1 Мусэ 2 - ХъыбарыфӀыр. ЩӀэдзапӀэр. Уэрэд ЛъапӀэхэр

¹ Уафэмрэ щӀылъэмрэ, абыхэм щыӀэ псори ухуа хъуащ.

² Ебланэ махуэм ирихьэлӀэу, Тхьэм илэжьа Ӏуэхухэр иригъэкъуащ, ебланэ махуэм гупсэхугъуэ игъуэтащ илэжьа Ӏуэху псоми я ужькӀэ.

³ Тхьэм и нэфӀ ебланэ махуэм щыхуэри, махуэ лъапӀэ ар ищӀащ, сыт щхьэкӀэ жыпӀэмэ а махуэм Тхьэм гупсэхугъуэ игъуэтащ илэжьа Ӏуэху псоми я ужькӀэ.

⁴ Аращ уафэмрэ щӀылъэмрэ я къэхъукӀэ хъуар – Зиусхьэну Тхьэм щӀылъэри уафэри щиухуам щыгъуэ.

Ӏэдэн жыг хадэр

⁵ ЩӀыгум зы чыци теттэкъым, зы удзи къэкӀатэкъым иджыри, сыту жыпӀэмэ Зиусхьэну Тхьэм тригъэшхатэкъым щӀылъэм уэшх, цӀыхуи щыӀэтэкъым щӀыгум телэжьыхьыну;

⁶ ауэ щӀылъэм бахъэр къыщхьэщихырти, абы игъэпсыӀэрт щӀым и нэгур.

⁷ ИтӀанэ къигъэщӀащ Зиусхьэну Тхьэм цӀыхур, щӀылъэ сабэм къыхищӀыкӀри, икӀи абы епщэри гъащӀэ иритащ, цӀыхум псэ къыӀуигъэкӀащ.

⁸ Щиухуащ Зиусхьэну Тхьэм къуэкӀыпӀэмкӀэ щыӀэ Ӏэдэн жыг хадэ; Езым къигъэщӀа цӀыхум ар псэупӀэ хуищӀащ.

⁹ КъыхигъэкӀащ Зиусхьэну Тхьэм щӀыгум теплъэ гурыхь зиӀэ шхыныгъуэфӀ хъу сыт хуэдэ жыгхэри, жыг хадэм и курыкупсэм щигъэкӀащ гъащӀэ къэзыт жыгри фӀымрэ емрэ зэхэзыгъэкӀ жыгри.

¹⁰ Ӏэдэн къыхэжырт жыг хадэр зыгъэпсыӀэ псыр, итӀанэ ахэр псиплӀу зэхэкӀыжырт.

¹¹ Зым и цӀэщ Пишэн: абы къызэщӀеубыдэ Хауилэ щӀыналъэу дыщэ здэщыӀэр;

¹² А щӀыналъэм и дыщэр фӀыщ; абдежым щыӀэщ мэ Ӏэф зыпих мыстхъурэ Оникс зи цӀэ мывэ лъапӀэрэ.

¹³ ЕтӀуанэ псым и цӀэщ Гъыхъон: абы къызэщӀеубыдэ Куш щӀыналъэ псор.

¹⁴ Ещанэ псым и цӀэщ Тигр: ар щожэх Ашур и къуэкӀыпӀэмкӀэ. ЕплӀанэ псыр Евфратщ.

¹⁵ Зиусхьэну Тхьэм цӀыхур ишэри псэупӀэ щритащ Ӏэдэн жыг хадэм, абы илэжьыхьын, ар ихъумэн папщӀэ.

¹⁶ Зиусхьэну Тхьэм унафэ хуищӀащ цӀыхум, мыр жиӀэурэ: – Жыг хадэм ит дэтхэнэ жыгми къыпыкӀэр пшхыну ухуитщ,

¹⁷ ауэ фӀымрэ емрэ зэхэзыгъэкӀ жыгым къыпыкӀэр умышх; сыт щхьэкӀэ жыпӀэмэ ар щыпшх махуэм уи ажалыр абы къыхэкӀынущ.

¹⁸ ЖиӀащ Зиусхьэну Тхьэм: – ФӀыкъым цӀыхум и закъуэу щытыну; къэзгъэщӀынщ абы хуэфащэ дэӀэпыкъуэгъу.

¹⁹ Зиусхьэну Тхьэм къыхигъэхъукӀащ ятӀэм губгъуэ псэущхьэ псори, уэгу къуалэбзу псори, икӀи къыхуишащ цӀыхум, абыхэм цӀэ зэрафӀищыр илъагъун папщӀэ, икӀи дэтхэнэ псэ зыпытми цӀыхум цӀэуэ фӀищар абы цӀэ хуэхъун щхьэкӀэ.

²⁰ ФӀищащ цӀыхум цӀэ Ӏэщ псоми, уэгум ит къуалэбзухэми, губгъуэ хьэкӀэкхъуэкӀэ псоми; ауэ цӀыхум и дэӀэпыкъуэгъу къахэкӀакъым абыхэм езым ещхьу.

²¹ Зиусхьэну Тхьэм хригъэлъэсащ лӀыр жей Ӏувым; ар жея нэужь, абы и дзажэналъэхэм ящыщ зы къыхихри, ар къыздыхиха щӀыпӀэр щӀихъумэжащ лыпцӀэкӀэ.

²² Зиусхьэну Тхьэм лӀым и дзажэналъэм бзылъхугъэ къыхищӀыкӀри, къыхуишащ ар лӀым.

²³ ЖиӀащ цӀыхум: – Мыр си пкъым щыщ къупщхьэщ, си лым щыщ лыщ; абы и цӀэу щытынущ цӀыхубз сыту жыпӀэмэ лӀым къыхахащи.

²⁴ Абы къыхэкӀкӀэ лӀыр адэ-анэм яхэкӀынурэ, и фызым щӀыгъуу, тӀури зыпкъ хъунущ.

²⁵ ПцӀанэт тӀури, лӀыри фызри, абы щхьэкӀи укӀытэхэртэкъым.