1 Мусэ 43 - ХъыбарыфӀыр. ЩӀэдзапӀэр. Уэрэд ЛъапӀэхэр

Биниамин и къуэшхэм я гъусэу Мысырым зэрыщыӀар

¹ Гъаблэр нэхъ ткӀий щыхъуащ щӀылъэм.

² Мысырым къраша гъавэр яшхын щаухым, Екъуб яжриӀащ и къуэхэм: – ФыкӀуэ иджыри, къытхуэфщэху гъавэ.

³ Иудэ абы зыкъыхуигъэзащ, мыр жиӀэри: – А цӀыхум быдэу къытхуигъэуващ дэ: «Фыкъимыхьэ си пащхьэ, фи къуэшыр фи мыгъусэмэ», жиӀэри.

⁴ Ди къуэшыр ди гъусэмэ, дыкӀуэнщи, къыпхуэтщэхунщ гъавэ.

⁵ Ауэ номыгъакӀуэмэ, дыкӀуэнукъым; сыт щхьэкӀэ жыпӀэмэ а цӀыхум къыджиӀащ дэ: «Фыкъимыхьэ си пащхьэ, фи къуэшыр фи мыгъусэмэ», жиӀэри.

⁶ – Сыт фэ апхуэдэ Ӏеягъэ къыщӀызэфщӀар, – жиӀащ Израил, – фэ иджыри къуэш фиӀэу а цӀыхум жефӀэу?

⁷ – КъытпкърыупщӀыхьащ а цӀыхур дэр папщӀи ди Ӏыхьлыхэм папщӀи, – жаӀащ абыхэм, – «Псэу иджыри фи адэр? ФиӀэ къуэш?» – жиӀэурэ. Дэри хуэтӀуэтащ ар абы а упщӀэхэм я жэуапу. ТщӀэрэт дэ абы: «Къысхуэфшэ фи къуэшыр» жиӀэну.

⁸ Иудэ жриӀащ Израил, езым и адэм: – НэутӀыпщ щӀалэр си гъусэу; дэри зытӀэтынщи, дыкӀуэнщ, икӀи псэууэ дыкъэнэнщ, дылӀэнкъым дэри, уэри, ди сабийхэри.

⁹ Сэ жэуап сохь абы папщӀэ, си ӀэхэмкӀэ уэстыжынщ ар. Сэ ар къыпхуэсшэжу уи пащхьэм измыгъэувэжмэ, уи пащхьэм сыщыкъуаншэщ игъащӀэкӀэ.

¹⁰ Дэ зидмылъэфыхьамэ, тӀэунейрэ дыкӀуакӀэт абы.

¹¹ Израил, абыхэм я адэм, яжриӀащ и къуэхэм: – Апхуэдэу щыщыткӀэ, мыр фщӀэ: ныздэфщтэ мы щӀыналъэм къытекӀхэм ящыщ нэхъыфӀхэр, хуэфхь тыгъэу а цӀыхум Ӏэзэгъуэ удз зыбжанэрэ форэ, мэ ӀэфӀ зыпихрэ жыгхэмрэ удзхэмрэ, дэжьейхэмрэ миндал дэхэмрэ.

¹² Зыдэфщтэ хуэдитӀкӀэ дыжьыни; а фи къэпхэм къралъхьэжа дыжьынри зыдэфщтэжи, яхуэфхьыж; пщӀэнукъым, зэрымыщӀэкӀэ къэхъуа Ӏуэхуу къыщӀэкӀынкӀэ хъунущ ар.

¹³ Фи къуэшыр здэфшэ, зыфӀэти, фыкӀуэ аргуэру а цӀыхум деж.

¹⁴ Тхьэуэ псори зыхузэфӀэкӀым щывигъэгъуэтынщ а цӀыхум деж гущӀэгъу, адрей фи къуэшри Биниамини абы къыфхуиутӀыпщыжын папщӀэ. Сэри быныншэу сыкъэнэну иухамэ, быныншэу сыкъренэ.

¹⁵ Арати, къащтащ а тыгъэхэр а цӀыхухэм, къащтащ я ӀэхэмкӀэ дыжьыну хуэдитӀи, Биниамини здашэри, кӀуащ Мысырым, иуващ Исуф и пащхьэм.

¹⁶ Исуф, абыхэм Биниамин яхэту къыщилъагъум, жриӀащ езым и унэм и унафэщӀым: – ЩӀэшэ мы цӀыхухэр унэм, Ӏэщым щыщ гуэри укӀи, къэгъэхьэзыр; си гъусэу шхэнущ а цӀыхухэр шэджагъуэм.

¹⁷ ИщӀащ а цӀыхум Исуф зэрыжиӀам хуэдэу, щӀишащ а цӀыхум ахэр Исуф и унэм.

