Pinali a Njou‐Mboro‐Pinali 16 - Féké Testament 1947

¹ Da Paul mi gui tèn pou Derbe, da pou Lystre, mono kè ko̱ njou‐séna bong hana mbéo an soko ko̱ ling‐è ba Timothée goune a waïn Juif, kème la bilaou tou, da baba nè ba njou Grec.

² Yindi on ko̱ mi kaou an pou Lystre da an pou Icone, mi sa bongbaï toulè bèlta.

³ Paul mi ji baï yana Timothée sé jing nè, da kème ya nè ka i gassa hi nè, baï toula Juifli on ko̱ kaou soko, baï kli bon mi toutou ko̱ baba nè ba njou‐Grec.

⁴ Da ko̱ klime ta mane bil pouli bon, klime sa bi njaka kli baï bouna fal baï on ko̱ njou‐mboro‐pinali da tangchidoli ko̱ mi kaou an pou Jérusalem mi wal baï hi kli.

⁵ Da mona église bon mi pou kli ka tounassaon, da klime taïnkon guèbassoko.

⁶ Da klime ta ka bil sél koukoula an guèl Phrygie da an guèl Galatie, baï ko̱ Saint‐Esprit mi dèn kli baï sana baïnjaka an guèl Asie.

⁷ Da ko̱ klime gui hèdi bèl pou an guèl Mysie, kli ré baï séna guè guèl Bithynie; da Esprit a Jésus mi dèn kli.

⁸ Da klime ta guèl Mysie, ka diri sé guè pou Troas.

⁹ Da ka hangnachoung Paul mi ko̱ fèn mahana ka lo̱la ko̱ njoukou an guèl Macédoine mi o bèl monè, ka sa jo̱jo̱ nè, ka sa: Mo gui an guèl Macédoine, ka lé mbèla.

¹⁰ Da ko̱ kème ko̱ fèn on ko̱ mi mahana ka lo̱la o̱tou, koukoulion, name nza mborokè gata baï séna guè guèl Macédoine, baï ko̱ name kèrè ka go̱ro̱ na ba Ouone mi ko̱ di na baï sana mboura bèlabaï hi kli an ndourou soko.

¹¹ Da mono on, name ourou an pou Troas ka bateau da sé tane ka none mbi guè pou Samothrace, da afal name mbéo name kan pou Néapolis.

¹² Name ourou an ndourou, ka sé guè pou Philippes on, ko̱ mi na an guèl Macédoine, loukou nguili pou an bil sél koukoula on, ko̱ ba ndé bil sél kaou kéng, name kaou pou on ma name hanali.

¹³ Da ka name sabbat, name tèn sé gué fal ngalang an bèl doro mbi, ko̱ name kèrè ka go̱ro̱ na, guèl on ba guèl hiouna Ouone, da name kaou ka sa baï hi waïnli on ko̱ mi ndoï an ndourou.

¹⁴ Da waïn hana mbéo, ko̱ ling‐è ba Lydie, kè ba waïn an pou Thyatire, kème jo̱l bitibiti la, da kè ba waïn ko̱ hiou ba Ouone, da ko̱ kème la baï na, Nanjou bourou go̱rè baï lana baï on ko̱ Paul mi sa.

¹⁵ Da ko̱ kème ya baptême tèn njou‐voulèli, kème sa jo̱jo̱ na, ka sa: Tokoré ouime wal baï ni ba bèla lodok waïn a Nanjou, oui ri gui bil vouli da kaou ndourou. Da kème laïbi toula da name sé jing nè.

¹⁶ Da baï mi gui mahana ka on ko̱ name guè séna guè guèl hiouna Ouone, goune waïn bakara hana mbéo mi woutoul jing na an domboro ko̱ mi jing béké esprit guèknafèn, kème jing mbo̱ri nyèta hi nanjou nèli baï mboro guèknafèn nè.

¹⁷ Goune waïn aïn mi tong bong a Paul da na, ka wan njaka guè siya, ka sa: Njoukou aïnli ba njou‐bakarali a Ouone an nonkala guè Sèkèrè Guèl Ndèk, ko̱ mi to̱ko̱ mboro yana‐baï‐toul hi na.

¹⁸ Da kème nding on ma name nyèta. Da Paul mi tanta, ka ki ènrèn da sa hi esprit on: Mè sa bi njako̱ ka bil ling a Jésus‐Christ baï tèna kala an bilè. Da esprit on mi tèn kala ka mbé l’heure o̱kèo̱.

