yé na ma baï touna féké to̱ko̱nafén on ko̱ mome to̱ko̱ ba fèn ya lé?

²⁰ Baï ko̱ mome sa féké baï ka toul kon soukou na. Mono na ji baï touna saon baï on kong ba mi na ane dé.

²¹ Baï njoukouli an pou Athènes tèn goni njoukouli bon ko̱ mi bi pou ndourou klime kaou baï ndingna fèn aféké ya, wara baï sana baïli maléba baï lana féké baïli ya.

²² Da Paul mi o njaka Aréopage, ka sa: Oui njoukouli an pou Athènes, mè ko̱ko̱ ko̱ ouime waou a ndamli tèn fènli bon.

²³ Baï ko̱ mème sèrè, mè ko̱ fènli on ko̱ ouime hiou, mè ko̱ an bèl autel hana on ko̱ mi sa: On ba a ouone hana ko̱ name tane ga tou nè ya. Mono fèn on ko̱ ouime hiou da tane ga tou ya, mè ma to̱ko̱ fèn on hi oui.

²⁴ Ouone ko̱ mi mosso koukoula jing fènli bon on ko̱ mi na an bilkè, kè ba Nanjou an nonkala da an koukoula, kè tane ga bi an bil temple on ko̱ ndo̱ka njoukou mi za ya;

²⁵ da ndo̱ka njoukouli mi tane ga nding bakara hi nè ya, mahana yé ba ko̱ fèn mi nak nè on ya, baï ko̱ kè fènè mi hi yana hi fènli bon, da gouriyafèn tèn fènli bon.

²⁶ Da kème mosso pime pouli bon ka ba mbé séme mbéo baï kaouna manguèl an toul koukoula bon, da kème badi saka kli bon bèlta, da an guèl kaouna akli bon ko̱ klime kaou ndourou.

²⁷ Mono on dadaon, an klime nza Ouone, da ka touya kli ma laïbi fakara guèl baï toulè da kli ma jing nè, tongna on kème kaou diya jing na mane bon,

²⁸ baï ko̱, mbo̱lkè name yan, da sé, da na makaï. Mahana ka njoukou on ko̱ mi mosso dinassing abaï hanali mi ndé sa on kéng: Na ba mbé mèrèn nè kéng.

²⁹ Mono baï ko̱ na ba mèran a Ouone, tane ti an name bi hang na ka kèrè ba Ouone babaï mi mahana ka l’or, maléba l’argent, maléba kone on ko̱ njoukou mi guèk ka fél ya.

³⁰ Mono ka saka tounafèn ya, Ouone mi ko̱ on na bo̱on, da kassénaï kème sa hi njaka njoukouli manguèl bon baï hèkèna akli.

³¹ Baï ko̱ kème badi name on ko̱ yé kè ma wal baï hi njou‐koukoulali, ka mboro ndingna guédék, jing njoukou on ko̱ kème walè bi, ka hi tounassaon hi njoukouli bon tou, ko̱ kème tome nè an wora houli.

³² Da ko̱ klime la baï toul tomnahoulkèli an wora houli, njoukou hanali mi gaï nè, da njoukou afékéli mi sa: Yé na ma la baï no ba aféké da.

³³ Da mono, Paul mi ourou an woro kli, ka sé.

³⁴ Da njoukou afékéli mi ndoï jing nè, da klime la bilaou an woro kli ba Denys njou guèl Aréopage da waïn hana mbéo ko̱ ling‐è ba Damaris da njoukou afékéli mi ndé jing kli kéng.