1 Timothée 5 - Féké Testament 1947

¹ Mo tane ba baï hi tangchido ya, da wara nè mahana ka baba; mo wara bala goundi mahana ka yindi,

² da hona waïnli mahana ka mali, kli ko̱ ba tikilali mahana ka njo̱‐waïn fènoli ka go̱ro̱ tang fofoto.

³ Mo dik waïn soréli on, ko̱ ba waïn soréli ka babaï.

⁴ Da tokoré waïn soré hanali mi yé jing goundi maléba goune zali, dadaon klime tou ambèl baï to̱ko̱na mboro baï pèngna baïnjaka a Ouone hi dodok njou‐voul klili, da féré nding bèlafèn on ko̱ kli mi jing hi baba klili, da ma klili, baï ko̱ fèn on mi mapélékè an nona Ouone.

⁵ Da kè on ko̱ ba waïn sé ka babaï, da kaou bo̱on, kème bi hang‐è toul oliya Ouone, da laïbi ka sa jo̱jo̱ nè da hiou Ouone ka hangnachoung tèn séssé.

⁶ Da kè on ko̱ mi hi monè fènè bi jangnandaï a koukoula, kè ba njou‐houl tongna on ko̱ kème pane yana.

⁷ Mono on mo ndé sa fèn aïnli bi kala hi kli kéng, an klime kaou ka rongo.

⁸ Da tokoré njoukouna mi tane ga pèng dodok njoukou nèli ya, da ta on kè ko̱ tane ga pèng dodok njou‐voulèli fènè ya, kème jomo baï tounassaon tou, da kè bèlya nyèta ta toula njoukou on ko̱ tane ga la bilaou ya.

⁹ Dé ling kli an takarata waïn soréli ya, ko̱ saka kli mi tane ga mane bonkè?-?difala‐mbéo ya, ko̱ ka tang ambèl wa nè mbéo bo̱l.

¹⁰ Ko̱ njoukou mi sa bongbaï toul bèla pina nè. Tokoré kème mbé goundi tokoré kème nding ko̱ko̱ jing goni njoukouli, tokoré kème tourou bo̱ka njou‐lana‐bilaouli, tokoré kème lé mbèl njoukouli an guèl to̱ko̱nassé, tokoré kème nding mèrèn bèla pina bon.

¹¹ Da mo pong waïn soré on ko̱ mi pane ba tikila, baï ko̱ klime tissaon baï pongna Christ, baï toul nzala mone kli, kli ji éna wonron aféké.

¹² Klime jing barabaï baï ko̱ klime pong titili tounassaon akli.

¹³ Da mono on klime ndé tou baï kaouna ka jo̱jo̱ kéng, da klime sé maï maï mane njaka voulouli rèdèdè bon, da tane ti ba ko̱ klime kaou ba jo̱jo̱ ka ho̱kè ya, da klime ndè tèn ba njou‐sana baïli bo̱on kéng, da njou‐rana bo̱ka njoukouli, da sa baïli on ko̱ mi tane ma an klime sa ya.

¹⁴ Mono on, mè ji an waïn soréli on ko̱ mi pane ba tikila, klime é wonron ka mboung goundi, da miri njou‐voul klili an mboro mi tane ti jing bakèo̱ baï ouina njaka kli ya;

¹⁵ baï ko̱ kassénaï hanali mi féré sé guè fala Satan tou.

¹⁶ Tokoré njou‐lana bilaou hana wonron njoukou maléba waïn njoukou mi yé jing waïn soréli, dadaon kème pèng kli fènè, da yèng an église mi tane pèng kli ya, mono on an église mi ma baï pèngna kli on ko̱ ba waïn soréli ka babaï.

¹⁷ Tangchidoli on ko̱ mi o toul fèn bèlta, mo yèng an klime dik kli maïya, da ta on kli on ko̱ mi nding pina sana baïnjaka tèn to̱ko̱nafèn, an klime dik kli nyè maïya.

¹⁸ Baï ko̱ Takarata a Ouone mi sa: An mo mi tane gna njaka ndaïya on ko̱ mi nda mèrènkè ya. Da njou‐bakara mi ma mbo̱ri nè.

¹⁹ Mo tane la sana kita kon toula tangchido ya wara ko̱ njou‐sana bongbaïli makaou séré maléba saï ya.

²⁰ Kli on ko̱ mi nding békéfèn mo ba baï hi kli an nona njoukouli bon, mono on, an garakèli mi ndé ngou waou kéng.

²¹ Mè wara mo an nona Ouone da Christ‐Jésus tèn angeli on ko̱ kème sane, an mo mi bou fal fèn aïnli ka go̱ro̱ on ko̱ mi badi ka kome ya, mo tane nding fèna mbéo ya ka mboro sénahang a njoukouna ta toul aféké.

²² Mo goukou ndo̱ko̱ toula njoukouna mbéo gata ya, da tane sé fal békéfènli jing njoukou afékéli ya; mo pèng mono fèno tang fofoto.

²³ Mo laïbi njona ba mbi guèbassoko ka ho̱kè ya; da mo ya vin gounfènakè baï bilo̱, da baï jangmali ko̱ mi na jing mo bongkè dita.

²⁴ Békéfènli a njoukou hanali mi tèn kala an nona njoukouli ka sé ti dambèl walabaï hi kli, da békéfènli a njou‐afékéli mi tong bong kli.

²⁵ Ndé mahana on kéng bèla pina mana ko̱ mi wéré nonkè bi kala ti dambèl, da afékéli ko̱ mi na toutoul ma mou kli pélé.