PHILIPI 4 - BAIBEL KANGTHIR (BSI)

Kethanpare

¹ Lasi neli kechinghon akorte marli atum, nanglitum Hemphu pen chelangpetra chepathirthipnon. Neli nanglitum aphan nangchinghonpik-lo, lapen nangchingtungpik-lo. Nanglitum neliphan ning neparongpik-lo, lapen nanglitum helo neliphu avaikang anong-elo, kechinghon akortemarli atum!

² Eudia lapen Sintiki, neli nanglitum aphan choningrilo, nanglitum Hemphu aphan langra ning isipet penle donon.

³ Lapen nangli, atheke ahokpet pen neli pen kam keklem rap rap abang, nangli labangso arlosomar atum aphan rapduntha.

⁴ Nanglitum Hemphu pen chelang-pet-ra kaiketa chehoknon. Neli puthulo; chehoknon!

⁵ Nanglitum kadokave angno ke-chingkime a-ot paklangnon. Hemphu vangdap-prangpo.

⁶ Son suri alam setta ning biri, bonta kardom lapen kechoningri pen pen kero penle nanglitum akenangji anta Arnam aphan pachininon.

⁷ Anke nanglitum Khristo Jisu pen kechelangpet pen ajok monit atum kechinipet un-e Arnam kepi aning kangsam nanglitum aning lapen akematha aphan honpo.

⁸ Kejutsi, kortemarli atum, nanglitum keme ason an lapen keromeme atheng an: atheke ahok ason an, ot keme an, kechok ason an, kedin movedet ason an, inghonmeme ason an lapen aman kepimeme ason an alamle mathanon.

⁹ Nanglitum neli long pen kecharlitang, kelongtang, karjulongtang lapen neli long nangkethek dunlongtang ason an klemnon. Anke ning kangsam ekepi a-Arnam nanglitum along dopo.

Akerap Kelong Apot Kechoro

¹⁰ Arni dingklui pen aphi nanglitum neliphan kemathathu apot neli Hemphu pen chelangpetsi ning arong-lo. Nanglitum neliphan kematha ingtonkok-lo pule neli kepudam kali, bonta nanglitum neliphan kerapji aphan asoi keme longledet apotsi nanglitum neliphan akematha alam chepaklang longledet-lo.

¹¹ Neli akedorde kedo apotsi labangso alam pudamlo, lapu kali, pima neli kedo ason an pen ning kechepangsamji aphan charlitang-lo.

¹² Neli akedorde ahut lapen kedorchit pen apar kedo ahut kopusonsi do nangjima, lake neli chinilo. Neli do-dam aling tame, kadokave ahut tame, neli ingkrangling tame, mate ingchirduk settame; do-o tame, mate avedet settame, pho aling setta neli ning kechepangsamji aphan charlitang-lo.

¹³ Neli pho aling settame, Khristo nekepi ajakong pen kadokave asonta keklemji ajakong do.

¹⁴ Tebonta nanglitum neli akesung apharman nangke-endunke mesenlo.

¹⁵ Lapen neli nanglitum ahavar birta keme kepachethang kepangcheng ahut malom, neli Masedonia ke-otekang ahut neliphan nekerapdun amondoli mate kroi-asong ke nanglitum anchot, akaprek ave, lake nanglitum Philipi asor atum chinipamelo. Ale kedo lapen ale kave akam along neli pen keche-langrap atum ke nanglitum anchot;

¹⁶ neli ha Thessalonika arongsopi kedo ahutta nanglitum neliphan batai isi-hini akerap ason nang-lolo.

¹⁷ Neli danle keri kali, bonta nanglitum ale longsi nanglitum alakha kechanbomjisi neli ning hang-lo.

¹⁸ Neli longpet-lo, lapen lake kenangji pen aparlo. Nanglitum Epaphrodaitas along nangkelodun akerap ason neli kelong pen neli dorphlup-lo. Halabangso akerap ason ke Arnam aphan kethok kenemprujin, Arnam kedengmeme lapen aning kedok athok asonthakthak-lo.

¹⁹ Lapen Khristo Jisu pen ajok ne-Arnam amethang adak-atur akhi angbong pen nanglitum akenangji anta nangpipo.

²⁰ Kejut un-e akai apar akai anta e-Po Arnam adak atur pathenang! Amen.

Kejut Akardom Kepi

²¹ Khristo Jisu amen pen neli kangthir atum an aphan kardom pilo. Ladak neli long kedo akorte atumta nanglitum aphan kardom nangchepidunlo.

²² Ladak kedo kangthir atum an, jasemet ke Koisor Recho ahem kedo amonit atum nanglitum aphan kardom nangpidunlo.

²³ Hemphu Jisu Khristo akangjinso nanglitum kadokave along padonang.