Апостол. 21 - ХъыбарыфӀыр. ЩӀэдзапӀэр. Уэрэд ЛъапӀэхэр

21-НЭ ЕДЗЫГЪУЭ Паул Ерусалим зэрыкӀуар

¹ Абыхэм дакъыхэкӀыжа нэужь, кхъухьымкӀэ дежьэри, Кос къалэм дыкӀуащ занщӀэу. ЕтӀуанэ махуэм Родос къалэм дыкӀуащ, абы дыщежьэри, Патарэ къалэм дынэсащ.

² Финикие хэкум кӀуэ кхъухь къэдгъуэтщ, дитӀысхьэри дежьащ.

³ Кипр хытӀыгур къыщылъагъуэм, кхъухьым и сэмэгурабгъуэкӀэ ар къыщыднэри, Сирие хэкум дыкӀуэри, Тир къалэм дыкъыщувыӀащ, кхъухьыр абы щаунэщӀын хуейти.

⁴ ХьисэкӀэ фӀэщхъуныгъэ зиӀэхэр а къалэм къыщыдгъуэтри, махуиблкӀэ абыхэм я деж дыщыӀащ. Тхьэм и Псэ ЛъапӀэм абыхэм захригъэщӀыкӀыурэ, Ерусалим мыкӀуэну Паул къыжраӀащ.

⁵ А къалэм дызэрыщыӀэну пӀалъэр щыдухым, абы дыдэкӀри, ди гъуэгу дытехьэжащ. ФӀэщхъуныгъэ зиӀэ псори, цӀыхубзхэри сабийхэри я гъусэу, къалэм къыддыдэкӀащ. Хы Ӏуфэм лъэгуажьэмыщхьэу дыӀутӀысхьэри, Тхьэм делъэӀуащ итӀанэ.

⁶ ФӀэхъус зэтхыжри, кхъухьым дитӀысхьэжащ, абыхэми щхьэж и унэ ягъэзэжащ.

⁷ Тир къалэм дыщежьэри, кхъухьымкӀэ дыкӀуэурэ, Птолемаидэ къалэм дынэсащ. Абдежым къуэшхэм фӀэхъус щетхри, зы махуэкӀэ абыхэм я деж дыщыӀащ.

⁸ ЕтӀуанэ махуэм абы дыдэкӀыжри, Кесарие къалэм дыкӀуащ. Филипп и цӀэу Тхьэм и псалъэхэм цӀыхухэр езыгъэдаӀуэ лӀым и унэм дыщӀыхьэри, абы деж дыкъэнащ. Ар лӀиблым ящыщт.

⁹ А Филиппым дэмыкӀуауэ пхъуибл иӀэт. Тхьэм и псалъэхэр абыхэм я гум кърилъхьэурэ, мыдрейхэм къажригъэӀэрт.

¹⁰ Махуэ зыбжанэкӀэ абы дыщыӀа нэужь, Агав и цӀэу зы бегъымбар гуэр Иудей хэкум къикӀри къэкӀуащ.

¹¹ Ди деж къакӀуэщ, Паул и бгырыпхыр къищтэщ, езым и Ӏэхэри и лъакъуэхэри ипхэри, жиӀащ: – Тхьэм и Псэ ЛъапӀэм мыпхуэдэу жеӀэ: «Мы бгырыпхыр зейр журтхэм Ерусалим щапхынурэ, хамэ лъэпкъхэм ӀэщӀалъхьэнущ».

¹² А псалъэхэр щызэхэтхым, дэри а щӀыпӀэм щыпсэу къуэшхэри Ерусалим мыкӀуэну Паул делъэӀуащ.

¹³ Ар щызэхихым, Паул жэуап къитыжащ: – Сыт фщӀэр? Фыгъыу, сигу щхьэ хэвгъэщӀрэ? Сэ си Зиусхьэн Хьисэ и цӀэм щхьэкӀэ Ерусалим сыщапхын дэнэ къэна, сыщылӀэнуи сыхьэзырщ.

