Pinali a Njou‐Mboro‐Pinali 11 - Féké Testament 1947

¹ Da njou‐mboro‐pinali tèn yindi on ko̱ mi kaou an guèl Judée, mi lala ko̱ mèran gentili mi ndé ya baïnjaka Ouone kéng.

² Da ko̱ Pierre mi hé sé guè pou Jérusalem, kli on ko̱ mi i gassa fa baï jing nè,

³ ka sa: Mo ri guè bil voula njoukouli on ko̱ mi tane ga i gassa ya, da mo son laka jing kli.

⁴ Da Pierre mi tissaon baï to̱ko̱na bongbaï aïn bon ka saonkè hi kli,

⁵ ka sa: Mè makaou baï hiouna Ouone an pou Joppé, da mè ko̱ fèn mahana ka lo̱la da fèna mi diri gui mahana ka ba loukou la ka kouroukè nèng gui ka nonkala, da on mi gui moni.

⁶ Da ko̱ mème pane ènrankè mbilili mè kèrè falkè da mè ko̱ naïnli a koukoula on ko̱ bo̱ko̱ kli nèng, da goune saïnli on ko̱ koro, tèn ndoïli an nonkala.

⁷ Da mème la mbo̱ko̱ baï on ko̱ mi sa gui hi mi: Mo ourou siya, Pierre, ka i, ka son.

⁸ Da mème sa: Haï, Nanjou, baï ko̱ fèn bèlya maléba fèn dakame tane ga ri an bil haou ni bo̱ko̱ mbéo ya.

⁹ Da mbo̱ko̱ baï mi kaïn féré gui ka nonkala bo̱ko̱ séré: Fèn on ko̱ Ouone mi tourou tangta tou, mo ko̱ mahana ka fèn on ko̱ bèlya ka dol ya.

¹⁰ Da fèn on mi diri gui mane bo̱ko̱ saï, da fènli on bon mi féré ré sé guè nonkala.

¹¹ Da mono koukoulion, njoukouli saï mi gui ka o njaka mboro on ko̱ name kaou ndourou, ko̱ mi pi kli gui moni ka pou Césarée.

¹² Da Saint‐Esprit fènè mi sa hi mi baï séna jing kli, ka tane fa baï hana mbéo ya. Da yindi difala‐mbéo aïnli mi ndé ba mi sé kéng, da name ri guè bil voula njoukou on.

¹³ Da kème sa bongkè hi na ka mboro hane mi ko̱ kème ko̱ ange mi o bil voulè, da ange aïn mi sa: Mo pi sé guè pou Joppé baï yana Simon on ko̱ kène ling‐è ba Pierre mi gui,

¹⁴ ko̱ ma sa baïnjaka hi mo, da yé mo ma kou ka mboro baï aïn, mo tèn voulo̱ bon.

¹⁵ Da ko̱ mème tissaon baï sana baï Saint‐Esprit mi diri gui kon toul kli mahana ka on ko̱ mi diri gui toula ti dambèl.

¹⁶ Da mème bi laou ni toul baïnjaka Nanjou, ko̱ kème sa: Jean nding baptême ka babaï jinguèl ka mbi, da yé oui ma ya baptême ka Saint‐Esprit.

¹⁷ Da on tokoré, Ouone mi ndé hi mbé toul ndo̱ko̱ hi kli mahana ko̱ kème hi na kéng, ko̱ name la bilaou a Nanjou Jésus‐Christ ka tang ambèl, mè ba guè da njèran baï dèna Ouone dé?

¹⁸ Da ko̱ klime la baï aïn tou, klime kaou yime da jone Ouone, ka sa: Mono Ouone mi ndé hi mèran gentili kéng baï hèkèna békéfèn ka jing yana.

¹⁹ Da mono kli on ko̱ mi yaïli manguèl ka bong to̱ko̱nassé a Étienne, klime sé dita bo̱l tèn pou Phénicie da Chypre, da pou Antioche, da klime tane ga sa baïnjaka hi njoukou afékéli ya, da hi ba Juifli ka ho̱ko̱ kli.

²⁰ Da njou‐hanali an woro kli ba njoukouli an Chypre da pou Cyrène, da ko̱ klime kan pou Antioche, kli ndé sa mboura bèlabaï hi Grecli kéng, kli sa mboura bèlabaï a Nanjou Jésus.

²¹ Da ndo̱ka Nanjou mi na jing kli, da njoukouli nyèta ko̱ la bilaou mi ki go̱ro̱ kli guè mona Nanjou.

²² Da tiri baï kli mi ti ri souka njoukouli an église on ko̱ kaou an pou Jérusalem, da klime pi Barnabas sé bo̱l tèn pou Antioche.

²³ Da ko̱ kème kan tou, da ko̱ ndingna mbo̱l a Ouone, kè jangndaï, da kème wara kli bon ka ba badinafèn a go̱ro̱ kli, klime laïbi jing Nanjou.

²⁴ Baï ko̱ kè ba bèla njoukou, da mba ka Saint‐Esprit da ka tounassaon, da njoukouli nyèta mi taïnkon jing Nanjou.

²⁵ Da Barnabas mi ourou da sé guè pou Tarse baï nzana Saul;

²⁶ da ko̱ kème jing nè tou, kè ya nè féré gui pou Antioche. Da baï mi gui mahana ka on, ka saka mbéo bon klime ndoï an bil église ka to̱ko̱ bélabaï hi njoukouli nyèta. Tinassaon dina ling a njou‐séna bongli mono an pou Antioche, kli di ling kli ba chrétienli.

²⁷ Ka mbé saka kèo̱ prophèteli an pou Jérusalem mi diri sé guè pou Antioche.

²⁸ Hana mbéo an zéng kli ling‐è ba Agabus, mi ourou siya da sa ka Esprit, yé loukou bana ma nding baï bana pouli bon an toula koukoula. Da fèn aïn mi tèn ka name a Claude.

²⁹ Da njou‐séna bongli bon mi kèrè ka go̱ro̱ kli baï pina fèn sé hi yindi on ko̱ mi bi an guèl Judée, mahana ka fènli on ko̱ mi na an ndo̱ko̱ njoukouli mbéo mbéo bon.

³⁰ Da klime nding on da pi hi tangchidoli, da klime hi bi ndo̱ka Barnabas da Paul.