RUTH 3 - BAIBEL KANGTHIR (BSI)

Ruth Apenan Kechelong

¹ Lapen alangli nipi Naomi alang-liphan pulo, “Nangli keme aphan nanglihem neli nangripi nangnema, pei?”

² Non nangli kedunbom abanpi atum ahemphu Boaz, la ilitum kechepho amonit kalima? Langtha, paningve alangli sok keti adim tipliso asok jappo.

³ Lasi lang chingroira jangthu chehinon lapen nangli akemenei chingthang-ra sok keti adim damnon, bonta bangso amonit kecho-kejun tangtetik ke cheklangri.

⁴ Bonta la kodak si ke-ima, ke-i adim langdunnon, anle damra akeng athak ape oira idunnon; lapen nangli kopisi klem nangjima alangli nangthanpo.

⁵ Lapen bangpi thak-lo, “Nangli kepu ason an neli klempo.”

⁶ Lasi alangli sok keti adim damlo, lapen anipi kepu asonthot si klemlo.

⁷ Lapen Boaz kecho lapen kejun patangsi aning arong-lo, lapen sok-bui akung damsi ilo. Anke bangpi vang-joisi akeng athak ape oisi idunjoilo.

⁸ Lapen jirlo chitim apor bangso amonit kechepharlep ahut thirikjok-lo, lapen inut a-osopi akeng-ri ke-i thek-long-lo.

⁹ Alangli pulo, “Nangli komat-lo?” Lapen bangpi thak-lo, “Neli Ruth, nanglibanpi; nangli pe ade nanglibanpi aphuthak sangjaitha athe nanglike neli kechephonei abang-lo.”

¹⁰ Alangli pulo, “Hemphu pen ajok nangliphan pahirjumenang, pei, nangli kejut akanghon aphrang penta themu la nangpaklang-lo lapen hala along nangli duk seta, plang seta risomar atum aphi phi dundedet-lo.

¹¹ Lapen pei, non phere nangnelo, nangli kehang ason an neli klempo, athe nelijirpo rong asor nangli mesen a-arlosolo pu chinipet.

¹² Lapen non ne helo adung kechephonei pu la ahok-lo, seta ne apar kechepho muchot abang dolang mene.

¹³ Paningve dak-le donon lapen penap adap jongsi alangli nangliphan kechephonei abang keklem nangji akam klem lote mesen la le paklemnang, bonta jongsi la kechephonei abang keklem nangji akam keklemji aninghanghe, pulote Hemphu kereng asonsi, neli, adun kechephonei keklem nangji akam nangliphan klempivekpo. Theang-etik inon.”

¹⁴ Lasi bangpi the-ang-etik alangli kengri ikok-lo, bonta monit pu-pu amahang chechini thek aphrang thurlo, lapen alangli pulo, “Arloso sok keti along kevang alam baduta pachini longledet nangji.”

¹⁵ Lapen alangli pulo, “Nangli keche-um ape vanra nangchodeng dunnon.” Lasi bangpi chodeng dunlo lapen alangli ton throk tipliso asok tengsi aphu athak batdunlo; ansi arongsopi chedamlo.

¹⁶ Lapen bangpi anipi along kechevang un ahut anipi pulo, “Pisi keplang-loma pei?” Ansi Ruth halabangso amonit alang phan keklem ason an than et-si pulo,

¹⁷ “La ton throk atipliso asok alanglisi neliphan pilo, pima alangli pulo, ‘Nangli nipi along nangliri angse dam nangne.’”

¹⁸ Anipi thak-lo, “Bangso alam pi plangjima la chini ne tik inghongtha pei, athe bangso amonit dojoije bonta pini amat bangso akam patangvekpo.”