Апокалипсис 9 - ХъыбарыфӀыр. ЩӀэдзапӀэр. Уэрэд ЛъапӀэхэр

9-НЭ ЕДЗЫГЪУЭ

¹ Етхуанэ мелыӀычыр и бжьамиишхуэм епщащ итӀанэ. Уафэм къикӀыу, щӀылъэм къехыгъа вагъуэр слъэгъуащ асыхьэту. ЩӀылъэм и кууупӀэу щӀэ зимыӀэм и щӀыхьэпӀэм и ӀункӀыбзэр мелыӀыч гуэрым а вагъуэм иритащ.

² Вагъуэм щӀылъэм и кууупӀэу щӀэ зимыӀэм и щӀыхьэпӀэр Ӏуихащ. Ар щыӀуихым, хьэкушхуэм и Ӏугъуэм хуэдэ Ӏугъуэ кърихуащ. А щӀыхьэпӀэм къыщӀэуа Ӏугъуэм дыгъэри уафэри игъэункӀыфӀащ.

³ МацӀэхэр Ӏугъуэм къыхэкӀри, щӀылъэм къытехьащ итӀанэ. ЩӀылъэм и акърэбхэм я къарум хуэдэ къару яӀэну мелыӀыч гуэрым а мацӀэхэм яритащ.

⁴ ЩӀылъэм и удзхэми, и жыгхэми, и къэкӀыгъэхэми ягъэ ирамыгъэкӀыну Тхьэм яжриӀащ. Тхьэм и мыхъурыр зи натӀэ темыгъэуа цӀыхухэм я закъуэщ я ягъэ зрагъэкӀын хуеяр.

⁵ МацӀэхэм а цӀыхухэр ягъэлӀэну хуитакъым, мазитхукӀэ гугъуехь ирагъэшэчыну хуита къудейщ. А гугъуехьу ирагъэшэчар акърэбыр цӀыхум щеуэкӀэ гугъуехьу иригъэшэчым хуэдэщ.

⁶ А махуэхэм цӀыхухэр лӀэныгъэм лъыхъуэнущ, ауэ ягъуэтынукъым. ЛӀэну хуеинущ, ауэ лӀэныгъэр яӀэщӀэкӀынущ.

⁷ МацӀэхэм я теплъэр зауэм хуагъэхьэзыра шыхэм я теплъэм хуэдэт. Дыщэм къыхэщӀыкӀа тажхэм хуэдэхэр ящхьэрыгът, я нэкӀухэри цӀыхухэм я нэкӀухэм хуэдэт.

⁸ Я щхьэцхэр цӀыхубз щхьэцхэм хуэдэт, я дзэхэри аслъэным и дзэхэм хуэдэт.

⁹ Я афэ джанэхэр гъущӀым къыхэщӀыкӀа афэ джанэхэм хуэдэт. Я дамэхэм япыӀукӀ макъыр зауэм ежьэ гужэ куэдымрэ шуудзэмрэ япыӀукӀ макъышхуэм хуэдэт.

¹⁰ Акърэбхэм кӀэ зэраӀэм хуэдэу, кӀэхэри яӀэт. КӀэхэми шэрэзхэр япытт. А мацӀэхэм лъэкӀыныгъэ яӀащ мазитхукӀэ цӀыхухэм гугъуехь ирагъэшэчыну.

¹¹ Абыхэм пащтыхьу яӀар щӀылъэм и кууупӀэу щӀэ зимыӀэм и мелыӀычыр арщ. Абы и цӀэр журтыбзэкӀэ Аваддонщ, алыджыбзэкӀэ Аполлионщ.

¹² Апхуэдэу, япэрей гъуэгу мыгъуэр блэкӀащ. Гъуэгу мыгъуитӀ къэхъунущ иджыри.

¹³ Еханэ мелыӀычыр и бжьамиишхуэм къепщащ итӀанэ. Тхьэм и пащхьэм ит къурмэнщӀыпӀэу дыщэм къыхэщӀыкӀам и къуапиплӀым къикӀыу макъ гуэр зэхэсхащ асыхьэту.

¹⁴ А макъым бжьамиишхуэр зыӀыгъ еханэ мелыӀычым жриӀащ: «Евфрат псышхуэм деж щрапха мелыӀычиплӀыр хуит щӀыж, утӀыпщыж».

¹⁵ Игъэува сыхьэтымрэ махуэмрэ, мазэмрэ илъэсымрэ цӀыху псоми я Ӏыхьэ щанэр ягъэлӀэну Тхьэм хьэзыру щигъэта мелыӀычиплӀыр яутӀыпщыжащ.

¹⁶ А шуудзэм хэтахэм я бжыгъэр мелуан щитӀ хъурт. Я бжыгъэр зыхуэдизыр зэхэсхащ.

¹⁷ Шыхэри шууейхэри мыпхуэдэу къысхуэлъэгъуащ: Афэ джанэхэр мафӀэм хуэдэу плъыжьу, щхъуантӀэу икӀи гъуэжьу ящыгът. Яшхэм я щхьэхэр аслъэныщхьэм хуэдэт. Шыхэм я жьэхэм мафӀэри, Ӏугъуэри, тхъуэбзащхъуэри къажьэдэкӀырт.

¹⁸ МафӀэ, Ӏугъуэ, тхъуэбзащхъуэ гугъуехьышхуищу а шыхэм я жьэхэм къажьэдэкӀыу щытам цӀыху псоми я Ӏыхьэ щанэр ягъэлӀащ.

¹⁹ Шыхэм я къарур я жьэм жьэдэлът, я кӀэм хэлът; сыт щхьэкӀэ жыпӀэмэ я кӀэхэр блэхэм хуэдэт; я кӀэхэм щхьэхэр япыту, абыхэмкӀэ я ягъэ цӀыхухэм ирагъэкӀырт.

²⁰ Ауэ а гугъуехьышхуэхэм хэмыкӀуэда цӀыхухэм я ӀэкӀэ ящӀа тхьэ нэпцӀ сурэтхэм я щӀыб хуагъэзэжыну ядакъым. Жин бзаджэхэр ягъэлъэпӀэныр къагъэнакъым икӀи дыщэм, дыжьыным, гъуаплъэм, мывэм, пхъэм къыхащӀыкӀа тхьэ нэпцӀ сурэтхэу зылъагъуни, зэхэзыхыни, зекӀуэни зылъэмыкӀхэр ягъэлъэпӀэныр щагъэтакъым.

²¹ Арати, зи ужь ит Ӏуэхуу цӀыху укӀыным, удыгъэм, зинэ щӀэным, дыгъуэным хущӀегъуэжакъым.