Уэрэд 24 - ХъыбарыфӀыр. ЩӀэдзапӀэр. Уэрэд ЛъапӀэхэр

24-нэ Уэрэд Зэман шынагъуэм и тхьэлъэӀу

Даут и уэрэд

¹ Си гур уи деж ныдызохьей, Зиусхьэн.

² Уэ сыпщогугъ, си Тхьэ! ЕмыкӀу къызремыхь, си бийхэр къысщремыгуфӀыкӀ.

³ ЕмыкӀу къремыхь Уэ къыпщыгугъ псоми; егъэзыпӀэ хэмыхуауэ хьилагъэ зезыхьэхэм кърехь емыкӀу.

⁴ Сыгъэлъагъу, Зиусхьэн, уи гъуэгухэр, сащыгъэгъуазэ уи лъагъуэхэм.

⁵ Уи щыпкъагъэм и гъуэгум сытегъэуви, сыщыгъасэ, Уэращ Тхьэуэ сыкъезыгъэлыр; Махуэ еным сыпщогугъ.

⁶ Уи гущӀэгъурэ уи лъагъуныгъэ мыкӀуэдыжрэ Уигу кърырекӀыж, Зиусхьэн, – ахэр кӀэи пэи зимыӀэщ.

⁷ Си щӀалэгъуэм гуэныхьу сщӀахэр, си хабзэншагъэхэр уигу ирыремылъ. Уи лъагъуныгъэ мыкӀуэдыжым, уи фӀыгъэм я хьэтыркӀэ уигу сигъэлъ зэпыт, Зиусхьэн!

⁸ ФӀыщ икӀи захуэщ Зиусхьэныр; гуэныхьщӀэхэм Абы гъуэгу тэрэзыр ягурегъаӀуэ.

⁹ Пагагъэ зигу имылъхэр щыпкъагъэм хуеузэнщӀ, хуегъасэ ахэр и гъуэгум.

¹⁰ И лъагъуныгъэ мыкӀуэдыжкӀэ, щыпкъагъэкӀэ ядызокӀуэ Зиусхьэныр Абы и зэгурыӀуэныгъэрэ и псалъэ гъуазэхэмрэ зыгъэзащӀэхэм.

¹¹ Уи цӀэм и хьэтыркӀэ, Зиусхьэн, къысхуэгъэгъу си къуаншагъэр, ар ин дыдэщи.

¹² Зиусхьэным фӀэлӀыкӀ хуизыӀэм къыхихын хуей гъуэгур къригъэлъагъунщ Абы.

¹³ Ар псэукӀэ хуэщӀам хэт зэпытынщ, быну къыщӀэхъуэм щӀыгур къаритынщ.

¹⁴ ФӀэлӀыкӀ хуизыӀэхэр и гухэлъхэм щегъэгъуазэ Зиусхьэным, ядищӀа зэгурыӀуэныгъэр зэрыщыпкъэр ягу къегъэкӀыж.

¹⁵ Си нэплъэгъуэ Зиусхьэным хуэгъэза зэпытщ; сыту жыпӀэмэ Абы хъым кърехыж си лъакъуэхэр.

¹⁶ Зыкъысхуэгъази, гущӀэгъу къысхуэщӀ, сыту жыпӀэмэ си закъуэщ, хэутэн сащӀащ.

¹⁷ Къахэхъуащ си нэщхъеягъуэхэм, си гузэвэгъуэхэм – сакъыхэшыж.

¹⁸ Къину сызыхэти си гукъеяуи уи нэӀэ къытедзи, къысхуэгъэгъу си гуэныхьхэр псори.

¹⁹ Си бийхэм къеплъ: сыту куэд хъурэ ахэр, залымхэу; сыту къыстеплъэ мыхъурэ ахэр!

²⁰ Къэхъумэ си псэр, сыхэшыж, емыкӀу къызумыгъэхь, Уэ щхьэегъэзыпӀэу зыпхуэзгъэзащи.

²¹ Сыкърехъумэ къабзагъэмрэ щыпкъагъэмрэ, Уэ сыпщогугъри.

²² Израилыр и тхьэмыщкӀагъуэ псоми яхэшыж Уэ, си Тхьэ.