Псалтыр 27 - Коми Библия 2023

27 Псалом

1 Давидлӧн псалом.

¹ Давидлӧн псалом. Господьӧй, ме шыася Тэ дінӧ, Тэ менам Дорйысьӧй. Кор шыася Тэ дінӧ, эн чӧв ов. Тэ кӧ кутан чӧв овны, ме кула.

² Кор ме шыася Тэ дінӧ, кыпӧда киӧс Тэнад вежа крамлань, кыв менсьым кевмӧмӧс.

³ Эн бырӧд менӧ Ентӧг олысьяс да лёк вӧчысьяс лыдын. Йӧзыскӧд найӧ бурнога сёрнитӧны, а сьӧлӧманыс новлӧдлӧны лёксӧ.

⁴ Мынтысь налы уджъясныс да лёк вӧчӧмныс серти, мынтысь налы сы серти, мый вӧчисны асланыс киӧн. Сет налы сійӧ, мый асьныс корсисны.

⁵ Ӧд найӧ нинӧмӧ пуктӧны Господьлысь уджъяссӧ, Сылысь вӧчӧмторъяссӧ. Та вӧсна Сійӧ пасьвартас найӧс, и бӧрсӧ кок выланыс оз сувтӧд.

⁶ Ошкӧм Господьлы, ӧд Сійӧ кыліс менсьым кевмысьӧмӧс.

⁷ Господь – менам выныс да сайӧдыс. Ме лача куті Сы вылӧ, и Сійӧ отсаліс меным. Менам сьӧлӧмӧй ёна нимкодясьӧ, ме сьылӧмӧн ошка Сійӧс.

⁸ Господь – Аслас войтырлӧн выныс, Аслас мавтыштӧмалӧн Дорйысьыс да Мездысьыс.

⁹ Господьӧй, мезды Ассьыд войтыртӧ, бурси да видз найӧс, ну Аслад ки вылад нэмъяс чӧж!