1 Timothée 6 - Féké Testament 1947

¹ Dadaon an kli on bon ko̱ kaou bo̱ko̱ hola koïli, mi dik njou‐onatoul klili bon. Mono on an njoukouna mi tane poukou ling a Ouone tèn to̱ko̱nafèn nè ya.

² Da kli on ko̱ njou‐onatoul klili ba njou‐lana bilaouli an klime tane pong kli ya, baï ko̱ kli ba yindi jing hana; da dadaon an klime nding bakara hi kli bèlta guèbambèl baï ko̱ kli on ko̱ mi jing fèn baï bèla pina on ba njou‐lana‐bilaouli da Ouone mi sé hang kli. Fèn aïnli mo to̱ko̱ da wara.

³ Tokoré njoukou mbéo mi to̱ko̱ to̱ko̱nafèn toutoul da tane ga jibo̱ko̱kè jing kakaïya baïnjaka a Nanjou na Jésus‐Christ ya, tèn to̱ko̱nafèn on ko̱ ba ka mboro pèngna bong njaka Ouone,

⁴ kè ba njou‐gnaïna da tane tou fèn ya, da kème jing jangma njakana, da fanabaï toul baïnjakali, ko̱ mi hi fanahang, njakana jing hana, poukouna hana, da béké kèrafèn ka go̱ro̱,

⁵ njakana a njoukouli on ko̱ laou‐kèrafèn kli mi bo tou, da babaï mi tane ti jing kli ya, klime kèrè ka laou kli ko̱ mboro pèngna bong njaka Ouone ba mboro jingnafèn.

⁶ Da mboro pèngna bong njaka Ouone jing vona go̱ro̱ mi jing fèn maïya.

⁷ Baï ko̱ name tane ga tèn an koukoula aïn jing fèna mbéo ya, da ka babaï na ma baï fana fèna mbéo ya ko̱ name guè oura.

⁸ Da tokoré name jing laka da la mona, fèn on mi mabong na.

⁹ Kli on ko̱ mi kèrè baï jingna nguèra klime lé guèl yaknafèn, ka ba ndaou jing nzala ngawa maïya, tèn nzala on ko̱ mi hi go̱ro̱ séta, fèn on ko̱ mi bine njoukouli ka bo kli, da klime hou an guèl hèlè.

¹⁰ Baï ko̱ sénahang mbo̱ri ba saon a békéfènli bon; da baï ko̱ hanali mi fa hang kon toul fèn on, klime sé maï maï ka yèng mboro tounassaon da klime wou mone kli fèn kli bou bil to̱ko̱nassé maïya.

¹¹ Da amo, O njoukou a Ouone, mo ngou fèn aïnli, da sé fal fèn ndingna guédék, da sé ka mboro pèngna bong njaka Ouone, tounassaon, sénahang, laïnabi, bouna mone guè koukoula.

¹² Mo rou bèla rouna a tounassaon, ching yana kambèlè, ko̱ mi di mo baï yanakè jinguèl, da mo sa bèla bongbaï bi kala an nona njou‐lana bongbaïli nyèta.

¹³ Mè sa bi njako̱ ka nona Ouone, kè on ko̱ mi hi yana hi fènli bon, da an nona Christ‐Jésus, kè on ko̱ mi sa bèla bongbaï bi kala an nona Ponce Pilate.

¹⁴ Mo pèng bina baïnjaka guingna on, tane bila, ka rongo bo̱l tèn name guina a Nanjou na Jésus‐Christ,

¹⁵ kè on ko̱ yé kè ma to̱ko̱ bi kala ka name nè fènè, kè on ko̱ ba loukou nanjoukaou mbéo bo̱l ka babaï, ko̱ mi jing jangnandaï Nanjoukaou a nanjoukaouli da Nanjou a nanjouli.

¹⁶ Bo̱l ba kè on ho̱kè ko̱ mi ba houl tane tiya, ko̱ bi an bil takanafèn on ko̱ njoukouna mi tane ma baï kana rou ya, ko̱ njou kouna mbéo mi tane ga ko̱ nè ya, maléba njoukouna mi tane ma baï ko̱na nè ya. Amè, ba dikna da njèran kambèlè go̱ kambèlè. Amen.

¹⁷ Mo sa bi njaka kli on ko̱ mi jing fèn nguèra an koukoula aïn kassénaï an klime tane joung mone kli ya, da an klime tane bi hang kli ka oli nguèra on ya, ko̱ yé ma o̱ bon, da klime bi hang kli ba toula Ouone kè on ko̱ mi hi bèla fènli bon guèbambèl hi na, baï an name jangndaï.

¹⁸ An mome sa bi njaka kli an klime nding bèlafèn, an klime nguèrè jing bèla pina, an klime nding ko̱ko̱ ta ka laou kli ka wal fèn aklili.

¹⁹ Mono on klime mosso bètèkè pou bèlta jing fènli on ko̱ klime mang baï akli fèn kli baï name on ko̱ mi nding baï guina, mono on an klime ma baï chingna yana on ko̱ ba yana ka babaï.

²⁰ O Timothée, mo pèng fèn on ko̱ mi yèng bi ndo̱ko̱ da mo ènrèn mono jing bong tangbaï poukouna fèn da fana baï cho̱kna on ko̱ njoukou mi di ba cho̱kna da ko̱ ba wo̱ko̱,

²¹ baï ko̱ njoukou hanali mi sé falkè tou, kli pènrèn mboro tounassaon. Ndingna mbo̱l mi na jing mo!