Уэрэд 36 - ХъыбарыфӀыр. ЩӀэдзапӀэр. Уэрэд ЛъапӀэхэр

36-нэ Уэрэд ЦӀыху бзаджэмрэ цӀыхуфӀымрэ я насыпыр

Даут и уэрэд

¹ ЦӀыху бзаджэхэм зумыгъэгъапэ, мыхъуну зекӀуэхэм уемыхъуапсэ –

² сыту жыпӀэмэ удз хуэдэ кӀуэдыжынущ, удз щхъуантӀэм хуэдэу гъуэлэжынущ.

³ Зиусхьэным ущыгугъыурэ, фӀы лэжь; шынагъуэншэу щӀым ущыпсэунщ итӀанэ.

⁴ ГуфӀэгъуэ хэгъуатэ Зиусхьэным – уигу фӀэигъуэр Абы къыпхуищӀэнущ.

⁵ Зиусхьэным уи гъуэгу хуэгъазэ, щыгугъи, Абы къыпхуищӀэнщ.

⁶ Уи хеягъэ нэхунэм хуэдэу, уи захуагъи шэджагъуэм хуэдэу къыхигъэщынщ Абы.

⁷ Зиусхьэным и пащхьэ щыӀэсэ, зышыӀэ, Абы щыгугъ. Уемыхъуапсэ зи Ӏуэху къызыдэхъум, хьилагъэ зезыхьэм зумыгъэгъэгумэщӀ.

⁸ Губжьыным зыщыдзей, зызыщӀумыгъаплъэ, абы къыхэкӀыр фӀыкъым.

⁹ Сыту жыпӀэмэ лъапсэншэ хъунущ цӀыху бзаджэхэр, Зиусхьэным щыгугъхэм ӀыхьэфӀ яхуэхъунущ щӀыгур.

¹⁰ Иджыри тӀэкӀу дэкӀмэ, цӀыху бзаджэр щыӀэжынукъым; абы и щӀыпӀэ уеплъмэ – ар нэщӀ хъунущ.

¹¹ Пагагъ зигу имылъхэм яӀэщӀыхьэжынущ щӀыгур, дунейм и къулеигъэм гуфӀэгъуэ щагъуэтынущ абыхэм.

¹² Тхьэм хуэщыпкъэ цӀыхум гухэлъ Ӏейхэр хузэхалъхьэ цӀыху бзаджэхэм, и дзэхэр абы хузэрегъэшх.

¹³ А цӀыху бзаджэм щодыхьэшх Зиусхьэныр, щыкӀуэдыжыну махуэр абы къызэрыхуэкӀуэр елъагъури.

¹⁴ ТхьэмыщкӀэри зыри зимыӀэхэри ягъэкӀуэдыну, гъуэгу захуэм ирикӀуэхэр яукӀын я хьисэпу, цӀыху бзаджэхэм я джатэхэр кърах, къашэщӀ я шабзэ.

¹⁵ Абыхэм я джатэхэр езыхэм ягу хаӀужынщ, я шабзэхэри зэпыщӀыкӀынщ.

¹⁶ Тхьэм хуэщыпкъэм и мащӀэр нэрыбгэ бзаджэхэм я мылъкушхуэм нэхърэ нэхъ дэгъуэщ,

¹⁷ сыту жыпӀэмэ цӀыху бзаджэхэм я Ӏэхэр зэпыщӀыкӀынущ, ауэ Езым хуэщыпкъэхэм я гуащӀэр Зиусхьэным егъэбыдэ.

¹⁸ Мыхъун зыбгъэдэмылъхэм яхуогумэщӀ Зиусхьэныр, абыхэм мыкӀуэдыж ӀыхьэфӀ яхуещӀ.

¹⁹ Ӏыхьэншэ хъункъым ахэр махуаем, гъаблэм и махуэхэми мэжэлӀэнкъым.

²⁰ Ауэ кӀуэдынщ цӀыху бзаджэхэр, Зиусхьэным и бийхэри губгъуэм ит гъэгъам хуэдэу лъэлъэжынщ, Ӏугъуэм хуэдэу кӀуэдыжынщ ахэр.

