2 Corinthienli 3 - Féké Testament 1947

¹ Name tissaon ba aféké baï sana baï bèlta ba toula fèna lé? Name mahana ka njoukou hanali, ko̱ name ji an njoukou afékéli mi dé takarata hi oui baï to̱ko̱na toul bèla fèn na, maléba name ji an ouime pi takarata baï to̱ko̱na toul bèla fèn na lé?

² Oui ba takarata na ko̱ mi dé an bil go̱ro̱ na tou, baï ko̱ njoukouli bon mi tou da kèn.

³ Da klime ko̱ oui mahana ka takarata a Christ, on ko̱ mi dé ka mboro ndingna bakara na, tane ti jing ba l’encre ya, da jing ba Esprit a Ouone ko̱ yan, da tane ti ba an toul table kondi ya, da ba an toul table go̱ro̱ a naïn‐mondi.

⁴ Da name bi hang na toula Ouone ka mbora Christ.

⁵ Baï ko̱ na tane ga ma baï sana ba fèna mbéo mi gui ka ba mona fèna ya, da fèn manabong na mi gui ka ba mona Ouone.

⁶ Kè on ko̱ mi ndé nding na mabongkè baï tèna njou‐bakarali a féké bina gonjaka an none hana kéng, tane ti ka ba mboro fèn déna ya, da ba a esprit fènè; baï ko̱ fèn déna on mi i, da esprit fènè mi ko̱ hi yana.

⁷ Da tokoré baï ndingna bakara houl, on ko̱ mi té none takaratali on an toul kondi mi gui jing jonafèn, mono on ko̱ goundi a Israël mi tane ma baï ènran mbilili guè nona Moïse ya, baï toul jonafèn a nonè, da jonafèn on mi fan ka o̱tou.

⁸ Yé baï ndingna bakara esprit on mi tane ti ka mboro jonafèn guèbambèl ya lé?

⁹ Da tokoré baï ndingna bakara barabaï mi na jing jonafèn, baï ndingna bakara ndingna guédék mi na jing jonafèn nyèta guèbambèl.

¹⁰ Baï ko̱ ka babaï fèn on ko̱ mi na jing jonafèn jinguèl mi tane na jing jonafèn mahana ka on ya, baï ko̱ jonafèn on mi ta toulè.

¹¹ Baï ko̱ tokoré fèn on ko̱ ta mi na jing jonafèn, fèn on ko̱ pane mi na jing jonafèn nyèta guèbambèl.

¹² Mono on baï ko̱ name jing oliya mahana on, name sa baï ndo̱t tane waou.

¹³ Da name tane nding mahana ka Moïse ya, ko̱ kème goukou la voile bi nonè, baï an goundi a Israël mi tane ma baï ènran mbilili ka ko̱ sèkèrè fèn on ko̱ mi fan ka ta ya;

¹⁴ da kèrafèn akli mi foukourou. Baï ko̱ bo̱l tèn kassénaï ko̱ klime kèn takarata a tang bina gonjaka an none hana jinguèl, mbé voile on mi pane jing kèrafèn akli, baï ko̱ klime tane ga ko̱ fèn on ko̱ mi fan tou ka bila Christ ya.

¹⁵ Da bo̱l tèn kassénaï ko̱ klime kèn takarata a Moïse, voile on mi pane bi toul go̱ro̱ kli.

¹⁶ Da ko̱ njoukouna mi ki gui mona Nanjou, voile on mi ourou guèfal.

¹⁷ Da Nanjou ba Esprit fènè, da guèl on ko̱ Esprit a Nanjou mi na rou séna ka laou mana.

¹⁸ Da na bon ko̱ voile mi tane goukou bi nona ya, name ko̱ jonafèn a Nanjou mahana ka njoukou on ko̱ mi ko̱ an bil tatara, da name komo tèn ba tétéme mabahana jing jonafèn ko̱ kan jonafèn mabahana ko̱ mi kan ka Nanjou Esprit fènè.