Уэрэд 95 - ХъыбарыфӀыр. ЩӀэдзапӀэр. Уэрэд ЛъапӀэхэр

95-нэ Уэрэд Тхьэуэ Псоми Я Нэхъ Пащтыхьышхуэр

¹ Зиусхьэным уэрэдыщӀэ хужыфӀэ; хужыфӀэ уэрэд зэрыщӀыгуу Зиусхьэным!

² Уэрэд хужыфӀэ Зиусхьэным, Абы и цӀэм щӀыхь хуэфщӀ, дыкъызэрыригъэлам и хъыбар махуэ къэс фӀуатэ!

³ И щӀыхьыр яхуэфӀуатэ цӀыху лъэпкъхэм, и телъыджащэхэр лъэпкъ псоми евгъащӀэ.

⁴ Сыту жыпӀэмэ ин дыдэщ Зиусхьэныр, щӀыхь псори хуэфащэщ Абы, Ар тхьэ псоми я нэхъ шынагъуэщ.

⁵ Сыту жыпӀэмэ цӀыху лъэпкъ псоми я тхьэхэр тхьэ нэпцӀщ, ауэ Зиусхьэным къигъэщӀащ уафэхэр.

⁶ ЩӀыхьымрэ лъытэныгъэшхуэмрэ Абы и пащхьэщ, лъэкӀыныгъэмрэ дахагъэмрэ Абы и унэшхуэм щыӀэщ.

⁷ ЦӀыху лъэпкъхэм я унагъуэ щхьэхуэхэм фӀыщӀэ псори хуэфлъагъу Зиусхьэным, щӀыхьымрэ лъэкӀыныгъэмрэ хуэфлъагъу Зиусхьэным.

⁸ Зиусхьэным и цӀэм хуэфащэ щӀыхьыр хуэфлъагъу, тыгъэхэр хуэфхьи, фыдыхьэ Абы и пщӀантӀэхэм!

⁹ Фащэ лъапӀэ фщыгъыу, Тхьэм и унэшхуэм щхьэщэ щыхуэфщӀ Зиусхьэным. Абы и пащхьэм щрекӀэзыз зэрыщӀыгуу!

¹⁰ ЯжефӀэ цӀыху лъэпкъхэм: «Тепщэныгъэр иӀыгъщ Зиусхьэным!» Абы папщӀэ быдэу игъэуващ дунеишхуэр, къэскӀэнкъым ар. ЦӀыху лъэпкъхэм я Ӏуэхухэр щыпкъагъэкӀэ зэхихунщ Абы.

¹¹ Иренэжэгужэ уафэхэр, игу щыхрырехъуэ щӀылъэм; щребырсыр хыри абы хэс псори.

¹² ЩрегуфӀэ губгъуэр, абы щыкӀ псори, щрегуфӀэ мэзым щӀэт жыгхэри –

¹³ Зиусхьэным и пащхьэм, сыту жыпӀэмэ ар къокӀуэ, щӀылъэм хьэкум трищӀыхьыну. Дунеишхуэм и Ӏуэхухэр щыпкъагъэкӀэ зэхихунщ Абы, цӀыху лъэпкъхэри – Езым щыпкъагъэу хэлъымкӀэ.