¹⁸ А цӀыхухэр Исуф и унэм зэрыщӀашам щхьэкӀэ къэшынэри, жаӀащ: – Ди къэпхэм иралъхьэжауэ щыта дыжьыным папщӀэщ унэм дыкъыщӀыщӀашар, ар фӀэгъэнапӀэ ящӀу къыттеуэу дэри ди шыдхэри гъэр дащӀын папщӀэщ.

¹⁹ Ахэр Исуф и унэм и унафэщӀым бгъэдыхьэри, щӀадзащ абы бжэм деж щепсалъэу.

²⁰ ЖаӀащ мыпхуэдэу: – КъэдаӀуэт, ди зиусхьэн, дэ нэхъапэми дыкъэкӀуэгъащ гъавэ тщэхуну.

²¹ Абы щыгъуэ къэхъуауэ щытаращ: нэху дгъэщыну дыкъэувыӀауэ, ди къэпхэр щыттӀатэм – дыжьыныр щхьэж и къэп илъщ, иджы дэ фыдотыж ар ди ӀэкӀэ.

²² Ауэ гъавэ къэтщэхун папщӀэ, дэ къэтхьащ нэгъуэщӀ дыжьыни. Дэ тщӀэркъым ди дыжьынхэр ди къэпхэм хэт кърилъхьэжами.

²³ – Фысабыр, фымышынэ, – жиӀащ абы, – фи Тхьэуэ фи адэм и Тхьэм фхурилъхьащ фи къэпхэм мылъкур; фи дыжьыныр къэсащ си деж. – Абдеж къахуишащ абыхэм Симеон.

²⁴ Исуф и унэм а цӀыхухэр щӀишэри, яхуихьащ псы, абыхэм ятхьэщӀащ я лъакъуэхэр; яритащ абыхэм я шыдхэми Ӏус.

²⁵ Къагъэхьэзыращ абыхэм тыгъэхэр Исуф къыщыкӀуэжыну шэджагъуэм ехъулӀэу. Сыт щхьэкӀэ жыпӀэмэ абыхэм зэхахат абдежым щэджагъуашхэ зэрыщышхэнур.

²⁶ Арати, къэкӀуэжащ Исуф унэм; хуахьащ абыхэм Исуф тыгъэу езыхэм яӀыгъхэр, щхьэщи хуащӀащ абы щӀым нэс загъэщхъыу.

²⁷ Абыхэм я узыншагъэм щӀэупщӀэри, жиӀащ Исуф: – Узыншэ зи хъыбар къысхуэфӀуэта фи адэ лӀыжьыр? Псэу ар иджыри?

²⁸ Абыхэм жаӀащ: – Узыншэщ уи унэӀутыр, ди адэр; иджыри псэущ. Абдежми загъэщхъри, абыхэм щхьэщэ ящӀащ.

²⁹ Исуф къыщеплъым, къилъэгъуащ Биниамин, езым и къуэшыр, езым и анэм къилъхуар, икӀи жиӀащ: – Мыра фи къуэш нэхъыщӀэу зи хъыбар къысхуэфӀуэтар? АдэкӀэ пищащ: «Тхьэм и нэфӀ къыпщыхуэ, си щӀалэ!»

³⁰ ПӀащӀэу ӀукӀыжащ Исуф, сыт щхьэкӀэ жыпӀэмэ абы и къуэшым хуиӀэ лъагъуныгъэр къызэщӀэнати, ар хьэзырт къэгъыну; ар унэм щӀыхьэри щыгъащ унэ кӀуэцӀым.

³¹ И напэр итхьэщӀыжри къыщӀэкӀыжащ, зиубыдыжри жиӀащ: – Къэфхь шхыныр.

³² Къыхуахьащ абы щхьэхуэу, абыхэми щхьэхуэу, абыхэм къадэшхэ мысыр цӀыхухэми щхьэхуэу: мысыр цӀыхухэр ядэшхэ хъуркъым журтым; ар цӀапӀагъэщ мысыр цӀыхухэм дежкӀэ.

³³ ЩытӀысащ зэшхэр абы и пащхьэм, нэхъыжьыр езым и ныбжьым елъытауэ, нэхъыщӀэри езым и нэхъыщӀагъэм елъытауэ, а цӀыхухэр зыр адрейм фӀэгъэщӀэгъуэныжу зэхэст.

³⁴ Исуф езым и Ӏэнэм телъ шхыныгъуэхэм щыщ абыхэм къахуригъэхьырт; Биниамин и Ӏыхьэр тхукӀэ нэхъыбэт дэтхэнэми ейм нэхърэ. Арати, ефахэщ, икӀи дэгуфӀащ абы.