Псалтыр 98 - Коми Библия 2023

98 Псалом

[Давидлӧн псалом.]

¹ Господь ӧксыалӧ! Полӧй-тіралӧй Сыысь, войтыръяс! Сійӧ пукалӧ херувимъяс вылын. Мед сыркакылас муыс!

² Господь ыджыдалӧ Сионын, Сійӧ войтыръяс вылын ыджыдыс.

³ Господьӧй, мед ошкасны Тэнсьыд ыджыд нимтӧ, Тэнад нимысь мед полӧны ставныс, Тэнад нимыд вежа!

⁴ Тэ – вына Ӧксы, Тэ радейтан збыльсӧ, Тэ вынсьӧдін Ассьыд веськыдлунтӧ. Яковсянь чужысьясӧс Тэ веськыда мыждін, вӧчин налы збыльыд серти.

⁵ Ыдждӧдлӧй Господьӧс, миянлысь Енмӧс! Кок улас уськӧдчӧмӧн копыртчӧй Сы водзӧ, ӧд Сійӧ вежа!

⁶ Мӧисей и Аарон вӧліны Господьлӧн попъяс, Самуил вӧлі Господь дінӧ шыасьысьяс лыдын. Найӧ шыасьлісны Господь дінӧ, и Сійӧ вочавидзліс налы.

⁷ Сійӧ сёрнитіс накӧд кымӧр сюръя пытшсянь. Найӧ видзисны Сылысь индӧд-тшӧктӧмсӧ.

⁸ Господьӧй, миян Енмӧй, Тэ вочавидзин налы, Тэ вӧлін налӧн Енмӧн, прӧститін найӧс, но и мыждін лёк вӧчӧмсьыныс.

⁹ Ыдждӧдлӧй Господьӧс, миянлысь Енмӧс! Копыртчӧй Сылӧн вежа керӧслань, ӧд Господь, миян Енным, вежа!