Псалтыр 147 - Коми Библия 2023

147 Псалом

[Аллилуйя!]

¹ Ошкы, Ерусалим, Господьӧс, ошкы, Сион, ассьыд Ентӧ!

² Сійӧ ёнмӧдӧ тэнад дзиръяяслысь иганъяссӧ, бурсиӧ тэнсьыд олысьястӧ.

³ Сійӧ ыстӧ тэныд лӧнь олӧм, вердӧ тэнӧ медбур шобді няньӧн.

⁴ Сійӧ мӧдӧдӧ Ассьыс кывсӧ му вылӧ, Сылӧн кывйыс ӧдйӧ воӧ.

⁵ Еджыд вурунӧн моз Сійӧ вевттьӧ мусӧ лымйӧн, пӧимӧс моз коялӧ му вылӧ пуж,

⁶ ёкмыльясӧс моз шыблалӧ му вылӧ шерсӧ. Сылӧн кӧдзыдысь коді вермас дзебсьыны?

⁷ Сійӧ шуас Ассьыс кывсӧ, и ставыс сылӧ. Мӧдӧдас тӧвныр, и шоръяс визувтӧны.

⁸ Господь юӧртіс Ассьыс кывсӧ Яковлы, висьталіс Ассьыс индӧд-тшӧктӧмъяссӧ Израильлы.

⁹ Мукӧд войтырлы Сійӧ эз юӧрт тайӧс, найӧ оз тӧдны Сылысь тшӧктӧмъяссӧ. Аллилуйя! Ошкӧм.