Уэрэд 138 - ХъыбарыфӀыр. ЩӀэдзапӀэр. Уэрэд ЛъапӀэхэр

138-нэ Уэрэд Тхьэм имыщӀэ щыӀэкъым

УэрэдыӀуэхэм я пашэм папщӀэ. Даут и уэрэд

¹ Зиусхьэн! Уэ сыбгъэунэхуащ, сыкъыбощӀэ.

² СызыщытӀысри сыкъыщытэджыжри Уэ уощӀэ. Си гупсысэхэр жыжьэу къыбощӀэ.

³ СызекӀуэми, зызгъэпсэхуми, Уэ къыздыбощӀэ сэ. Си гъуэгу псоми уащыгъуазэщ Уэ.

⁴ Си бзэгупэм къэмыса псалъэр Уэ, Зиусхьэн, ӀупщӀ дыдэу зэхыбощӀыкӀ.

⁵ Сыкъэбухъуреихьауэ си ужькӀи сяпэкӀи, уи ӀэкӀэ сыкъыбохъумэ.

⁶ СфӀэгъэщӀэгъуэн дыдэщ Уэ зэхэщӀыкӀыу къысхууиӀэр – куущ, сылъэӀэсын слъэкӀыркъым.

⁷ Уи пащхьэ сикӀыу, дэнэ сыкӀуэн, уи нэгу сыщӀэкӀыу, дэнэ сыжэн?

⁸ Уафэм сыдэкӀуейми, абы ущыӀэщ; хьэдрыхэ сихьэми, абыи ущыӀэщ.

⁹ Нэхущым и дамэхэр къэсщтауэ, хым и гъунэм сыщетӀысэхми,

¹⁰ абыи уи Ӏэм сыкъыщришэкӀынущ, уи Ӏэ ижьым сыкъыщиӀыгъынущ.

¹¹ «КӀыфӀым срегъэпщкӀу, кӀыфӀ ирехъу нэхунэу сызыхэтыр», жысӀэми,

¹² кӀыфӀым сыпфӀигъэпщкӀун лъэкӀынукъым, махуэм хуэдэу, жэщри нэхунущ. КӀыфӀри нэхунэм хуэдэщ УэркӀэ.

¹³ Сыту жыпӀэмэ Уэ бгъэпсащ си кӀуэцӀ илъхэр, си анэ и ныбэ силъурэ сыбгъэпсащ.

¹⁴ ЩӀыхь пхузощӀ, сыту жыпӀэмэ щӀагъуэ дыдэу сыбгъэпсащ. ЩӀагъуэ дыдэщ уи ӀуэхущӀагъэхэр, ирикъуу сызэхыбощӀыкӀ.

¹⁵ СыкъэбгъэщӀ щыхъум, Уэ ныбэ кӀуэцӀым сыщрищӀэм щэхуу сыщызэхэплъхьэ щыхъум, си Ӏэпкълъэпкъыр УэркӀэ Ӏэрыхуащ.

¹⁶ ГъэпсыкӀэ зимыӀэ си Ӏэпкълъэпкъыр Уэ уи нэхэм ялъэгъуащ, сэр папщӀэ бгъэнэхуа махуэ псори, абыхэм ящыщ щымыӀэххами, Уэ уи тхылъым иптхакӀэт.

¹⁷ Сыту хэӀэтыкӀа, ди Тхьэ, уи гухэлъхэр, абыхэм я бжьыгъэри сыту куэд хъурэ!

¹⁸ Ахэр къэслъытэну сыхуежьэмэ, пшахъуэм нэхърэ нэхъыбэщ; сыкъэушыжми, Уэ сыпщӀыгъущ.

¹⁹ ЦӀыху бзаджэхэр бгъэкӀуэдатэмэ, Уэ, ди Тхьэ! Лъым щӀэнэцӀхэм спэжыжьэ защӀэтэми!

²⁰ БзаджагъэкӀэ Уэ къыппегъуэкӀыу мэпсалъэ ахэр; гухэлъ Ӏей яӀэу, зыкъаӀэт уи бийхэм.

²¹ Зиусхьэн, Уэ укъэзылъагъу мыхъухэр жагъуэгъу сщӀакъэ! ЗыкъыппэзыӀэтхэм нэмыплъ естыркъэ?

²² ЛъэкӀыныгъэу сиӀэмкӀэ согъэжэгъуэгъу, си бийщ ахэр.

²³ Сыгъэунэху, Зиусхьэн, сигу зытет зэгъащӀэ; къызэплъакӀуи, си гупсысэхэр зэгъащӀэ.

²⁴ Гъуэгу шынагъуэ сытетмэ, къеплъи, мыкӀуэдыжын гъуэгу сытегъэхьэ.