Уэрэд 29 - ХъыбарыфӀыр. ЩӀэдзапӀэр. Уэрэд ЛъапӀэхэр

29-нэ Уэрэд ЩӀыхь тхьэлъэӀу

¹ Тхьэм и унэшхуэр ягъэувыжу зыщыхуагъазэм жаӀа уэрэд. Даут и уэрэд

² Зиусхьэн, сызэхэпхащ, си бийхэр къысщӀэбгъэнэкӀакъыми, узгъэлъэпӀэнщ,

³ Зиусхьэн, си Тхьэ! СынолъэӀуати, Уэ сыбгъэхъужащ сэ.

⁴ Зиусхьэн! Хьэдрыхэ сыкъипшыжащ, абы кӀуахэм сакъыхэпшыжри сыкъэбгъэпсэужащ.

⁵ Уэрэд хужыфӀэ Зиусхьэным, фэ, Абы и цӀыху лъапӀэхэм, Ар зэрылъапӀэр зыщывмыгъэгъупщэу щӀыхь хуэфщӀ.

⁶ Сыту жыпӀэмэ напӀэдэхьеигъуэщ Абы и губжьыр, Абы и фӀыгъэ къызокӀ игъащӀэм: пщыхьэщхьэм гъыныр си хьэщӀэщ, пщэдджыжьым – гуфӀэгъуэр.

⁷ ЩызифӀыгъуэм жысӀащ сэ: «ИгъащӀэкӀэ сылъэпэрэпэжынкъым».

⁸ Уи нэфӀ къысщыхуэщи, Зиусхьэн, Уэ къупщхьэ быдэу сыбгъэуващ, ауэ итӀанэ уи нэгу яфӀэбгъэпщкӀуати, шынагъуэм сызэщӀищтащ.

⁹ Абы щыгъуэм, Зиусхьэн, сэ Уэ сыноджащ, гущӀэгъу къысхуищӀыну селъэӀуащ Зиусхьэным:

¹⁰ «СылӀэмэ, и фӀагъыу сыт къокӀынур, хьэдрыхэ сыкӀуэмэ? Хьэдрыхэ сабэм уи щӀыхь жиӀэну? Щыпкъагъэу Уэ пхэлъыр абы залъригъэщӀэну?

¹¹ Сызэхэхи, Зиусхьэн, къысхуэгъэгъу; Зиусхьэн, дэӀэпыкъуэгъу къысхуэхъу».

¹² Си щыгъуэныр абы щыгъуэ гуфӀэгъуэ къафэкӀэ Уэ схузэблэпхъуащ, си щыгъуэ щыгъынхэр сщыпхри, дэрэжэгъуэ фащэкӀэ сыпхуэпащ.

¹³ Абы папщӀэ, зызмыущэхуу, уи щӀыхьыр сигукӀи си псэкӀи соӀуатэ. Зиусхьэну си Тхьэ! Сэ Уэ щӀыхь игъащӀэкӀэ пхуэсщӀынщ.