Pinali a Njou‐Mboro‐Pinali 12 - Féké Testament 1947

¹ Ka mbé saka o̱kèo̱, nanjoukaou Hérode mi nding baï sèna njoukou hanali an église.

² Da kème i Jacques yine a Jean ka gamba.

³ Da ko̱ kème ko̱ko̱ ko̱ fèn aïn mi bi wélé toula Juifli ta, kème ndé kèrè baï bana Pierre kéng. Ka name o̱kèo̱ ba name mossona mapa tane vounafèn.

⁴ Da afal ko̱ kème ba nè tou, kè bou nè bil voul‐jo̱bo̱, da bi tourougouli ka douk guèl nèng, an douk mbéo tourougouli mane nèng baï pèngna nè, baï kè ji ba name Pâque mi o̱tou, kè ma ya nè gui nona njoukouli.

⁵ Mono, Pierre mi kaou bil voul jo̱bo̱; da église mi laïbi hiouna Ouone baï toulè.

⁶ Ka hangnachoung on ko̱ Hérode mi kèrè baï yana nè tèn guè, Pierre mi na name an zéng a tourougouli séré, kli gna nè jing sal réme séré; da njou‐pèngna fènli mi o ka pèng njaka mboro voul‐jo̱bo̱.

⁷ Da mono, ange hana mbéo a Nanjou mi tèn gui o bèla monè, da takanafèn mi cha an bil voul jo̱bo̱. Da ange aïn mi bal bèl hang a Pierre ka tome nè, da sa: Mo ourou siya gada. Da sal réme mi ta lé yèlèk guèfal an ndo̱kè.

⁸ Da ange mi sa hi nè: Mo gna ga no da bou sabo̱ko̱ no, da kème nding on. Da ange mi sa hi nè: Mo bou loukou la no ka gui fali.

⁹ Da Pierre mi tèn kala da tong bong‐è, da kème tane ga tou fèn aïn ko̱ ange mi nding ba babaï ya, da kème bi laou‐è ka kèrè ba kème ko̱ fèn mahana ka lo̱la.

¹⁰ Da ko̱ klime ta titili njou‐pèngna fènli, ka gui ta an sérékè, kli gui tèn njaka mboro réme on ko̱ mi sé tèn pou, njaka mboro réme on mi bourou fènè an mbèl kli, da klime tèn kala, da ko̱ klime ta domboro pou mbéo tou, koukoulion ange mi ourou an mona Pierre.

¹¹ Da ko̱ Pierre mi kèrè fal monè, kè sa: Kassénaï mè toutou ka babaï, ko̱ Nanjou mi pi ange nè, baï séla mi an ndo̱ka Hérode, da baï séla mi an fènli on bon ko̱ njou‐Juifli mi voro.

¹² Da ko̱ kème kèrè fal monè tou, kè sé guè voula Marie ma a Jean, ko̱ kène ling‐è ba Marc, an guèl on ko̱ njoukouli mi ndoï nyèta baï hiouna Ouone.

¹³ Da ko̱ kème hang njaka mboro, goune waïn bakara hana, ko̱ ling‐è ba Rhode, mi gui baï vorakè.

¹⁴ Da ko̱ kème la mbo̱ka Pierre, kè tane ga bourou njaka mboro ya baï sakana ko̱ mi kara nè, da kème ngou féré fal sé guè bil voulou, ka sa ba Pierre mi o an njaka mboro.

¹⁵ Da klime sa hi nè: Mo ba ngawa. Da kème sa ko̱ on ba babaï. Da kli sa: Kè ba ange nè.

¹⁶ Da Pierre mi laïbi ka hang ba hangnakè, da ko̱ klime bourou njaka mboro tou, kli ko̱ nè, da laou kli mi sé siya.

¹⁷ Da Pierre mi to̱ko̱ ndo̱kè hi kli ba klime kaou yime, da kème to̱ko̱ bongkè hi kli mahana ko̱ Nanjou mi téne nè tèn kala an bil voul jo̱bo̱. Da kème sa: Oui sa bongkè hi Jacques da yindi. Da kème ourou an mone kli, da do̱li sé guèl aféké.

¹⁸ Da ko̱ guèl mi taka tou, loukou baï mana an wora tourougouli, baï touna guèl on ko̱ Pierre mi kaou ndourou.

¹⁹ Ko̱ Hérode mi nza nè da tane ga jing nè ya, kème foul fal baï on jing njou‐pèngna fènli, da kème bi njakè baï ina kli. Da Pierre mi ourou an guèl Judée da do̱li sé guè pou Césarée, da kaou guè ndourou.

²⁰ Da Hérode mi gnoron njoukouli an pou Tyr da Sidon ta, da klime ndoï ka laou mabahana guè monè, da afal ko̱ klime jing Blaste, ko̱ ba njou‐mossona guèl name a nanjoukaou, baï bana bako̱la jing kli, kli oui nè baï go̱ro̱ iki, da baï ko̱ pou a nanjoukaou mi mbé pou kli.

²¹ Ka name o̱kèo̱ kème kèn name hi kli da Hérode mi bou bèla la gangna pou, da kaou toul kangala njaka bara nè, ka sa loukou tènrèn baï hi njoukouli an nona ro̱kè.

²² Da njoukouli mi wan njaka guè siya: On ba njaka ouone hana ka tane ti ba njaka njoukou ya.

²³ Da koukoulion, ange a Nanjou mi wan nè, baï ko̱ kème tane ga hi jonafèn on hi ba Ouone ya, da wali mi laka nè da kème hou.

²⁴ Da baïnjaka Ouone mi ti nyèta da taïnkon guèbambèl.

²⁵ Da Barnabas kira Saul mi ourou an pou Jérusalem, da ré féré fal ko̱ klime nding pina kli o̱tou, da klime ya Jean ko̱ kène ling‐è ba Marc guè jing kli.