¹⁴ Паул къэдгъэнэн щытлъэмыкӀым, «Тхьэм зэрыжиӀауэ ирехъу», жытӀэри зыдущэхужащ.

¹⁵ А махуэхэм я ужькӀэ зыдгъэхьэзырри, Ерусалим дыкӀуащ.

¹⁶ Кесарие щыщу ХьисэкӀэ фӀэщхъуныгъэ зиӀэ цӀыху гуэрхэр ди гъусэт. Абыхэм дашащ Мнасон и цӀэу зи унэ дыщыпсэунум деж. Мнасон Кипр хытӀыгум щыщт, езыри ХьисэкӀэ япэ дыдэ фӀэщхъуныгъэ зиӀэ хъуахэм ящыщт.

Паул Екъуб деж зэрыкӀуар

¹⁷ Ерусалим дыщынэсым, къуэшхэм я гуапэу драгъэблэгъащ.

¹⁸ ЕтӀуанэ махуэм Паул дригъусэу Екъуб деж дыкӀуащ. Нэхъыжь псори абы щыӀэт.

¹⁹ Паул абыхэм фӀэхъус ярихри, лажьэурэ Тхьэм хамэ лъэпкъхэм я деж щищӀахэр зырызу яхуиӀуэтащ.

²⁰ Ар щызэхахым, Тхьэм щӀыхьышхуэ хуащӀащ абыхэм. Паул къыжраӀащ итӀанэ: – Ди къуэш, журтхэм ящыщ мин бжыгъэхэм фӀэщхъуныгъэ яӀэ зэрыхъуари Мусэ и Торэт хабзэм я фӀэщу зэрыхэтри уолъагъу.

²¹ Я сабийхэр сунэт ямыщӀынуи я хабзэхэм темытынуи жыпӀэу, хамэ лъэпкъхэм яхэс журт псори Мусэ и гъуэгум текӀыну бущийуэ жаӀэурэ, цӀыхухэм зэрахьэ хъьыбар пхэнжыр зэхахащ.

²² Сыт тщӀэнур? ЦӀыхухэр къызэхуэсынущ; укъызэрыкӀуар зэхахынущи.

²³ Аращи, дэ нызэрыбжетӀэм хуэдэу щӀы. ТхьэрыӀуапӀэ ихьа лӀиплӀ диӀэщ.

²⁴ Ахэр здэши, Торэт хабзэм тету я гъусэу зыгъэкъэбзэжи, я щхьэхэр яупсын щхьэкӀэ, ахъшэ ет. Ар ялъагъумэ, уэ къыптеухуауэ зэхаха хъыбархэр зэрымыпэжри, уэр-уэру Торэт хабзэм утету, абы итхэр зэрыбгъэзащӀэри цӀыху псоми ящӀэнущ.

²⁵ Ауэ хамэ лъэпкъхэм ящыщу ХьисэкӀэ фӀэщхъуныгъэ зиӀэ хъуахэм ятеухуауэ ущӀэупщӀэмэ, абыхэм дэ зэдэтщта Ӏуэхур тхылъкӀэ зэредгъэщӀэгъам хуэдэу, цӀыхухэм тхьэ нэпцӀхэм хуащӀа къурмэныпхъэм и лым, лъым, ятхьэла псэущхьэхэм я лым, зинэ щӀэным пэӀэщӀэ защӀын хуейщ.

²⁶ КъыкӀэлъыкӀуэ махуэм Паул а лӀыхэр здишэри, абыхэм ящӀыгъуу зигъэкъэбзэжащ. Тхьэм и унэшхуэм щӀыхьэри, езымрэ а лӀыхэмрэ загъэкъэбзэжыныр щаухыну махуэри я къурмэн зырыз дин пашэм щрагъэщӀыну махуэри дин пашэхэм яжриӀащ итӀанэ.

Паул Тхьэм и унэшхуэм журтхэм зэрыщаубыдар

²⁷ А махуиблыр и кӀэм нэблэгъауэ, Асие хэкум щыщ журт гуэрхэм Тхьэм и унэшхуэм Паул щалъэгъуащ. ЦӀыху псори къызэщӀагъаплъэри, Паул яубыдащ.

