Yünan 2 - TIMIꞌDI TUMMA MA ꞌBÏTÏNGNGÖ NJA RAWUS NJA YÜNAN

Yünan afara ka Masala

¹ A Yünan tafara ka Masala Uugaara miini ndama mïdïgïlöögö ka eedi,

² “Nïkïrï aꞌa nafara küdü Uugaara namma ka dhügürü tiya eede. Nafara küdü ndama teene Uugaara na taföönyö tumma neede. Ndama la ma oofo ka tümꞌbü namünügü aꞌa koꞌdo, na taföönyö tumma neede.

³ Napügü aꞌa co ꞌbuugu ka tümꞌbü ma to kita ꞌbïïdï ka taküdhü aꞌa ka oona ïnꞌdïlï nja türü ma ꞌbïïdï tiya üüdü nyeꞌdꞌde kïïsö kede koꞌdo.

⁴ Niki aꞌa kide aꞌda oꞌo nagasoro aꞌa kidha ma oꞌo taalo aꞌa nara tassa ka ꞌdï tiya üüdü ya insili ya afeꞌde.

⁵ A ꞌbïïdï taküdhü aꞌa nja mꞌboro a to taꞌduuru aꞌa ka oono ꞌdo, ooyo ma to taküdhü üüdü yeede.

⁶ Nadhigi co tümꞌbü ma naꞌdikinya ka ꞌbüdhülü tiya, naco ka ꞌbüdhülü tiya ꞌbuugu ya, nagïnyeene miini ka taterre kede taꞌbilli no. Lakiini oꞌo Masala Uugaara meede ara oꞌo sa tunggu aꞌa koꞌdo ndama taꞌbuugu kadïnö.

⁷ Ka tefe ka ꞌdï tanno eede kara tapadaga kede ara aꞌa tagïïgï oꞌo Uugaara ara fara yeede tala oꞌo ka ꞌdï tiya üüdü ya insili ya.

⁸ Kadu na ümmü tumma ma eema ma namasala na oroko na korokoro no, amang kene kafa tataꞌda ka eema tiya keere, kara kanu ka türü tanno üüdü.

⁹ Lakiini ara aꞌa tüwe tüüsü ma tamana taꞌdiila oꞌo, ara tïrrï oꞌo. Nüünï eema yeede ka takiki aꞌda ara aꞌa tüünï ya, toolona kara töꞌdö ndama oꞌo Uugaara.”

¹⁰ Ïkïrï Uugaara ka anangnga mïdïgïlöögö ka tapügü Yünan co ꞌdukundaala.