¹⁹ Da ko̱ nanjou nèli mi ko̱ko̱ ko̱ oliya jingna fèn kli mi o̱tou, kli ba Paul kira Silas, da bourou kli an guèl zénachoko sé guè nona zaworoli.

²⁰ Da ko̱ klime ya kli gui mona gangna pouli tou, kli sa: Njoukou aïnli ba Juifli, klime gui bil pou na da hi go̱ra njoukouli hou mbi nyèta,

²¹ ka to̱ko̱ dofènli on ko̱ ka mboro guingna tane ma an name yanakè maléba bouna falkè ya, baï ko̱ na ba njou‐Romainli.

²² Da ro̱kè njoukouli on mi ourou siya jing hana ka pong kli, da gangna pouli mi go̱ro̱ la kli kon pa guèfal an mone kli, da klime sa bi njaka njoukouli baï an klime wan kli ka ping di.

²³ Da ko̱ klime wan kli nyèta tou, kli kon kli bil voul jo̱bo̱, ka wara njou‐pèngna njaka voul jo̱bo̱ baï pèngna kli bèlta.

²⁴ Da ko̱ kème la bina baïnjaka on kème bi kli an taka voul jo̱bo̱ ka bou di bo̱ko̱ kli.

²⁵ Da hèdi hangnachoung loukou, Paul kira Silas mi hiou Ouone ka di sing hi Ouone, da njou‐jo̱bo̱li mi voro soukou kli ka la,

²⁶ da koukoulion koukoula mi to̱ maïya, mono bètè voul jo̱bo̱ mi lang bon, da njaka mboro voul jo̱bo̱ mi bourou bon koukoulion, da fènli on ko̱ klime gna njou‐jo̱bo̱li rou mane bon mi sél guèfal.

²⁷ Da ko̱ njou‐pèngna voul jo̱bo̱ mi tome name, da ko̱ njaka mboro voul jo̱bo̱ mi bourou bon, kème kèrè ba njou‐jo̱bo̱li mi ngou bon tou, da kè rou gamba baï ina monè rou.

²⁸ Da Paul mi wan njaka guè siya, ka sa: Mo nding fèn bèlya jing mono ya, baï ko̱ na bon makaï.

²⁹ Da njou‐pèngna voul jo̱bo̱ on mi oui baï hèlè ka ngou guè bil voulou, da monè mi to̱ nè, kème lé bou mbèla Paul kira Silas;

³⁰ da kème ya kli tèn gui kala, ka sa: Njoïli, yé mè ma baï ndingna ba fèn da kou lé?

³¹ Da Paul kira Silas mi sa: Mo la bilaou a Nanjou Jésus, da yé mo ma kou, mo tèn voulo̱.

³² Da klime sa baïnjaka Nanjou hi nè tèn kli bon on ko̱ mi kaou an bil voulè.

³³ Da kème ya kli ka mbé hangnachoung o̱kèo̱, da tourou nongno on ko̱ klime wan, da koukoulion kème ya baptême, kè tèn njoukou nèli.

³⁴ Da kème ya kli gui bil voulè, ka hi laka hi kli, ka jangndaï nyèta tèn voulè bon, baï ko̱ klime la bilaou a Ouone tou.

³⁵ Da ko̱ guèl mi taka kon koukoula tou, gangna pouli mi pi tourougouli guè mona njou‐pèngna voul jo̱bo̱, ka sa: Oui yèng njoukou aïnli sé.

³⁶ Da njou‐pèngna voul jo̱bo̱ mi sa njaka pina kli hi Paul, ka sa: Gangna pouli mi pi gui baï yèngna oui; mono on oui tèn kala, ka sé ka go̱ro̱ iki.

³⁷ Da Paul mi sa hi kli: Klime wan na tane walabaï an nona ro̱kè, na ko̱ ba njou‐Romainli, da klime bou na bil voul jo̱bo̱, da kassénaï klime ji baï yèngna na ka foli lé? Tane ti on ya, klime gui fèn kli, da téne na tèn kala.

³⁸ Da tourougouli mi féré ka sa bong baïnjaka on hi gangna pouli, da waou mi i kli ko̱ klime la kli on ba njou‐Romainli,

³⁹ da klime gui mone kli, ka panran kli. Da ko̱ klime téne kli tèn gui kala tou, kli sa jo̱jo̱ kli baï oura an pou kli.

⁴⁰ Da ko̱ klime tèn kala an voul jo̱bo̱, kli sé guè voula Lydie, da ko̱ klime ko̱ yindi tou, klime wara kli, ka ourou.