²¹ ЦӀыху бзаджэм щӀыхуэ къещтэри, итыжыркъым; Тхьэм хуэщыпкъэм ятыж, хьэлэлщи.

²² Сыту жыпӀэмэ Зиусхьэным и нэфӀ зыщыхуахэм ӀыхьэфӀ яхуэхъунущ щӀыгур, Абы и ней зыщыхуахэр лъапсэншэ хъунщ.

²³ ЦӀыху гуэрым и гъуэгу Зиусхьэным игу ирихьмэ, и лъакъуэхэр и гъуэгупэ щегъэбыдэ,

²⁴ ар ебэкӀи джалэркъым, абы и Ӏэр Зиусхьэным иӀыгъщи.

²⁵ СыщӀалащ, жьыи сыхъуащ, ауэ слъэгъуакъым сэ Тхьэм хуэщыпкъэр щыгъупщауэ, абы и быным хьэлу къилъэӀухуэу.

²⁶ Абы и гущӀэгъур зэпыуркъым, щӀыхуэ ит зэпытщ, и быным и хьэтыркӀэ Тхьэм и нэфӀ абы къыщохуэ.

²⁷ Зыщыдзей бзаджагъэм, фӀы лэжь, апхуэдэу хъумэ, игъащӀэкӀэ упсэунщ.

²⁸ Сыту жыпӀэмэ захуагъэр и щӀасэщ Зиусхьэным, и цӀыху лъапӀэхэр утыкум къринэркъым; Езым хуэщыпкъэхэр игъащӀэкӀэ къихъумэнущ; цӀыху бзаджэхэм я бынхэр лъапсэншэ хъунщ.

²⁹ Тхьэм хуэщыпкъэхэм щӀыгур ӀыхьэфӀу къалъысыжынщ, абы щыпсэунщ ахэр игъащӀэкӀэ.

³⁰ Тхьэм хуэщыпкъэм къыжьэдэкӀыр губзыгъагъэщ, абы и бзэгум жиӀэр захуагъэщ.

³¹ Абы и гум илъщ и Тхьэм и хабзэр; абы и лъакъуэхэр гъуэгум дэхынукъым.

³² ЦӀыху бзаджэр Тхьэм хуэщыпкъэм йощэ, щӀокъу зэригъэкӀуэдыным.

³³ Ауэ Зиусхьэным ар абы и Ӏэ ирилъхьэнкъым, абы хьэкум тращӀыхь щыхъукӀи, яригъэгъэмысэнкъым.

³⁴ ЗышыӀэ, Зиусхьэным щыгугъ, Абы и гъуэгум удэмых; щӀыгур ӀыхьэфӀ пхуэхъуну Абы уигъэинынщ; цӀыху бзаджэхэр зэрагъэкӀуэдыр плъагъунщ.

³⁵ ЦӀыху бзаджэ зыгъэшынэхэр слъэгъуащ сэ, жыг къудамэбэу лъабжьэ быдэкӀэ зызыубгъуам хуэдэу;

³⁶ ауэ итӀанэ абы сыщыблэкӀым ар щыӀэжакъым, сылъыхъуащ – згъуэтакъым.

³⁷ Мысагъэ зимыӀэ цӀыхум кӀэлъыплъ, гъуэгу захуэм тетым еплъ, сыту жыпӀэмэ мамырыгъэ къызыбгъэдэкӀ цӀыхум бын къыщӀэхъуэнщ.

³⁸ Хабзэншэу псэухэр псори ягъэкӀуэдынщ; цӀыху бзаджэхэм къатехъукӀынухэр лъапсэкӀуэд хъунщ.

³⁹ Езым хуэщыпкъэхэр Зиусхьэным къригъэлынщ; къиныгъуэм абыхэм Ар щхьэегъэзыпӀэ яхуэхъунщ.

⁴⁰ Абыхэм ядеӀэнщи, Зиусхьэным хишыжынщ; бзаджащӀэхэм ящихъумэнщи, къригъэлынщ, щхьэегъэзыпӀэкӀэ Абы щогугъри.