ROM ASOR ATUM APHAN POL KETOK ALOH 3 - BAIBEL KANGTHIR (BSI)

¹ Tangte Jihudi kecheplang pen kopi ale doma? Kalite reng-rot ke-en pen kopi ale doma?

² Ale do, kadokave ahin pen setta lake ale do binong! Aphrangsi ale ke lahelo, Arnam Jihudi atum aphansi amethang alam pilo.

³ Bonta halatum angbong manene atum jongsi kekroi thirklongklelo tangte, kopilo keplangpo? Labangso pen apot Arnamta kekroi thirklongkle detjima?

⁴ Jonghe setta lapu kali, abangphutin amonit-le kechobei abang plang setta Arnam ke kaiketa ahokpet abang-lo. Atheke hastro pulo, “Nangli keningje pen ajok nanglike ahokpet abang-lo pu klang nangji; lapen nangliphan kangsai ahutta nangli lam hai nangji.”

⁵ Bonta jongsi ilitum akechokche pen ajok Arnam ahokpet akam klangdak muchot-lo tangte ilitum pisi pupoma? Arnam ilitum aphan kepasungke Arnamsi akechokche loma? (Monit atum kepu pu asonthotsi neli la pulo.)

⁶ Lapu kali! Arnam jongsi dhoromi abang kali tangte, alangli kopusi pirthe aphan ingsaithek poma?

⁷ Bonta komane abang pu tahai, “Neli keklem akechokche pen ajok jongsi dhoromipet akam klangdaksi Arnam adak atur klangdak muchot-lo tangte, kopi apotsi neliphan papi pu ado ne padolangma?”

⁸ Tangte “Akeme keklangji aphan ilitum kehingno klem lonang,” putong ilitum punangma? Chenamsi, neli labangso alam pulo pusi manene atum neliphan adai tinsi nepinremlo. Halatum kepho nangji asonthotsi halatum aphan ado padovekji.

Dhoromi Abang Inutta Ave

⁹ Tangte Arnam angno ili Jihudi atum hala Jihudi kalidet atum apar memuchot-loma? Jonghe setta lapu kali! Neli aphrangta pulo, Jihudi lapen Jihudi kalidet atum kadokaveta pap ajakong abersi dolo.

¹⁰ Atheke hastro pulo: “Dhoromi abang inutta ave,

¹¹ kechini abang inutta ave, lapen Arnam aphan keri abang inutta ave.

¹² Kadokave amonitta Arnam pen sui-ettang-lo, halatum chokchepet-lo, akeme keklem abang apakta ave; inutnatta ave.

¹³ Halatum alangjoi ke kangpudang atipit asonthak thak-lo; halatum ade pen chobeilo, lapen halatum angtur along ruiphe abi dolo;

¹⁴ halatum angho ke kehingno ahirjuno pen plengset-lo.

¹⁵ Halatum bang avi kepabu prap-olo;

¹⁶ halatum kedam aling monit atum aphan pavirlo lapen pasung-lo.

¹⁷ Halatum ning kangsam atovar chinine,

¹⁸ lapen halatum Arnam aphan kephere charlile.”

¹⁹ Lasi ilitum chinilo, kadokave amonit atum aphan kepachethak dunji atovar pavedetsi Arnam kadokave amonit aphan kangsai longji aphansi Aron along ketok alam anke Aron aber kedo atum aphanlo.

²⁰ Pima Arnam angno ke, Aron ateng keklem apot-le inut amonit aphan dhoromi pu kelakha kali. Pima Aron ke monit atum aphan amethang methang apapsi pachechinichot.

Kekroi Pen Ajok Dhoromi Keplang Alam

²¹ Bonta nonke Arnam monit aphan dhoromi kepaplang akam paklangdak-lo, lapen lake aron-atang pen ajok kalipinlo. Tebonta Aron lapen Arnam amontri atumta labangso alamjir ahaki pilo.

²² Monit atum Jisu Khristo aphan kekroi ajoksi Arnam halatum aphan dhoromi paplang-lo. Khristo aphan kekroi atum an aphan Arnam lapuson klemlo, pima Jihudi lapen Jihudi kalidet atum angbong thangnat akeprekta avelo,

²³ atheke kadokave amonitta pap klemtang-lo lapen Arnam adak atur pen chingbarbedettang-lo.

²⁴ Bonta Arnam akangjinso pen ajok Arnam halatum aphan akejoisi dhoromi paplang-lo, lapen lake halatum aphan kepajok abang Jisu Khristo pen ajoksi alangli klemlo.

²⁵ Monit atum Khristo aphan kroisi alangli vi pen ajok amethang apap hei hei diya kelongji aphansi Arnam Khristo aphan athok ajir ason paplangsi thokdet-lo. Arnam monit atum aphan dhoromi kepaplang akam kepaklangji aphansi alangli la klemlo. Aphrang ahut ke Arnam aning chepadingsi monit atum apap hei hei alakha en-edet-lo,

²⁶ bonta nonke alangli monit aphan dhoromi kepaplang akam kepaklangjisi monit apap hei hei alakha enlo. Lapusonsi alangli amethang dhoromipet akam chepaklang-lo, lapen Jisu aphan kekroi atum an aphan dhoromi pusi lakhalo.

²⁷ Tangte ilitum kechepindakji ason doma? Thangta ave! La kopi apotma? Ilitum Aron ateng klemsi dhoromi plang-lo pu chepindak unma? Un-e. Pima Aron ateng keklem apot kali, bonta kekroi pen ajoksi ilitum dhoromi plang-lo.

²⁸ Pima monit ke Aron ateng keklem pen ajok-le dhoromi keplang kali, kekroi pen ajoksi dhoromi plang-lo pu ilitum kroilo.

²⁹ Kalite Arnam ke Jihudi atum a-Arnamchotma? Alangli ke Jihudi kalidet atum a-Arnamta-lo, kalima? Chenamsi alangli ke Jihudi kalidet atum a-Arnamta lo.

³⁰ Arnam ke inutnat, lapen alangli Jihudi atum aphanta halatum akekroi apotsi dhoromi pu lakhaji, lapen Jihudi kalidet atum aphanta halatum akekroi apotsi dhoromi pu lakhaji.

³¹ Tangte labangso akekroi pen ajok ilitum Aron ale pavedet-loma? Lapu kali; bonta ilitum Aron pathirlo.