1 Timothée 2 - Féké Testament 1947

¹ Mono on, mè wara mo ka titilikè toul fènli bon, oui oui nyéta ka hiouna Ouone jing sana jo̱jo̱, da kaou koukoula hi Ouone baï toula njoukouli bon,

² baï an nanjoukaouli tèn baï a kli bon on ko̱ kaou an guèl gangna, mono on, an yana a baï mi kaou dong mong jang, ka mboro pèngna bong njaka a Ouone, da mbonatoul.

³ Baï on mi bèlta da mapélékè an nona Ouone Njou‐yana‐baï‐toul ama.

⁴ Kè on ko̱ mi ji ba njoukouli bon mi kou, da kli ma baï touna babaï.

⁵ Baï ko̱ Ouone ba mbéo bo̱l, da njou‐vonabaï mbéo bo̱l kèng an hanguèl a Ouone jing njoukouli, kè fènè njoukou Christ‐Jésus,

⁶ kè on ko̱ mi hi monè fènè ba fèn chona baï toula njoukouli bon. Baï ko̱ bongbaï nè fènè ma to̱ko̱ name nè.

⁷ Baï toul baï on mi ko̱ sane mi ba njou‐sana mboura da njou‐mboro‐pina mè sa ka babaï da mè tane ga ba wo̱ko̱ ya, da njou‐to̱ko̱nafèn hi mèran gentili mi jing tounassaon da babaï.

⁸ Mono on, mè ji an njoukouli mi hiou Ouone manguèl bon, ka ndara ndo̱ko̱ kli bon tang fofoto guè siya tane hèrè jing ndingna ka ndouri ya.

⁹ Da mono on kéng, mè ji an waïnli mi bou fèn ling on ko̱ mi mabongkè tane ti ba fèn on ko̱ mi hi chonron none ya, da chok baï pèngna mone kli, da tane ndé toul kli ya, ka bou l’or maléba zaou perle nyèta ya, maléba bouna la on ko̱ cho̱ko̱kè mi nyèta ya.

¹⁰ Da klime bou ba bèla pina on ko̱ mabongkè baï an waïnli on, ko̱ mi sa kli kaou ka mboro pèngna bong njaka Ouone.

¹¹ An waïn mi la to̱ko̱nafèn ka kaou yime ka njakè, ka bou monè guè koukoula ka la baï.

¹² Mè tane ji an waïn mi to̱ko̱fèn maléba name gangna toula wonron njoukou ya, da kème kaou yime ka njakè.

¹³ Baï ko̱ Ouone mi mosso Adam ka titilikè da Ève afal.

¹⁴ Da tane ti ba Adam mi ko̱ la mongnafèn ya, da ba waïn mi ko̱ la mongnafèn, da baï ko̱ kème la mongnafèn kè sél guingna tou.

¹⁵ Da yé kè ma kou ka mboro mboungna goune, tokoré klime laïbi ka tounassaon da sénahang tèn wala mone kli bi baï a Ouone, ka bou mone kli guè koukoula.