2 Tim 3 - Féké Testament 1947

¹ Da mo toutou on, ko̱ ka sèkèrè namli, yé to̱ko̱nassé ma gui.

² Baï ko̱ yé njoukouli ma tèn ba njou‐sénahang mone klili fèn kli, njou‐sénahang mbo̱rili, njou‐joungna mondi, ko̱ mi jone ling kli fèn kli, njou‐gnaïnali, njou‐poukounafènli, njou‐fana bo̱ko̱ njaka baba da ma klili, kli ya fèn ka tane ga kaou koukoula baïkè ya, kli tane ti tang bèlta ya,

³ kli tane ji ba klili ya, kli tane ba ndo̱ko̱ ba lodok ya, njou‐poukouna fènli, kli tane ga mang mone kli baï nzala naïn‐mone ya, njou‐wonronli, njoukou ko̱ tane sé hang bèlafèn ya.

⁴ Njou‐jo̱la njoukouli, njou‐kaouna wangli, njou‐joungna mone klili maïya, njou‐jina jangnandaïli, da kli tane ga ji Ouone ya.

⁵ Kli sé fong pèngna bong njaka Ouone da klime njomo njèrankè tou. Mo ndé ki kaïn on jing njoukou aïnli kéng.

⁶ Baï ko̱ an woro kli on njoukou hanali makaou ko̱ mi koro sé guè bil voulouli, da ba tang ngawa waïnli on tèn koï ko̱ mi hol békéfènli maïya, ko̱ nzala naïn‐mone klili toutoul toutoul mi i kli.

⁷ Klime laïbi guèbassoko baï Tounafèn da klime tane ma baï touna babaï ya.

⁸ Da mahana ko̱ Jannès kira Jambrès mi pong Moïse jinguèl ndé mabahana jing kli on kéng, klime pong babaï da ba njoukouli jing béké poumna laou kèrafèn, da laou kli tane ga ma bong lénakè ming baï tounassaon ya.

⁹ Da yé kli ma baï taïnakon guèbambèl tane tiya; baï ko̱ yé njoukouli bon ma ko̱ saon ngawa akli, mahana ka on ko̱ mi ko̱ saon ngawa a Jannès kira Jambrès jinguèl.

¹⁰ Da amo jinguèl mo sé fal to̱ko̱nafèn ni, da tong bong séna ni, da badinafèn ni, tounassaon ni, vonamboï ni, sénahang ni, tèn laïnabi ni.

¹¹ Sènafènli on ko̱ mi gui moni, to̱ko̱nassé ko̱ mi to̱ko̱ mi. Da fèn aïnli nyèta ko̱ mi tèn mi an pou Antioche da an pou Icone da an pou Lystre. Da fèn sènafèn an hani ko̱ mème bou touli rou ya lé? Da Nanjou mi lé mbèli an woro fènli on bon.

¹² Ka babaï kli on bon ko̱ mi ji kaouna ka mboro pèngna bong njaka Ouone ka bila Christ‐Jésus, yé kli ma to̱ko̱ssé.

¹³ Da yé béké njoukouli tèn njou‐mongnafènli ma ti ka taïnkon nyèta guèbambèl jing békéfèn, da kli ma mong njoukouli da njoukouli ma mong kli.

¹⁴ Da mo, mo laïbi jing fènli on ko̱ mo mi tou bongkè tou, da ko̱ kara mo tou, baï ko̱ mo mi toutou njoukouli on ko̱ mi to̱ko̱ fèn aïnli hi mo.

¹⁵ Da bo̱l tèn ko̱ mo mi pane ba joï goune, mo toutou tangna fofoto Takarata a Ouone, on ko̱ ma baï hina cho̱kna hi mo baï jingna yana‐baï‐toul ka mboro tounassaon on ko̱ mi na ka bila Christ‐Jésus.

¹⁶ Takarata a Ouone bon mi gui ka njaka Ouone fènè, da bèl baï to̱ko̱nafèn, baï téna go̱ro̱, baï féra komona njoukou ka mborokè, baï wara njoukou ka mborokè guédék.

¹⁷ Mono on, an njoukou a Ouone mi gui guédék ka kaou tang ta tou da ma baï ndingna bèla pina bon.