²⁸ Мыпхуэдэу жаӀэурэ, зэрыгъэкӀийрт: – Израил щыщ лӀыхэ, фыкъыддэӀэпыкъу! Ди лъэпкъми, ди Торэт хабзэми, мы щӀыпӀэ лъапӀэми къыпэувыну цӀыху псори дэнэкӀи щызыгъэӀущар мы лӀыращ. Абы нэмыщӀу, алыджхэри Тхьэм и унэшхуэм щӀигъыхьэри, мы щӀыпӀэ лъапӀэр иригъэуфӀеящ.

²⁹ Апхуэдэу щӀыжаӀар нэхъапэм Ефес къалэм щыщ Трофим Паул и гъусэу къалэм щалъэгъуати, аращ. Паул ар щӀэмыхьэпхъэу Тхьэм и унэшхуэм щӀигъэхьауэ я гугъащ.

³⁰ Къалэм дэс псори къызэщӀэтаджэри, зэхэлъэдэжащ. Паул яубыдри, Тхьэм и унэшхуэм къыщӀашыжащ. КъызэрыщӀашыжу, бжэхэр ягъэбыдащ.

³¹ Паул яукӀыну щыхуежьэм, Ерусалим зэрыщыту зыкъызэраӀэтам и хъыбарыр рим дзэпщым деж нэсащ.

³² Дзэпщым Ӏуэхур имыгъэгувэу зауэлӀхэри дзэ пашэхэри здишэри, цӀыхухэм яхэлъэдащ. ЦӀыхухэм дзэпщри зауэлӀхэри щалъагъум, Паул еуэн щагъэтащ.

³³ Арати, дзэпщыр зауэлӀхэм ябгъэдыхьэри, Паул яригъэубыдащ. Абы гъущӀ Ӏэхъулъэхъу иралъхьэну унафэ яхуищӀащ. ЦӀыхухэм еупщӀащ итӀанэ: – Мыр хэт? Сыт ищӀар?

³⁴ ЦӀыху гупышхуэм ящыщ зым зы жиӀэу, адрейм нэгъуэщӀ гуэр жиӀэу, зэрыгъэкӀийрт. Мо зэрыхьзэрийм къыхэкӀкӀэ, дзэпщым пэжыр зригъэщӀэн лъэкӀыртэкъыми, зауэлӀхэм унафэ яхуищӀри, Паул быдапӀэм иригъэшащ.

³⁵ ДэкӀуеипӀэм щынэсым, Паул цӀыхухэр къытезэрыгуати, зауэлӀхэм ар ӀэкӀэ яхьын хуей хъуащ.

³⁶ ЦӀыхубэм ящыщу Паул къыкӀэлъыкӀуэхэр зэры-гъэкӀийрт: – УкӀ ар!

Паул цӀыху гупышхуэм я пащхьэм къызэрыщыпсэлъар

³⁷ ЗауэлӀхэм Паул быдапӀэм яшэн хуей щыхъум, Паул дзэпщым жриӀащ: – Зыгуэр ныбжесӀэну хуит сыкъэпщӀын? – Алыджыбзэ пщӀэрэ? – къеупщӀащ ар.

³⁸ – Зэман тӀэкӀукӀэ узэӀэбэкӀыжмэ, Мысырым щыщ цӀыхухэр къызэщӀэзыӀэтэу хъунщӀакӀуэ миниплӀ губгъуэ нэщӀым изышар уэракъэ?

³⁹ – Сэ сыжуртщ, – жиӀащ Паул, – Киликие хэкум щыщу щӀыхь зиӀэ Тарс къалэм и цӀыхухэм сащыщщ. ЦӀыхухэм я пащхьэм сыкъыщыпсэлъэну хуит сыщӀ.

⁴⁰ Дзэпщым хуит къыщищӀым, Паул дэкӀуеипӀэм теувэри, и Ӏэр цӀыхухэм яхуищӀащ. Псори сабыр щыхъум, Паул журтыбзэкӀэ мыпхуэдэу жиӀащ: