Уэрэд 40 - ХъыбарыфӀыр. ЩӀэдзапӀэр. Уэрэд ЛъапӀэхэр

40-нэ Уэрэд ЦӀыху сымаджэм и тхьэлъэӀу

¹ УэрэдыӀуэхэмрэ пшынауэхэмрэ я пашэм папщӀэ. Даут и уэрэд

² Гъуэгу махуэ теуващ тхьэмыщкӀэм хуэгумащӀэр. Махуаем ар хишыжынщ Зиусхьэным.

³ Зиусхьэным ар къихъумэнщ, псэууэ къигъэнэнщ. ЩӀыгум ар щынасыпыфӀэнщ. И бийхэм я Ӏэ ирилъхьэнкъым ар.

⁴ Узым щиубыдкӀэ, гуащӀэ къритынщ Зиусхьэным. Сымаджэ хъумэ, Абы игъэхъужынщ.

⁵ Сэ жысӀащ: Зиусхьэн! ГущӀэгъу къысхуэщӀ, сыгъэхъужь, сэ Уи пащхьэ гуэныхь щызлэжьащ.

⁶ Ӏей къысхужаӀэ си бийхэм: «Мыр щылӀэнур, и цӀэ щыкӀуэдыжынур дапщэщ?»

⁷ Силъагъун фӀэигъуэу зыгуэр къысхуэкӀуэмэ, пщӀэ зимыӀэ псалъэ жеӀэ: игу хъыбар Ӏейхэр еӀуатэ, щӀэкӀыжмэ, ар цӀыхум яхуеӀуэтэж.

⁸ ЗэкӀэ сызылъагъу мыхъухэр си нэщӀыбагъкӀэ щоӀущащэ, Бзаджагъэ къызащӀэну ягу иралъхьэ.

⁹ ЖаӀэ: зыгъэлӀэн уз къеуэлӀащ абы, ар къэтэджыжынукъым.

¹⁰ Нэхъ сызыщыгугъ си ныбжьэгъуу си шыгъупӀастэ зыдэзгуэшауэ щытам и щӀыб къысхуигъазэри, бий къысхуэхъуащ.

¹¹ Ауэ, Уэ Зиусхьэн, гущӀэгъу къысхуэщӀ, сыкъызэфӀэгъэувэжи, абыхэм яхуэфащэр ялъызгъэсынщ.

¹² НэфӀкӀэ укъызэрызэплъыр къызегъащӀэ си бийр къызэрыстемыкӀуэм.

¹³ Сызэрыхейм папщӀэ Уэ сыпӀыгъщ, Уи пащхьэ игъащӀэкӀэ сибгъэуващ.

¹⁴ ЩӀэблэ зэкӀэлъыкӀуэхэм я щытхъур ейщ Зиусхьэным, Израилым и Тхьэм! Ӏэмин, Ӏэмин!